行程：酒店 → 柴又 → 谷中銀座 → 上野 → 新宿 → 酒店
住宿：新宿アーバンホテル
今天是大年初一又是情人節，原本想去築地食餐好野，點知剛好今日是築地的例假，所以就決定去柴又，順便拜神。早上八時起床梳洗，食過杯麵早餐便出發。先在ＪＲ新宿駅乘山手線到日暮里 190円，跟住轉乘京成線到柴又駅 250円，在網上搵資料時明明可以直到柴又駅的，點知去到日暮里才知要在京成高砂駅轉車，不過轉車都好方便，祇是到對面月台就可以。
11時半左右到達柴又駅，一出車站就見到寅次郎銅像，這個銅像十分出名，好多到柴又觀光的日本人都會同佢合照，寅次郎其實係日本在1965年上映的電影男はつらいよ的男主角，之後一共拍攝了四十多集，柴又便是其中一個拍攝地方，和銅像影完相後就行帝釋天參道，帝釋天參道兩旁全是出售當地特產及紀念品，而且今日又係星期日，所以很熱鬧好多野睇，行完後就到帝釋天。
今日係大年初一和情人節，啡白熊一早就嚟個 Morning Kiss
今朝的早餐～杯麵及蘋果汁
早上有四度，暖番少少
日暮里駅內的京成本線月台，這個月台係新建的，以後在日暮里轉車就不用做苦力了，我哋會乘搭 10:58 的電車到京成高砂駅
到了京成高砂後落了車到對面月台轉車就可以，下班車開 11:30，搭一個站就到
這些燈很特別，應該係以前用來指示下班車的終點站，現在雖然有電子板，但這些燈亦同時運作
在車站內的帝釋天的廣告
我哋就係乘搭這架電車到柴又
柴又駅，一個十分古老的車站，橫過路時要小心
柴又駅，這是唯一的出入口
柴又附近的地圖，研究下先
寅次郎銅像，一出車站就會睇到
車站前的小食店，都幾好生意喎
觀光案內所，入去拿啲資料先
跟住行商店街
這間店除了有紀念品賣之外，還有麵包出售
可能今年係虎年的關係，有很多老虎公仔
行行下見到有小販賣烤魷魚，同香港的一樣做法，烤熟後就用部機壓薄
佢會分魷魚身 400円和魷魚腳 100円賣，我哋買了包魷魚身試下，魷魚壓得太薄，味道比較淡，要一次食多啲先覺得好味
賣小食串燒的食店
機械人自動汽水售賣機，咁搞鬼，真係好有創意
帝釋天參道，行到尾就係帝釋天
牌坊旁有個籤架，附近又無寺廟，點解呢？
籤架旁有個石碑，唔通係拜佢？
馬路旁的鰻魚飯店
單看這幡就知佢係賣鰻魚喇～
商店街內有很多寅次郎的產品
關東者煮，好似好好食咁喎，搞到好肚餓添
天丼店，唔好睇佢鋪頭好簡陋，價錢都幾貴，以前食過，覺得天丼好膩，唔係好啱我
哇～好多燒餅呀，真係乜味都有
這間就賣漬物，等我試食下先，我最鍾意係酸羅白，不過都係留番係香港先買好啲
燒草だんご，即係燒日式湯丸串，上面加啲綠色粉末，無食到，所以唔知係乜野嚟
這間都有好多野食賣
買咗燒芋 150 円試，燒芋其實係煎芋先啱，甜甜地，都幾好食喎
呢間就有蝦仔魚仔，只係試過蝦仔，無乜味，但係見到好多日本小朋友不停咁食啲魚仔，唔通好好味？
啊！呢度竟然有間青蛙專門店，鍾意青蛙飾物公仔的不要錯過
這間出售祈福用品，日本人都係好鍾意用達磨來祈福
帝釋天二天門，唔知因為今日有節慶定係是星期日的關係，寺前有好多小販攤檔
屋簷同中國的古建築很似，不需用一口釘的
原來日本人也很喜愛食棉花糖的
大判燒，即係台式紅豆餅
另一邊仲有兩檔喎
呢檔賣柴又燒き 300円，睇落幾好味喎
買咗件試下，都幾好味，唔錯
