11年 新春九州十五天自駕遊 Day 3

日期：2011 年 1 月 31 日 (星期一、年廿八、多雲、間中有陽光)
行程：酒店 → 取車 → 下関唐戸市場 → みもすそ川公園 → 和布刈公園第二展望台 → 門司港 → 九州鉄道記念館 → 酒店
住宿：東橫inn小倉駅南口 6,384円 (原價 7,980円，會員八折)
租車公司：JRの駅レンタカー
租車費用：51,070円 (49,500円+雪鏈1,570円)
高速收費：博多至唐戸市場 2,950円
　　　　　下關至門司港 150円
　　　　　門司港至小倉 500円

　　今日七點就已經起了床，梳洗後就到二樓的餐廳食早餐，今日的早餐同昨天的一樣，沒有改變，我同白熊都要了燒魚早餐，食完返上房執好行李後就 Checkout，出發到博多駅取車。我們預約了早上9:00取車，早到是沒有問題，但遲到就要預先打電話通知，若過了預約時間一小時又無通知，則會被取消租車預約和罰款。

　　我們約08:20 就到車站的總合案內所辦手續，原來間JRの駅レンタカー並不是在這裡，而係在隔離的新幹線博多ビル四樓的駐車場內，案內所的小姐給了我一份地圖，指示點行去。

　　我哋依地圖行，不用兩分鐘就到，入到去辦手續，十二天租車費連保險雪鏈 51,070円，租車公司規定一定要用信用咭付款，付款後我們便去取車，佢哋俾了架豐田 VITZ 1000cc，而且仲係新車嚟添，好開心呀。

　　在辦手續時職員知道我地啲日語非常麻麻地，而佢地啲英語就比我地啲日語更麻麻地，故立即打電話到案內所找了個懂英語的女職員上來翻譯，職員教了點用部 GPS和雪鏈後就可以出發喇。

　　職員打開了駐車場個閘等我哋離開時，點知我呢個大鄉里搞出咗個笑話，開車前想用手較下側鏡時，點知發覺好實郁唔到，點算呢？只好向職員求助，這位職員又要走番埋嚟教我點較個側鏡，真係唔該晒，ありがとう；原來塊鏡係電動鏡嚟架，真係大鄉里，OK喇，可以出發，但係離開車場時要行一條好窄的旋轉斜路才可以到地面，條路真係好窄，好彩我揸部車都幾細，拖住個 Break 好小心慢慢行，終於安全抵達地面，個心安樂晒，可以起程，第一站我地係由九州福崗県到本州的山口県下関唐戸市場（Tel：083-231-1440 / 083-231-0001）。

今朝唔係好多人，我哋坐張大枱


呢間房好有日本 feel




我同白熊都係點了燒魚早餐，所以兩份早餐都係一樣




在博多駅辦租車手續後，由筑紫口一出轉右就見到新幹線博多ビル，入到去乘升降機到四樓


一出就見到JRの駅レンタカー指示牌


到喇，入去辦手續先


呢十二日我哋就係坐呢部豐田 VITZ 1000cc，而且仲係新車嚟架

雪鏈，裡面仲有說明書添，唔怕唔識用


　　離開車場後跟住個 GPS 指示行，行行下個 GPS 叫我轉左，當時我正在路口，咁咪聽佢話轉左囉，點知行咗去條很窄嘅橫街，結果要兜個圏行多次，終於可以行番正確嘅路上有料高速公路，在高速公路入口的博多駅東料金所要先付 600円，在途中的 IC再取通行券，離開高速在下関 IC再付餘下的費用 2,350円。

　　由於已經多年沒駕車，所以不敢揸得太快，只係行 70~80km，再加上在中途的 SA休息下，所以比GPS預計的時間慢了差不多一個鐘才到目的地，好彩編行程時已預計了會這樣，所以將行程修改了少少，唔好令行程太趕，今日只係去下関和門司港，時間就鬆動好多。

　　11:20到了下関唐戶市場，在天台泊好了車後就乘電梯到地下，諗住可以大食一番時，點知見市場內大部份店鋪都沒有營業，真係好鬼死靜，同在網上看到情況真係天淵之別，明明看過官方網站，今日不是休息日架，點解會咁呢？返港上網查過，原來有壽司魚生買的叫活きいき馬関街，營業時間係星期五、六 10:00~15:00，星期日、假日 08:00~15:00，今日係星期一，條活きいき馬関街休息，無野食。

