行程：酒店 → 鬼太郎茶屋 → 吉祥寺 → 中野 → 新宿 → 酒店
住宿：新宿アーバンホテル
早上八時起床，梳洗後食過杯麵後就出發，第一站到鬼太郎茶屋，先到京王新宿駅乘京王本線準特急八王子行到調布駅 230円，然後轉乘京王バス 14號巴士到深大寺 200円，落了電車後一出車站就見到巴士站，很容易找到。等等下巴士才發覺沒有足夠輔幣，於是到巴士站旁的百貨公司買小食，找換了些輔幣，便回到巴士站繼續等車，但這時才發覺原來是可以用Suica咭搭巴士的。跟著等了很久也等不到去深大寺的巴士，仔細研究車站旁的巴士路線圖，發現所有 14號巴士往不同終點站的巴士都會經鬼太郎茶屋，最後乘了去吉祥寺駅的巴士，在深大寺小學站落車，行約三、四分鐘就到鬼太郎茶屋。
今朝一直下著雨，在鬼太郎茶屋前影完相後就入去食野，順便避下雨，鬼太郎茶屋前鋪係賣紀念品，後面是日式茶屋，而且仲係榻榻米添，除了鞋，搵了位坐低後，就有位小姐拿了兩杯熱茶及餐牌給我們，點了野食後，就四周圍影下相，這時沒有其他客人，可以盡情咁影，影完相後食物剛好弄好，坐番低慢慢品嚐。
食完野就到前鋪逛逛，買完紀念品後，便去後面的深大寺行下，但個天一直無停過雨，搞到無乜心機行，行了一陣就打算去第二站吉祥寺。原本計劃係坐番巴士返調布，然後乘電車到吉祥寺，但之前乘搭的巴士是去吉祥寺駅的，所以就行返去落車的深大寺小學站，乘 14號巴士到吉祥寺駅 200円。
今日得 1 度咋，而且仲落雨，好鬼凍呀！
行去京王新宿駅時在新宿地下街的寿司店買太卷做早餐
315円的太卷，買後在京王電車上慢慢食，味道都唔錯
坐十幾分鐘車就到調布駅
為了找續到輔幣，在百貨公司買了中間的粟子飯 525円食
粟子很甜，好味
買完野食就返巴士站等車
在等巴士其間見到有架車身有鬼太郎的巴士，但原來係唔到鬼太郎茶屋，差啲上錯車添
車身有鬼太郎同佢既朋友個樣，幾可愛架
落車行三四分就到，深大寺及鬼太郎茶屋附近的地圖
前面就係鬼太郎茶屋，剛好有一團日本人到嚟參觀
好彩班日本人好快就走，咁我哋可以慢慢影相
鬼太郎樹屋，點解鬼太郎個臉咁肥嘅
鬼太郎和星君鼠，呢個鬼太郎個樣都係怪怪地
泊在茶屋旁的小車，外型有啲似豬仔
鬼太郎卡通其他的人物
古代の石臼，傳說向右轉會去到下一世，向左轉會回到前生，這個石臼在鬼太郎卡通片中曾出現過，被壞妖怪利用做壞事
白熊快啲伸個頭入去影番張相留念呀
影完相睇下有乜野食先
入到去坐底後好快就有位靚姐姐拿兩杯茶俾我哋
點完野食後就四圍影下相
呢幾本NoteBook係俾小朋友係上面畫公仔的
吊燈的開關
檯燈，有鬼太郎既肖像
あご野焼きかまぼこ 300円，食完都唔知係乜野，只知係用魚肉做，有啲似日式的獅子狗卷
砂かけ寒天 400円，紅豆沙加湯丸，紅豆沙比較甜，連埋無味的湯丸一齊食就剛剛好
白い一夜干し 300円，魷魚味道很淡，無池袋間居酒屋啲咁好味
鬼太郎作者生平
水木先生的手稿
洗手間指示牌，有需要的可以幫親下
食完野就睇下紀念品
買完後就到深大寺行下
路邊的小和尚石像
連啲花花都担遮，都幾搞鬼
深大寺前面的商店街，不過大部份都係食店
呢度出名的係蕎麥麵，不過有啲飽，食唔落
浮岳山深大寺本堂
銅鐘
地蔵菩薩
淨手啲地方
行上去睇下先，條斜好滑，要慢慢行，明明係右上左落，呢位姐姐就反方向行，真係....
元三大師堂
呢度有祈福活動
賓頭盧尊者
日本寺廟都會有的掛祈福木牌的架
臨走時買了個そば饅頭食
100円一個，明明寫住係そば，點解會係紅豆？
巴士行駛得好慢，約三十分鐘才到吉祥寺，落車後在車駅旁有間手袋店閉店清貨，好多原價二、三萬円的真皮手袋都只售3999円，真係好抵買。買完手袋後，就去Satou買牛肉球做午餐，今日不是太多人排隊等候，等了十五分鐘就買到。食飽後就到西友百貨行下，吉祥寺的西友百貨十分大，足足有五、六層樓，真係有排行，不過今次的主要目的是到園藝用品部買消毒剎蟲藥。
買完想買的東西，再逛一會便乘山手線到中野駅160円，落車後就行去Natano Broadway。這商場是賣舊玩具集中地，不過商場比較舊，玩具店舖很細間，故祇行了一陣就返新宿食晚餐。
Satou 門前排炸牛肉球的人龍，今日不是太多人
買到喇～個個都炸得好靚
食飽就去呢間藥房買馬油，去咁多間藥房，呢間最平
跟住行去街尾的西友百貨 Shopping
之後去中野睇舊玩具，裡面太暗，影啲相好矇
今餐晚餐選了到登亭食鰻魚飯，出發前已經在網上印了coupon，看看可不可以用。新宿登亭在新宿三丁目，在中野駅乘山手線到新宿駅後行約十分鐘才到，其實都有點遠。新宿登亭地下是外賣，二樓是餐廳，上到去時不是太多人，點了うな丼 1000円及うな重梅1300円，其實兩樣都是鰻魚飯，祇是鰻魚的份量不同，問了侍應，知道原來張coupon祇可以大盛飯，即是多啲飯，細食的我當然不用加大喇，於是祇是其中一款要了大盛。這裡的鰻魚很肥美，和香港的真是無得比，不過講真食得多幾件都幾膩，食飽後就返酒店休息。
新宿三丁目的登亭
餐牌有中英日韓五種語言，點野食好方便
今晚唔係好多人
うな丼 1000円，有兩條大大條的肥美鰻魚，飯係加大的，所以比較大碗，正常得半碗飯咋
うな重梅1300円
今日的戰利品
沒有留言 :
張貼留言