寺的圍牆上刻有好多人名，之前到過的寺廟都見過，應該係捐咗錢比寺廟，就留個刻名紀念
食過野就開始參觀帝釋天
入口頂貼有很多祈福的貼紙，這是日本寺廟的特色
龍形木雕，為了保護古蹟，上面加了鐵絲網
主殿帝釋堂
堂前種了棵外型很特別的松樹
原來叫瑞龍松，唔怪得咁似條龍喇～
大鐘樓，高 15M，建於昭和30年，由名匠林亥助棟梁所製造
御神水，今日有好多人嚟拜神
淨行菩薩，淨手後就幫佢淨身，見到有些人不單只用水沖身，仲會幫佢刷身添
這裡所用的神水係來自松樹根附近的靈泉湧出來的泉水
遠睇真係唔知係乜野，行近先知係雙頭白蛇，最後用神水同白蛇淨身就完成
帝釋天差不多有四百年歷史，而且地方又大，真係有排行同影相，影完相後約下午一時多就到寅さん記念館。跟住指示牌行，經過山本亭及穿過公園後就到柴又公園，寅さん記念館就在公園內，我哋先到公園行下，柴又公園建在河堤上的，行上小山丘後發現這裡的風景很靚，於是坐低休息一下，享受這樣休閒舒服的環境。
休息完就到寅さん記念館，記念館入場費要500円，而我哋唔係佢的粉絲，所以無入場只係在館前影下相就回程，在記念館前睇過地圖後，選擇了另一條比較近的路返帝釋天參道，行到帝釋天聽到寺廟內有很多笑聲，於是入去睇下，原來是有猴子表演，行埋去想睇下時剛剛完結。跟住沿帝釋天參道回程，打算去商店街買手信，並且諗住搵間食店食午餐，點知搵唔到啱心水的食店，只好在商店街買了些小食，約下午三時就返柴又駅乘京成本線到日暮里 250円。
香爐，撥啲煙係身可以保平安，白熊，快啲撥喇～
帝釋堂木窗上刻有各種動物圖案
賣祈福用品的服務台
後面有三隻非禮勿視勿聽勿講的石猴子
旁邊有個外型很特別的銅像，三個孩童抱住個盆，唔知乜野意思呢？
南天門
釋迦堂
旁邊的兩尊佛像
要除鞋才可以進入帝釋堂和本堂參拜
兩個堂中間有條木橋連接，而且還可以通去後面
原來後面有個小小的庭園
入場費每位400円
庭園內的石榙
指示牌，離寅さん記念館 400M
在指示牌下面的模型公仔
行一陣就到山本亭
跟住穿過山本亭的庭園，竹下面係防空壕跡
小池塘
水泉，啲水不斷湧出
山本亭的另一個入口
對面係柴又公園
公園山丘上看柴又市，前面係山本亭
另一邊係河岸公園，有好多小朋友係度打棒球
這裡真係一個好地方，除了可以坐低享受大自然之外，還可以踏單車和緩步跑
有架外賣車泊係度做生意，坐係度飲杯啡咖食件餅，真係嘆
臨走時見到有人帶住隻好可愛的小狗散步，這隻狗仔好得意，唔怕人，仲會主動行埋你身邊添！
估下係乜？涼亭？唔係！
原來係吸煙間
乘升降機到一樓的寅さん記念館
旁邊有紀念印，好彩有帶本簿仔嚟姐
石櫈，上面有寅次郎的皮喼及帽
電影男はつらいよ各集的故事大綱及拍攝的地方
男はつらいよ 柴又より愛をこめて，呢集就係到柴又拍攝
地下有記載拍攝地方的日本地圖，原來已經係全日本拍攝過
這個係柴又，上面的圖案係帝釋天
記念館正門入口
售票處，旁邊還設有自助售票機
呢度有紀念印
返到帝釋天時剛好寺內有猴子表演
原來已經完結，開始收錢
行下帝釋天參道，睇下有無野買，試食過這些漬物，幾好味
買咗啲魚仔蝦仔返香港食，每盒 500円
臨走時買了紫番薯雪榚食，260円一杯
行返到柴又駅等車時，見到月台上有紀念印，親車未到，快手啲蓋番個印先
電車嚟喇，要同柴又講再見