　　影完相後諗住行去隔離的舊市場カモンワーフ搵野食，見到有一間食店有燒蠔食，3隻都只係 500円，所以午餐就決定在這裡食，點了燒蠔外，還點了兩款丼，等了一陣就有得，啲燒蠔好美味呀，正～食飽後就在附近行下影下相，約12:45 就離開唐戸市場，我呢個大鄉里又有問題出現，點俾停車場費呢，在市場內都唔見有收費櫃位，點算好呢？最後行到出閘位睇吓啲車點出閘，喎～原來係自助收費的，日本真係乜野都自助，於是上番車駛到出閘口，將駐車券放入部機度，跟住就顯示幾多錢，將錢放入部機就得，部機會自動找錢，如要收據的話，只要按一下個「領收書請求」，佢就會印張收據出嚟；呢個停車場每30分鐘收120円，我哋泊了兩個鐘，一共 480 円。

今日的行程路線圖


有料高速的通行券，要小心保管呀，唔見咗就好麻煩

行去唐戸市場途中在古賀SA 休息下


呢度好多野食呀


関門大橋


在下関IC離開有料高速，高速收費一共 2,950円


唐戸市場停車場入口


入閘前先取駐車券


駐車券


唐戸市場


呢度嘅名物～河豚


魚市場內部，後面的就係賣壽司魚生的活きいき馬関街


離開市場後行去カモンワーフ時，在海中見到開去門司港的船

有個影相畫板，白熊，我哋又影囉，不過白熊唔啋我，只好影下塊板

對岸的就係海響館


海邊也有幾隻河豚


カモンワーフ 西1F，呢度有好多食店，真係有排揀


最後就在這間関門屋本鋪食午餐


點解係呢間食，就係俾啲蠔吸引住，500円3隻，唔算貴


落了單後店員俾了個牌我哋，要等一陣先有得食


有野食喇～白熊的係地魚海鮮丼 1,000円，啲魚生好新鮮美味，好好食呀


我的就係よくばり丼 780円，即係三款炸魚飯，乜野魚，真係唔知，不過啲魚真係好有魚味，炸得又脆，一樣好好食

焼き牡蠣(碳火燒蠔) 500円 3隻，啲蠔好肥，但係佢就落咗啲醬油一齊燒，比較咸，不過啲蠔真係好好味


食飽飽後就在附行下，碼頭停泊了開去門司港的関門汽船，如果唔係揸車，可以搭呢架船來往門司港和下関


去巌流島的碼頭


架船既顏色又得意，仲以為係消防船添


下関南部町郵便局，建於明治33年(1900年)，係現存最古老的西洋建築


旧秋田商会ビル (下関観光情報センター)

亀山八幡宮


在唐戸市場旁邊座「ふくのフクロ競り」紀念像


係呢度影関門大橋都唔錯


停車場出閘的自助收費機


　　離開唐戸市場後到みもすそ川公園（Mapcode：16 775 421），約五分鐘車程就到，架車泊在公園對面的関門トンネル人道的無料停車場，泊好車後就到公園內影相，みもすそ川公園內有五磚幕府時代的下関攘夷戰爭時用過的長州砲，而且仲係一個影関門大橋的好地方，不過今日真係好大風，好凍，所以影完相後就離開，出發到下一站～和布刈第二展望台（Mapcode：16 746 520）。

　　由下関過去門司港我哋今次行関門トンネル隧道，隧道費 150円，不過仲未識點睇個 GPS，結果又行錯了路，兜了幾個圈後，好彩最後都可以行到正確嘅路過去門司港，去布刈第二展望台要行條又窄又多彎的山路，不過好彩係單程路，唔怕有對頭車，只要慢慢行就可以，布刈第二展望台係可以睇到門司港和下関的全景，而且仲係影関門大橋的超正地點，不過呢度比みもすそ川公園仲要大風，真係凍到個人成條雪條咁，影相時仲凍到隻手不斷咁震添，所以啲相差了一點，影完相後就立即番上車暖下，跟住出發到～門司港。

架車泊係関門トンネル人道入口旁的免費停車場，關門海峽人行通道就是連接本州下関和九州門司港行人的海底隧道，要搭電梯落去地底，兩邊入口都有紀念印，不過我地揸車去門司港，所以無行


對面就係みもすそ川公園


源義経像，即牛若丸


平知盛像


大河電視劇「義經」扮演源義經角色的滝沢秀明手印

大河電視劇「義經」扮演平知盛角色的小泉孝太郎手印

公園內有條橋，但係呢度無河喎，原來係御裾川橋嚟


長州砲


另外四磚長州砲




関門大橋


到咗和布刈第二展望台，山邊有幅高3米寬44米，用了 1400 多塊有田燒陶瓷板組成的壁畫名為「源平壇之浦合戦絵卷」

門司港全景，最高的就係門司港レトロ展望室


下関，最高的就係海峡メッセ


関門大橋




　　行到門司港本來打算係門司港駅附近的停車場泊車，點知去到車站附近，因這裡有好多條橫街，個 GPS 指示又有些問題，行了好多次都行唔到去個停車場，在兜圈時見到門司港レトロ駐車場(Mapcode : 16 715 449) 指示牌，無法喇，我哋跟住個指示牌行，最後將架車泊咗去門司港レトロ展望室附近的停車場。

