行程 : 酒店 → 櫻島火山有村溶岩展望所 → 烏島展望所 → 桜島自然恐竜公園 → 桜島ビジターセンター(櫻島遊客中心) → 酒店
住宿：東橫inn鹿兒島天文館II 5,586円 (原價7,980円，會員七折)
今天七點起床，梳洗後 08:00到地下大堂食午餐，今天的早餐同昨日的一樣豐富美味，食飽後就返房執好行李到大堂接待處搵職員代打電話到今晚入住的酒店東横イン鹿児島天文館II 預約停車場車位，今次比上次順利好多，我交了張預先用日文寫好請幫忙打電話預約車位的紙給職員看，佢就立刻幫我哋打電話，不用一分鐘就搞妥，真係唔該晒。
Super Hotel退房係唔洗 Checkout，因為是沒有鎖匙需要退回，就咁離開就得，預約了今晚酒店停車場後講句ありがとう 就到停車場取車。今日架車比昨天仲污穢，用水洗下塊車頭玻璃後 09:30出發到桵島火山～有村溶岩展望所（Mapcode：393 501 020）。
原本今日第一站行程係去黒酢といえば桷志田參觀做醋工房和食醋料理，但係在宮崎都咁多火山灰，而黒酢といえば桷志田仲好近霧島添，唔想吸埋啲火山灰，所以就取消唔去，直接到桵島火山。由宮崎去桵島如果行高速要成 1,050円，因今日時間比較鬆動，所以就揀全程行國道，車程約三個鐘頭；早兩日行了咁多路，又到入油的時間，今次咁啱又係去咗 ENEOS入油，入咗16.53L，多謝 2,182円，睇下張單，哇～好平呀，只係 132円，係全程最平的油站。
由於今日的行程沒有地方食午餐，所以就在途中的道之駅買了些食物，諗住到了目的地時食；行了半個鐘左右，四周越來越矇，啲火山灰真係好利害，好彩就嚟到桵島時個天開始清咗，12:10到有村溶岩展望所，泊好車後攞埋啲野食就到展望所，沿途地下鋪滿了厚厚的火山灰，上到展望所，只見四周景矇查查，桵島火山好似披了張薄紗一樣，雖然唔係好清楚，好彩都睇到山頂，影完相後在涼亭的長櫈坐底食午餐，但係好大風，唔知食風定食火山灰，都係快手啲食完啲野就走。
今日的早餐，啲野食同昨日的唔同，不過一樣咁美味
今日的行程主要係遊桵島
係時候入油喇，係日本入油係有免費抹車服務，睇下職員幾細心幫我抹車，不過主要係抹玻璃窗
132円一公升油，係全程最平的油站
中途的道の駅すえよし，入去休息一下，順便買午餐
有好多靚花呀，本來想搵下有無泥炭土賣，不過見到啲泥包包都成二十幾公斤重，咁鬼重，點攞呀，都係唔好買囉
結果係超市買了壽司 320円和炸雞 150円，壽司和炸雞都好好味，但係左邊果盒テンプラガネ 120円食完都唔知係乜野，不過味道都唔錯
在停車場旁放了個附近的旅遊景點介紹和地圖，本來都諗住搵番個近近地的嚟行下，但係大部份的都唔順路，所以就只好繼續行程到桵島火山
揸咗三個鐘頭車，終於到咗有村溶岩展望所，呢度有無料停車場，停車場旁邊就係洗手間和休息室，揸咗咁耐車係時候要入去幫親下
旁邊還有御土産小店
桵島火山形成的圖解
行上呢條樓梯就到展望所
桵島火山，雖然有啲矇，好彩都睇到好清楚
展望所山頂的涼亭
係另一邊有條樓梯可以行落去前面的山頭
係展望所上面鋪滿了好厚厚的火山灰，我同白熊係啲火山灰上留番個腳印留念下
係涼亭食完午餐後影多張桵島火山就行番去停車場
路邊的岩石上面一樣鋪了厚厚的火山灰
12:30出發到～烏島展望所（Mapcode：393 582 342），車程只需約17分鐘，12:48到烏島展望所，烏島展望所係另一個觀賞桵島火山的展望所，場內有無料停車場，可能呢度唔係好出名，唔係好多人，比較清靜，嚟到時只有一架車泊咗係度。
