行程：酒店 → 築地市場 → 增上寺 → 淺草 → 蔵前 → 新宿 → 酒店
住宿：新宿アーバンホテル
今朝八時就起床，個天落著微微雨，有些擔心。梳洗後食過飯團早餐就出發，去到東新宿駅時好彩白熊提我買都營一日乘車券700円，買了車票後開始行程。先乘大江戶線到築地市場駅，約十時多就到築地市場，好彩這時個天無雨，可以慢慢行，好耐都無行築地內市場，所以今次先行下內市場。每次到內市場，總會見寿司大及大和寿司門前排長龍，但係今次另外有多間寿司店一樣排長龍，成條街都係人龍，剎為奇觀。
行完內市場，肚了已經很餓，於是行去外市場食午餐，今次都係揀咗到かんの食魚生丼，這樣的魚生丼雖然比較貴，但十分新鮮美味，食飽後就行下外市場，買了些魚乾後，就出發到下一站增上寺。
增上寺其實係在網上偶然搵到，在那裡可以影到東京鐵塔的，我哋乘大江戶線到大門駅，落車後 A6出口出，行約五分鐘就到增上寺。點知出了車站後，就見下著大雨，拿著雨傘一樣濕身，有些狠狽，在有點艱辛下，終於抵達增上寺，諗住影東京鐵塔，點知因太大雨的關係，東京鐵塔矇查查，而且寺內到處都係水氹，無乜心機行，希望下次有機會再嚟過。
今朝的早餐
都營一日乘車券，用完後可以留作紀念
電車嚟喇，坐二十多分鐘就到築地市場
築地市場駅內的壁畫，平時一落車就出閘，無細心欣賞過
影完壁畫竟然俾我哋見到車站紀念印，又多個收藏
築地市場內市場
廚刀專門店，這位叔叔好專心咁磨刀
多間寿司店門前都排長龍
條條龍都咁長，真係有排等，以前都想試下，但係要排成個幾鐘，我哋都唔打算係呢幾間食
波除神社
外市場的かんの，上次食過，一直念念不忘，所以計劃了年初二嚟呢度食開年飯
這位哥仔係度整緊我哋的魚生丼，好快有得食喇
白熊的是季節の海鮮丼 1500 円加味噌湯 100円，有海膽、牡丹蝦及幾款魚生，最好食的當然係海膽和牡丹蝦喇，海膽鮮甜到無得頂，牡丹蝦就十分鮮味彈牙。另外白熊同我果碗都多咗隻蟹鉗，係店員另外給我哋食的，隻蟹鉗好美味，唔係次貨嚟架
我就要了三種盛丼轉大トロ 1200 円加味噌湯100円，我碗都有海膽，唔～～，啲海膽真係好鮮甜呀！好幸福呀！
增上寺牌坊，過了這個牌坊行多一陣就到增上寺
牌坊旁有描寫江戶時代的石板畫
增上寺正門
嚟呢度就係影增上寺和東京鐵塔，可惜今天下大雨，個天矇查查，祇可以影成咁，有些失望
每間寺都會有的淨手處，不過真係唔知佢個名
詠唱發祥の地，乜野意思呢，唔知詠唱同佛寺又有乜野關係呢?
鐘樓
行返車站見到有個類似隧道既物體，大家又估下係乜野嚟呢？
哈哈～原來係地庫洗手間，這個洗手間除了比香港中環的那個靚好多之外，而且企係入口前都唔會嗅到臭味，四周又種咗啲植物綠化一下
行番到大門駅後乘都營淺草線到淺草駅，落車後行去東武淺草駅的觀光服務中心買17/2-18/2的日光鬼怒川世界遺產二日周遊券 3600円，這張二日周遊券包來回東武淺草駅至下今市，無限次乘下今市至日光、鬼怒川電車和日光市的世界遺產線巴士，並且包埋日光東照宮、二荒山神社、日光山輪王寺和大猷院入場費，計落都幾化算。中心內有職員懂普通話，溝通無問題，買票時職員話原來這幾日係日光鬼怒川為了慶祝中國新年假期大搞活動，有多個樂園半價優惠，而且咁啱 17/2 日光東武ワールドスクウェア（東武世界廣場）仲免費入場添，但係我地計劃咗 18/2 才到東武ワールドスクウェア，無著數，但無計！
買完周遊券已經下午二時多了，肚仔好餓，天仍然下著大雨，於是到雷門寺附近的有蓋商店街搵了間飯店食午餐，飯店內竟然遇上了一對香港人，連這間小小的飯店也遇到香港人，世界真係細。這間飯店的食物味道祇係一般，食飽後見到隔離間店舖有皮手套賣，睇過係真皮嚟，而且只係1050円，都幾抵，我同白熊所穿的冷手套頂唔住咁凍既天氣，對手成日都好凍，所以買了兩對皮手套係餘下的行程使用。離開商店街後，見個天仲落雨，都係早啲返酒店。
先乘都營淺草線到蔵前駅，然後轉乘大江戶線到東新宿，在蔵前駅轉車係要行番出地面，然後行幾條街先到大江戶線的蔵前駅，在蔵前這個地方有很多問屋，即係批發店，不過全部都不設零售的，趁要轉車，所以順便行下。
返到酒店休息一陣，就行下歌舞伎町食晚飯，好耐都無食拉麵喇，見到間ラーメン二郎門口排晒長龍，好似好好食咁，今晚就係呢間食晚餐。用自助購票機買咗飛，排咗一陣就有位，放張飛係枱面就會有人收，店員哥仔睇見我地個樣，就用英話問我哋來自邊度，跟住第個店員用日文問我哋野，我地做了個一臉茫然既樣，好彩有另一位哥仔聰明，指一指兜蒜茸，原來係問我哋要唔要加蒜茸，再等多一陣碗拉麵整好喇，呢兩碗拉麵係我地眼中已經係好大碗，但係見到隔離位日本俊男同美女既仲大碗，這間拉麵有些配料是免費加多，所以特別受日本男士歡迎，大件夾抵食嘛！我同白熊好努力都只係食咗一半，相比其他人食得乾乾淨淨，我地真失禮。食飽後就返酒店，明日去高尾山要早起，所以都係早點上床休息。
東武淺草駅
隔離就係松屋百貨
車站大堂
大堂內有指示牌指示東武觀光服務中心的位置
出了大堂行百多步就到觀光服務中心
找到喇～
買完周遊券，行返去車站，預先睇下係邊個月台上車
搞妥後就去咗呢間飯店食午餐
我的炸豚扒丼
白熊的玉子丼，一共 1460円，味道只係一般
轉車時在淺草線蔵前駅見到有紀念印，真開心
行去大江戶線蔵前駅時在途中見到一間玩具店問屋
有好多鐵皮公仔呀
呢間係賣模型的
門前放咗一包包好似辣椒的，唔知係乜呢
呢間係度大門度用中日英寫住不設零售，日本的問屋係連入去逛下都唔可以，每一間的門都沒有打開
蔵前神社，轉車時在車站內的地圖見到附近有間神社，所以順道行下
ラーメン二郎，今餐吃拉麵
呢間係用自助售票機，我同白熊都係食义燒拉麵 800円
這店係由幾位靚仔打埋，最後左邊果位叔叔應該係師傅，係度指導各人工作
有得食喇，這碗义燒拉麵除了麵多，芽菜多之外，就連义燒都多過人，义燒又厚又大件，淨食义燒食飽喇～
返到酒店影下啲戰利品，得好少咋
去日光鬼怒川的二日周遊券及優惠券和東武電車時間表
沒有留言 :
張貼留言