　　泊好車後就在門司港レトロ展望室附近影下相後，跟住就行去門司港駅，門司港駅於大正3年(1914年)修建，是九州最古老的火車站，典型的歐洲新文藝復興時期風格的木造建築結構，是日本國家重要文化遺產。

門司港レトロ駐車場，我哋就係泊係依個停車場


人力車，個車扶見到我哋影佢，以為有生意，行埋嚟兜生意，不過見我哋無乜反應後就無再行，就行番埋架人力車度


旧門司税関


港ハウス，裡面有好多手信賣架


国際友好記念図書館


図書館的背面，這裏地下是食中國菜的餐廳～大連あかしあ


海峡プラザ


香蕉人呀


隔離有個塊紀念板，一家大細可以一齊影

呢位伯伯係度做乜呢？原來係公仔呢架，係同裏面一間手工藝店賣緊廣告


門司郵船ビル，建於 1927年 (昭和2年)，旧日本郵船門司支店


旧門司三井倶楽部




門司港駅


「切符賣場」是售票處的舊有稱呼，現在裏面係旅行社，JR綠色窗口就係裏面


門司港站是鹿兒島本線的起點車站，在車站內可以看見一個"0 哩"紀念石碑，是1972年為慶祝日本鐵路開業100周年而建，石碑前面有一個幸福の泉，泉水前是一個幸福の鐘．如果入去車站可以影得清楚啲


現在的售票處


洗面所，唔知點解會有個淨係洗面地方，係唔係淨係可以洗面呀？其實係日本舊有的稱呼，是洗手間


「帰り水」～當初建設車站時就開始使用的自來水，不管是戰前的歸國者，或是戰後被遣返回日本的人，他們在門司上岸後都會先飲用這裡的水來解渴


男女洗手間中間的洗手盆，叫「幸運手の水鉢」，青銅鑄造，與車站同年建成




火車個車輪呀，真係好大個


　　行完後就行去九州鉄道記念館，入場費 300円，在記念館入口停泊多部古老火車頭，不過我哋先去本館行下，行完本館後就去坐小車火，在網上搵資料時知道這裡有得駕駛小火車，當然不可以錯過喇！坐小火車每架車 300円，可以坐三個人，買了票後就到月台乘小火車，月台上有兩架小火車可以揀，我哋揀了72系ゆふいんの森，服務員教我哋點駕駛，原來只係可以拉個控制捍開車同停車，其他的制係唔可以搞的，開了車後架車會自動行一個圈，速度十分慢，返到月台後服務員叫我哋把控制捍拉下停車，架車就會慢慢停，雖然全程只係得兩三分鐘，不過都幾得意，幾好玩。

　　影埋入口的火車頭後就離開，跟住行去音樂藍橋ブルーウイングもじ，全長 38.5M，係日本最長的行人專用活動升降橋，點知條橋維修封咗，無得行，在附近影下相後就行去停車場，呢個停車場收費每小時 200円，出閘時亦係自助收費的，我哋泊咗兩個幾鐘，多謝 600円。今日停車場費一共俾咗 1,080円，加埋來回過海費300円都只係 1,380円，都平過坐関門汽船來回費用。

