第 九 天
日期：2009年1月31日(星期六 年初六 間中有雨)
行程：酒店 → 上野 →成田空港 → 香港住宿：香港五星級的家
今天瞓到八點幾才起床，執好行李十點多就 checkout。今天是在東京最後的一天，原本安排了半天的行程，但是昨天看天氣報告話今天有雨，拖住兩個大喼好唔方便，所以取消了原本的行程，決定直接去上野食早餐。
在新宿乘山手線到上野駅，幸好今天是星期六，車站不是太多人，拖住兩個大喼都唔係太麻煩，但是日本的車站唯一缺點就是缺少扶手電梯，要做咕喱才可以上落車站月台乘車。
到了上野駅後看清中央出口方向才出閘，出了閘後行去まぐろ市場食早餐，幸好間食店內旁邊有好多空間，可以放得落兩個大喼，坐低後點了兩碗魚生飯食，唔知係咪心情影響，同埋d魚生剛剛由魚市場運嚟（我估的），所以覺得今次的魚生特別鮮味好多。
一早就食成碗飯，真係好飽，之後就行去百果園買士多啤利做手信，600円一盒的睇落好靚，於是買了四盒。回港後食過才知原來不是太甜，真係有點失望，下次真的要食過才好買，睇個樣未必信得過。
買完手信約十二點就乘京成特急去機場，因為下雨的原因，覺得早點去機場 checkin會較好，到了京成上野駅後，用埋西瓜咭的餘錢買車票，跟住就入閘向機場出發。由上野駅去京成空港駅要個幾鐘車程，約二點半才到機場T1，去到西北航空公司的櫃台前辦 checkin手續，原來這裡也是用了自助 checkin機的，程序同香港有少少唔同，好彩有位空姐幫手，好快就辦妥手續及寄埋行李，可以慢慢行下機場了。
成田空港 T1嚟過幾次，不過次次都係辦妥手續後就急急入閘過海關，今次可以慢慢行下。原來 T1真係好大，除了有個好大的商場及 food court 外，仲有個露天的觀景台，可以睇下飛機添。
今日的午餐就在機場內的烏冬店食，本來在店前睇過d食物模型時已經決定了要乜野，但是入到去看餐牌卻找不到想點的那兩款，怪怪的，祇好帶埋待應行返出店前手指指點野食，好彩呢招都掂。這裡的烏冬十分彈牙，而d湯十分清甜，味道一流，食飽飽行多一陣就過海關了，雖然海關有好多人，但是效率幾快，不用半個鐘就 OK。
在機場免稅店最後衝刺，買了些和菓子做手信，之後就去登機閘口等上機，但是到了登機時間仍未有得上機，聽到廣播話會 delay喎，結果遲了大半個鐘才可以上機。唔知乜野原因，班機已經係遲咗起飛喇，但係去到香港仲比預定時間早到，唔埋喇，可以早d返屋企就唔理咁多，好快就辦妥入境手續及攞埋行李都只係十點，正～香港～我返嚟喇！
出發前先幫兩個喼著番件雨褸，唔好淋濕身呀
今日都係好凍，朝早得 6 度
這是上野駅內的便當店，睇落好好食喎
まぐろ市場冬季推介
我哋就要了這兩款
上野百果園賣的士多啤利，睇落好靚好紅，點知 ......
包得好好，手提上機唔怕會爛
上車前買支奶茶飲下先
由上野駅去成田空港車費 1000円
到站喇呀白豬，唔好瞓喇
這裡也是用自助 checkin 機的
機場商場內好可愛的招財貓公仔
這裡找到日本限定版的 KitKat，這隻是綠茶味，本來想買嚟做手信，但係買了一盒仔試下好唔好食喇，點知 .... 竟然係溶溶地，比室內的暖氣暖溶咗，所以就無買到禮盒裝。
T1 的觀景台
這裡好大，仲有櫈坐添
可以睇飛機睇得好清楚架
原來呢度有牛奶妹喎
在便利店買了杯凍咖啡，飲落幾好飲
午餐就在這間烏冬店食
我點了這兩款唔知全名係乜野的烏冬食
在免稅店內的摺紙擺設
好利害呀
仲有埋女兒節公仔添，真係乜野都可以摺到
見到好靚，我都買番 d 嚟玩下
招財貓摺紙公仔
買完仲幫我包得好靚添
本來 16:50 開始登機，點知..... 遲咗好多先可以上機
等咗好耐都無得登機，黑白豬等到瞓著咗
成田空港名物～空水
真係乜野都可以係限定名物
過關係唔可以帶水之外，連上機都唔可以，好彩在登機閘口附近有好多飲水機
飛機上派的小食
睇落幾好味喎，我唔客氣喇
飛機餐
味道都係一般
返到屋企後同 d 手信影下相先，好靚但唔係好甜的士多啤利
日本和菓子及貍貓公仔
第 八 天
日期：2009年1月30日(星期五 年初五 全日有雨)
行程：酒店 → 豪德寺 → 原宿 → 恵比寿麦酒記念館 → 新宿
住宿：新宿アーバンホテル
明天要回香港了，今天打算悠閒d行下街街，約八點幾才起床，十一時出發。落到大堂交鎖匙外出．接待處的男職員對著我們說了一連串日文，再望向街外，原來正在下雨，再回頭已見那男職員遞上兩把雨傘，真細心啊！為了方便，我們借了一把雨傘，謝過他後，開始出發。