當我哋泊好車打開車門時，突然聽到有貓叫，白熊落車時仲比隻貓走埋佢度嚇親添，隻貓好鬼瘦，不停對住白熊拎住有食物係裏面既膠袋叫，仲叫得好淒涼，見佢咁可憐就比咗隻炸雞佢食，見佢好似餓鬼咁食個不停，唔知佢有幾耐無食野呢，餵完貓後就行上去展望所睇風景，點知，係上面仲有隻貓，不過呢隻就肥好多，佢一見我哋，就走埋嚟喵喵聲咁叫，於是又比咗一隻炸雞比佢食，影完相後諗住行番落去停車場喇～點知又見到先前果隻貓，不過佢個樣無咁餓，仲「護送」埋我地返停車場添。
烏島展望所，停車場內連埋我架車都只有兩架車係度咋，最埋有洗手間，唔覺眼有小食店
国立公園桵島「烏島埋沒跡」紀念石
好似餓鬼的貓仔，睇佢食得好滋味
上面就係展望所，係旁邊的小路行上去
路旁的奇形怪石
展望上的涼亭
桵島火山，係度望過去桵島火山矇好多，估唔到霧島新燃岳火山噴發連呢度都受到影響
另一面，可以睇到鹿兒島市
食飽飽的貓仔又跟住我哋行，貓仔呀！呢度人影都唔多個，唔好係度搵食嘞，唔係遲早餓死架
離開烏島展望所，我哋向第三站桜島自然恐竜公園（Mapcode：42 012 796），本來計劃係先去湯之平展望所，但我哋已經去了兩個展望所，覺得風景差唔多，所以就取消了唔去。自然恐竜公園有無料停車場，泊低架車就遊下園，個公園其實係一個有十多個恐龍模型的兒童樂園，今日係星期日，但係公園都唔係好多人。遊完公園返回停車場，見到車位附近有水喉，架車舖滿厚厚火山灰，真係好污穢，於是我哋係度同架車洗完白白先離開。
13:45出發到桜島ビジターセンター (櫻島遊客中心)（Tel：099-293-2443），車程只係幾分鐘就到，桜島ビジターセンター除了有無料停車場外，還免費入場，中心內介紹桵島火山的歷史和形成過程，原來現在的桵島火山經過多次的爆發才形成的，以前的桵島真係得個島嚟架，在 1914年的一次大爆發，流出大量溶岩，將桵島的東面與陸地連接起來。
桵島自然恐竜公園地圖
園內有好多恐龍呀，這是棘龍
暴龍
雷龍
異齒龍
好巨型的恐龍～梁龍
原來係個兒童滑梯嚟
公園內的一邊有好多俾兒童設施
熊貓和老虎
好長嘅滑梯，咁大個仔都未玩過咁激嘅滑梯
有成兩三層樓高，日本的細路仔都幾大膽喎
劍龍
板龍
連雌雄獅子都有
原來係呢度一樣可以睇到桵島火山
雖然矇矇地，但係幾靚喎
桜島ビジターセンター
中心內有講解桵島火山幾次大爆發
仲有模型添，就算唔識日本都可以明白
將桵島同大陸連接的 1914年大爆發
1946年最近一次的爆發
桵島火山模型
行完桵島遊客中心後14:10出發到東横イン鹿児島天文館II（Tel：099-224-1045），由桵島去鹿兒島市要乘汽車渡海輪桜島フェリ，汽車連司機收費1,070円加乘客每位 150円，一共 1,220円。初初都有點擔心點去碼頭搭船，好彩部 GPS教我哋點去碼頭收費亭，俾咗錢後就排隊等上船，桜島フェリ24小時都有船，而且班次都幾密，好快就上咗船，上到船時會有工作人員指示停車的位置，停定架車後就到上層行下，由桵島去鹿兒島市只係十五分鐘，好快就到，上返車等架船泊好後就開車繼續行程。
因為架車係船倉內，部 GPS接收唔到訊號，所以剛出碼頭時佢又唔知自己係邊度，好彩有之前的經驗，我哋跟住其他車一齊行，保持慢速行駛，過了一分鐘後就出返正確的指示，可以繼續行程，15:00到達酒店。東橫Inn 的 Checkin時間係 16:00，咁早嚟到，無得 Checkin喎，好彩我哋已經入咗會，會員在15:00就可 Checkin架嘞。