到日暮里的原因係因為要去行谷中銀座商店街，而這條街又因為有很多貓的原故，所以又有貓町之稱，商店街上有七隻可愛貓木雕公仔，看看今次可唔可以搵齊。三點半到了日暮里駅經西口出，一直行就到，唔知係唔係太晏同埋星期日的關係，只係見到一隻貓，反而見到好多狗，唔通啲貓唔鍾意我！而貓木雕祇找到兩隻
。在這裏逗留了一個鐘，無奈地回程返日暮里駅，跟住乘山手線到上野駅 130円。約五時就到了上野，由中央口出，先到平禄寿司醫肚，店內全部都係136円，以前嚟過，寿司很美味，但係今次覺得寿司味道差了，有些失望，我哋咁肚餓都祇係食了十碟 1360円，真失禮！跟住就行下上野，約六時半到まぐろ市場食晚飯，這裡的魚生丼都十分美味，而且價錢又不是太貴，所以每次到東京旅遊都會嚟幫親，食飽後就到上野御徒町駅乘大江戶線到東新宿駅 210円，跟住行返酒店休息。
出了車站後見到路旁有小販賣農產品
行去谷中銀座時，途經本行寺，不過無入去行
三點幾四點都未食飯，好肚餓，入去七仔買野食醫肚，呢間七仔門口有好多菊花賣，唔通日本人情人節興送菊花
無乜野啱胃口，結果揀咗個豬肉飽180円頂下肚先
貓用品店
招牌上有兩隻好可愛的黑貓
終於見到貓喇，店鋪內的人剛給了貓糧這隻貓，佢淨係掛住食，唔埋我
行到了谷中銀座，這個位置係睇日落既好地方
路口有日式和菓子店後藤の飴
原來已經係第三代了
店鋪牆壁上有很多畫
多滿樓，很得意的招牌
原來是賣小飾物和日用品
豬仔水壼花灑，睇下佢雙眼衰衰咁
行下呢間睇下先
好多貓貓袋呀
仲有好可愛的貓公仔
屋頂有隻白貓呀
原來係木製的，做得又幾似幾可愛
行完谷中銀座後就轉左，這條街比較冷清無咁旺，除了這間古着店，就無乜野行，跟住行番去商店街
好得意的小木屐，不同的顏色祈求不同的運氣
在一間賣芋頭食品門前有個好舊的陶壼，返屋企睇番啲相先知原來係賣壼燒芋 100g100円
，錯過咗美食添
之前行咗一轉只係搵到一隻貓，唔通這個招牌上的三隻貓仔都計埋落去！梗係唔係喇，話明係木製貓公仔，點會係呀
搵到第二隻喇，就係呢間店屋頂
肉のサトー，好多人排隊呀，好好食咁喎
這店所賣的谷中メンチ十分出名，其實係炸牛肉餅，睇下有好多名人幫親食完後留低簽名就知幾好食喇
回程時在路上見到有間賣唔知係中東定係印度食店，在門前還放了好多薄餅，仲有個公仔係度食薄餅添
在回程路上的經王寺
行番去車站時在天橋睇下電車，下面一共有十多條電車軌，原來這個地方睇電車咁正
在車站旁的行人路圍欄上原來有各種火車的浮雕，這架係ＪＲ北斗星號
ＪＲスーパひたち號
影完電車後就坐電車去上野，嚟咁多次都無影過上野車站大堂添，情人節，到處都有店鋪賣情人節朱古力
上野
行過生果檔，今次試百果園隔離果檔，紅肉蜜瓜，好甜好好食
跟住行去平禄寿司食寿司
好彩唔係好多人，坐低後可以開餐喇
吞拿魚寿司，魚生顏色好淡，而且睇落幾乾，唔多新鮮咁喎
たこ寿司，以前食過好好食架，但係今次就.....，味道口感差了好多
食了10碟就算，晏啲再去第二度食過
在上野附近行下，今次到百果園食菠蘿 100円，好味道，唔酸
拉麵店前的招牌，上面對筷子會上下咁郁，好得意架
今晚食晚餐的地方～まぐろ市場
點了まぐろ市場丼700円和海七丼830円
返到酒店時在大堂櫃台的職員送了我哋兩包朱古力，估唔到係日本都可以收到情人節朱古力，好開心呀！
今日的收穫，其實只係左邊兩盒，右邊的係返到新宿在赤札堂買的小食飲品和明天的早餐
沒有留言 :
張貼留言