車站旁有九州鉄道記念館的指示牌


九州鉄道記念館，個入口旁的就蒸汽火車頭嚟架


買了入場券 300円，入場後先到本館參觀


一入本館就見到有幾個公仔，顯示當時人民乘火車的情況


火車內部


跟住上二樓睇其他展品，這些是各種車票




火車站用品






九州火車頭前面的標誌牌


落番地下，行到尾有個大型的九州鐵路火車模型


估下呢度係乜野嚟呢？


原來係火車模擬駕駛遊戲，仿照811系列火車

在指定時間由門司港到小森江


開始喇，好有真實感，成架車會有些郁，幾好玩架，不過到最後開得太快，過了車站才可以停到車，GAMEOVER


玩完就去ミニ鉄道公園坐小火車


售票機，每架車 300円，最多可以坐三個人


乘車券


72系ゆふいんの森，我哋就係坐呢架小火車


控制捍，原來只係可以控制左邊的，推上就開車，拉下就停，好簡單


開車喇，好似真係揸緊火車咁喎，都幾得意


坐完小火車，行番去入口處，果度有好多古董火車，呢架係59634，1913年製造


C591，1941年製造


EF1035，1941年製造


ED721，1961年製造


E0741，1937年製造


這架火車可以入內參觀的，不過要除鞋換上拖鞋先可以入去


車廂內部


クハ481-603，1969年製造


睇完火車後行去音樂藍橋ブルーウイングもじ，不過維修唔可以過橋，只好影下條橋，原來係呢度影門司港レトロ展望室都幾靚喎




関門大橋


影完相後就回程行番去攞車，在海峡プラザ前海邊影下個門司港レトロ展望室，好靚呀，我的技術又幾好喎


見有些餓餓地，入咗去海峡プラザ小食店買野食

有好多款魚餅，先炸後蒸，同香港的煮法好唔同


有得試食架，食完覺得幾好味

我哋買了えび天(炸蝦餅) 210円和たこネギ天(燒章魚葱餅) 210円，味道唔錯，好濃魚味，不過只係覺得食緊魚餅，至於蝦味和章魚味就好淡


　　約4:45p.m.離開門司港，出發到今晚入住的酒店～東横イン小倉駅南口（Tel：093-511-1045），去小倉選擇行有料高速，預計需時二十分鐘，在 IC入口要先付 500円，上到高速時原來係向正個太陽揸車，咁就大鑊，之前個車頭玻璃已經有好多污漬，但係部車的車頭水撥噴水竟然係無水出，唔可以清洗下塊玻璃，依家唔知點解個車頭玻璃比之前仲矇好多，要好小心咁揸；過了隧道後部 GPS 就叫我轉左出IC，但係一出了隧道就錯過了個路口，要等下個路口先可以離開高速，好彩行咗一陣就有第二個IC出口，如果唔係都唔知兜幾耐先到酒店。

　　去酒店時又有問題，都係唔熟部GPS，所以過了酒店先知到了，又要兜一個圈先可以行番到酒店，將架車停在停車場前，攞埋行李去 Checkin，辦手續時酒店職員問我哋要唔要入會，並搵張單張給我哋睇，現在優惠推廣入會費由 3,000円減到 1,500円，星期日和假期有七折，而星期一也有八折，所以今日入會即時有八折優惠，比埋入會費和今晚房租都只係要 7,884円，比原本酒店房租 7,980円還平，加埋泊車費 500円，一共 8,384円。

　　今次係第一次住東橫Inn，以往都知佢係好平又好受港台自由行歡迎，但每次想預訂都訂唔到，因為會員可以六個月內訂房，非會員則只可以三個月內，雙人房又不多，加上我多數在旺季時預訂，今次訂到都幾好彩。九州大部份東橫Inn都設有立體停車場，車位以先到先得，有少部份因車位數目不多，需要預約；所有的東橫Inn 都有提供免費早餐，晚餐我就搵到佐賀駅前的東橫Inn有包，不過係食咖喱飯。東橫Inn的網頁有多種語言，有詳細列出各酒店有啲咩野提供，而接待員都懂英語，溝通無大問題。

　　辦完手續後職員取出泊車咭，跟住問我識唔識點泊立體停車場，我就擰頭話「初めて」，佢就拎埋張泊車咭同我出去，一路搞部機，一路教我點泊，用泊車咭泊原來很簡單，只要把車咭放埋部機度do一下就得，等分幾鐘佢就會開門，將架車泊入去就可以，到適當位置時會有燈號提示，十分容易；不過入去之前一定一定要記得將架車的兩邊側鏡收埋，唔係就好大鑊，取車時就會唔見咗塊側鏡，緊記！泊好架車後就按關門制，再張咭放入「カード投入口」，敢就搞掂，係唔係好簡單呢！

　　上到房放低行李後就行去小倉駅食晚餐，不過搵唔到啱心水的食店，最後在吉野家食，返到香港在網上睇番資料，原來在車站二樓有條食街小倉ひまわり通り，有好多野食，我哋當時只係行咗地下同地庫，無行到上去，食飽後買埋宵夜就返酒店休息。

今晚入住的酒店～東横イン小倉駅南口，車場入口在酒店左邊，即係個藍色 P 字牌直入


酒店度大堂有免費電腦和列印機，最好的就係有埋白紙供應


還有飲品自動售票機，明天早餐就係這裡食


有齊晒咁多間東橫Inn 的資料咭


我哋住的房間～雙人床(ダブル)張床比早兩日的Sunroute Hotel Hakata大好多，可以唔使訓得咁迫


間房設備都好齊全，有鐘、電視、風筒、雪櫃、加濕機、電水煲和夾萬，當然還有條寬頻線喇


好大部加濕機，原本部電水煲已經有加濕功能，不過天氣咁乾燥，用部咁大部嘅就唔怕喇


洗手間，都係細細間


今日的晚餐～吉野家的牛丼 380円，加味噌湯和沙律 120円


豚丼大盛 430円


返酒店途中見到呢間麵包店啲麵包個樣好好食咁喎，買咗兩個麵包做宵夜


今晚的宵夜，果汁、雪榚，同埋之前買的麵包(紅茶包 100円和蜜瓜包 70円)，紅茶包有好重紅茶味，至於個蜜瓜包呢？一啲蜜瓜味都無，反而個樣同味道仲似香港的菠蘿包