泊好架車，比埋兩晚房租11,970円(5,586円+6,384円)和停車場費1,000円(每晚500円)，攞埋房匙就乘電梯上房。放低行李休息一陣就出發到附近的天卜館通り行街街，今日我同白熊都覺得好攰好眼訓，所以就早啲食晚餐。今晚我哋揀咗去我流風ラーメン 天文館本店食，係附近仲有間我流風ラーメン 本丸店，不過我哋想食的とろ肉炙り焼きらーめん（燒黑豚臉肉拉麵）980円係本丸店門口的食物模型搵唔到，所以就去咗天文館本店食。入到去用自助購票機買了食券後就搵位坐，由於時間尚早，祇係17:15左右，成間拉麵店只係得幾個客人，坐低等食時，四圍影下相，無意中竟然見到 TVB的錦旗，哦！原來 TVB係 2008年拍攝「好友移城」時係呢間食店拍攝過，我都係睇番呢個節目重播先嚟依度食晚餐。
食完晚飯返到酒店祇係六點幾，於是拎兩條著咗9日嘅厚褲去洗，諗住萬日聽日唔乾都可以晾多一日，因為聽晚都係住係呢間酒店。洗完衫，上咗一陣網都只係八點多，不過已經好攰成身散晒，都係早啲上床休息。
桜島フェリー收費亭
俾完錢後就排好隊等上船
碼頭的汽車渡輪，呢艘船已經滿座，要等下一班船
開船喇，日間十至十五分鐘一班船，班次都幾密
可以上船喇
啲車泊得幾齊整
開船之前會有人係架車個車輪前後放置木塊，以防啲車會流前流後
今晚入住的酒店東横イン鹿児島天文館II
今次既立體停車場泊車唔係用咭而係用鎖匙，我哋泊係十三號位
由於未泊過，接待員給了我哋張說明書，原來都係好簡單
攞住鎖匙就出去泊車
打開控制箱，先按右上角的「スタート」制一下，跟住將鎖匙插入匙孔轉右扭，等一陣個閘門就會打開
將架車駛入去，前面有塊鏡幫你睇位，記得要收埋兩個側鏡呀
泊好車後就將條匙左轉，跟住按「スタート」和再按「戸閉」就可以
閘門就會自動關上，架車就會自動泊好，一切搞掂後就攞番條匙出嚟交番俾接待員就完成
酒店大堂
天文館通り
行行下睇到有蜂蜜饅頭賣，仲有好多人排隊添，應該會好好味
我哋去排隊買番啲嚟試下
原來係大判燒，即係香港叫的日式紅豆餅
あずきあん，即係紅豆饀，唔係太甜，餅皮好鬆軟，好味
呢件係白あん，單單睇個樣真係唔知係乜野，原來係蕃薯饀，又幾好味喎，唔錯
行完一邊就過馬路到對面繼續行
入到去就在路中間見到有個男人帶住幾隻好靚的貓仔係度休息
啲貓真係好靚，除了我哋之外，仲有好多人係度同啲貓影相
啲貓好乖好聽話，真係好可愛呀
影完貓貓就繼續行，在一間手信店前放了個吹氣膠箱
突然個蓋慢慢打開
原來裡面有隻招財貓
間手信度有個紙板公仔比給遊人影相，白熊快啲伸個頭入去扮篤姬
附近還有其他的畫板給遊人影相留念
島津重豪和家臣銅像，第二十五代島津家當家，現址係佢當年進行天文觀測，在附近興建了造士館，醫學院和明時館（天文館）
圓碌碌的肉丸人呀，原來係幫街尾的炸肉丸店賣廣告，好可愛，當然要同佢合影喇
就係街尾呢間炸肉丸店
有好多選擇，最後揀大人氣的黑豚肉丸 180円
熱辣辣，又多汁又濃濃的肉味，好好味呀
時間差不多了，今晚就係呢間我流風天文館本店食晚餐
自助售票機
拉麵店裡面，好有日式傳統食店的風味
TVB 的錦旗，佢掛咗係好當眼的地方，仲用個膠袋套住驚整污漕
拍攝好友移城時 I Love You Boyz 的留念簽名
坐低後店員先送上碟酸蘿蔔
有野食喇，我的とろ肉炙り焼きらーめん 980円，職員好細心放低個碗，然後將印在碗上的「我流風」轉正對住客人
白熊的同我一樣，豚臉肉好滑好嫩，啲麵又彈牙，最重要的係啲湯又濃又美味，咁大碗本來諗住會食唔晒，不過實在太美味，我同白熊都將成碗麵食晒
行返酒店途中在馬路旁見到黑田清煇和弟子山下兼秀，黑田清煇在1914年桵島大爆發時的景象用圖書畫了出來，現在那些畫仍然在鹿兒島市立美術館收藏
酒店的洗衣機和乾衣機，每機200円洗38分鐘
旁邊的洗衣粉售賣機，30円一盒，今次試下買盒洗衣粉用下先
沒有留言 :
張貼留言