第一站是去豪德寺拜下招財貓，由新宿去乘京王線，在下江井戶駅落，然後轉乘東急世田谷線，在宮の坂駅落車，行五分鐘就到。約十二點去到豪德寺，但是裡面竟然一個人也沒有，大殿關了門，招財貓殿也沒有開放，心想雖然落緊雨，但是無理由沒有人呢？四處找也找不到開放時間的告示，雖然大殿沒有開，但可以在寺內的庭園四處走動，於是行下影下相，享受在雨中行寺廟的那份寧靜感覺。逗留了一陣，便離開向下一站出發。
這把就是酒店職員借比我哋的溫馨雨傘
這幾天在JR站都看見木村拓哉賣電話的海報，成個鬼太郎咁樣，忍唔住影低佢
而家習慣一到月台就睇下個車站顯示牌，唔～係 2番號月台上車
東急世田谷線的電車好似都電川荒線的電車呀～
車廂內得好少位，而且乘客中比較多老人家，所以d人多數有位都唔坐
到咗宮の坂駅，白豬準備落車喇
個車站似唔似都電荒川線的車站
出了車站行幾分鐘就到豪德寺喇
招財貓商店，應該無去錯地方
日本寺廟好似都必有個塔
香爐，好特別
有香可以拜神喎，有無火呀
有呀，呢邊有火機呀，真係好細心，可以拜神喇
拜完神就周圍行下，真係一個人都無
大殿後面就係招財貓殿，但係一樣關了門
殿前的守護貓，好神氣
影下殿入面先，原來裡面有好多招財貓
好靚的舊式日本庭園
成棵樹開滿紅色的花，唔知係乜野花呢？
下一站是去原宿的『くろべこ亭』食日本黑毛和牛扒，原來計畫是行去豪德寺駅的，但是因下雨，所以就乘東急世田谷線，在屸下駅落車，跟住行去豪德寺駅乘小田急小田原線，在代々木上原駅落車，然後轉乘東京メトロ千代田線在明治神宮前駅落車。
可能真的轉車轉到暈，竟然早了一個站，在代々木公園駅落咗車，出了車站後看到陌生的街道，一點也不像原宿街頭；看過地圖及行程表後，才知早了一個車站落車，原來諗住一個站應該不是太遠，打算行去，但是因個天仍下著雨，而且擔心再行錯路，所以決定行返車站坐多個站安全d。
坐多一個站後終於到明治神宮前駅，一出車站就係表參道，行一陣約 13:50 就到 くろべこ亭，可能因為過了午餐時間，所以有好多空位，不用等位。坐低後點了 Told you 瘋推介的 980円 免治和牛漢堡扒及另一款漢堡扒，另加飯要加錢 200円，個扒好嫩好多汁。
在山下駅一落車行過對面車路就係豪德寺駅
(T_T)....落錯車
，又咁啱張西瓜咭唔夠錢，所以唯有買飛，搭一個站要 160円
原宿路邊的大電視屏，剛剛做緊天氣報告，全日下雨率有九成，唔怪得成咁落無停過喇
くろべこ亭是在裏原宿的橫街內，其實唔難搵，過了明治通り，第二個路口行入去就係
有好多款和牛漢堡扒
教人點煮的方法
兩款不同的扒，主要分別是用不同的汁
食完飯後就去下一站『恵比寿麦酒記念館』，在原宿乘山手線，在惠比寿駅落車，出了閘後要行一條好長的天橋才到，好彩有自動運輸帶的幫助，唔係真係有排行。
恵比寿麦酒記念館是在惠比寿ガーデンブレイス，到了後看了地圖就繼續行程，行咗一陣，見到個指示牌，入咗座大廈，但又覺得一d都唔似記念館，好快就有位接待員見到我地茫然的樣子，由接待處行出嚟問我地是不是去記念館（睇怕有好多人都行錯過），她告訴我地記念館是在地庫，係右邊落樓梯才是，行返出去後依指示行，一落樓梯就見到好大嘅啤酒罐，就知到了記念館。
恵比寿麦酒記念館是免費入場參觀的，裡面介紹日本啤酒發展史及釀酒過程；行完後就去行隔離的三越百貨，對於我哋來說，食品部比較有吸引力，買了些飲品食物作下午茶。吃過下午茶後成個生猛晒，不過個天好快黑，未夠五點就回程返新宿，
返到新宿後見仲早就行下百貨公司，跟住行咗去 100円店買零食，在日本的 100円店的零食很多款式可以選擇，而且仲係很好食添，買嚟做手信一流（不過要買日本製及香港吉吉島10蚊店沒有得買的），不過行咗一陣又有點累，但食飯又太早食唔落，唯有到金太郎買魚生飯外賣返酒店，稍作休息後才開餐食飯。
山手線原宿車站
出了恵比寿駅後跟住指示牌方向行，我們的目的地是『恵比寿ガーデンブレイス』
恵比寿ガーデンブレイス內全是紅磚建築物
三越百貨
好古怪的石像
見到這個牌仲以為係記念館，原來係跟下面箭咀行30M落樓梯就係
一見咁大嘅啤酒罐就知呢度係麦酒記念館
掛在牆上的巨型藝術錭像
展覽廳入口就在這三個巨型啤酒罐右邊
釀酒機的儀表，睇落去真係好複雜
有好多部的電視播放日本啤酒的歷史
三船敏郎呀，佢係唯一一個男明星同這間啤酒公司賣廣告的，其他的都是啤酒"女郎"
馬越恭平先生，佢係這間啤酒廠的開國前社長
在三越百貨內見到的巨型士多啤利（200円一個）真係好大個呀～
下午茶，買了這枝酸奶，超濃奶味，好好飲
睇落去呢d炸包好好食，是旦點了中間果隻肉包
雖然係凍咗，但係真係好好食
金太郎的外賣魚生飯，少咗味噌湯送，堂食就有
返酒店抖咗一陣，開餐喇
今天全部是食的戰利品，而且仲係 100円店買
