chris 的小小世界: 09年新春東京九天自由遊 Day 4

第四天

日期：2009年1月26日(星期一大年初一晴 3-10度)
行程：酒店 → 築地市場 → 淺草 → 道具街 → 上野
　　　東京鐵塔 → 新宿
住宿：新宿アーバンホテル

　　今天都係七點就起床，梳洗後就出發，今天的早餐會在築地市場食，所以一出酒店就直接去車站坐都營大江戶線，因今天會坐好多程都營線車，所以計劃是買都營一日pass（700円），但是張西瓜咭實在太好用了，一到車站就攞咗張咭去入閘，上咗電車後先記得忘記了買Pass，實在太失敗了，既然忘記了，算吧，繼續用張西瓜咭搭餘下的車程喇，最後計數足足要用多了幾百円〒_〒。

　　約早上九點就到，築地市場已經嚟過幾次，今次的目的地是外市場，因未食早餐好肚餓，於是就去搵好想食好耐的爐端燒帶子，看旅遊書及網上的介紹，話d燒帶子好好食，但係唔知係唔係太早的關係，亞婆搞咗好耐先開始燒，而且仲係無得揀，隻帶子已經放晒係火爐上面，俾邊隻你佢話事，我果隻就好熟同唔係太鮮味，仲好鬼韌添，下次幫親要見下火爐上面係唔係燒定好多，係就咪喇，一定會太熟。

　　食完了不太美味的帶子後，就去食魚生飯，今次會去かんの丼食，這食店旅遊書有介紹，但去咁多次都無食過，在一月初看過了別人的遊記介紹得津津有味，再次提起我的食慾，決定食一個豐富的早餐。這食店是很容易找到，魚生飯比較貴一點，不過就極之鮮味，點了兩款魚生飯（兩款都有海膽），多謝 3000 円，對番要二百幾蚊港紙，不過大年初一，當然要食豪d喇。

　　好快就有得食，一啖食落去真係鮮味無窮，片片魚生都係鬼咁厚，啖啖肉，而且仲入口即溶，尤其係海膽，白豬那碗有三大件肥美海膽，鮮甜無比，齒脥留香。

酒店隔離的另一家酒店的石像～青蛙也拜神

坐都營大江戶線二十多分鐘就到，由新宿去要在都庁前轉車

哈哈～洗手間在日本原來係叫便所

外市場街頭

亞婆開的爐端燒檔口

這幾隻帶子唔知放咗係度幾耐，亞婆點火後加醬油就繼續煮

煮好喇，睇個樣都OK，但係就太熟了

跟住去咗呢間かんの食魚生飯店

好大碗的魚生飯呀！

有蝦有蟹仲有海膽添，正呀

海膽三色丼，睇到口水流

杯裝おでん關東煮

行行吓見到有浦燒鰻魚食

100円一串，正

休息室...... 其實係吸煙室才真，成間房大部份人都係度食煙

　　食飽飽後就去淺草寺拜神，係築地市場駅坐番大江戶線在淺草駅落車 210円，落車後個口仲係好大陣魚生海膽味，買了罐咖啡飲下先。

　　約 10:50 到了淺草駅，雷門寺之前嚟過兩次，但係都無去拜神，今日係大年初一，所以走咗去拜神求籤，拜完神，見時間尚早，就決定去道具街行下。

　　由於沒有帶備充足資料出來，在雷門寺看過了地圖後便出發，不過差點迷路。行了十多分鐘才找到正確方向，原來這條道具街十分長，行了個幾鐘頭都只係行咗一半，由於好累及好晏，所以決定不行完便回程返車站。唉！沒做功課真係出事，去到田原町駅唔知應該搭咩路線，茫然地一邊落樓梯一面望住樓梯頂田原町這幾個字，忽然有位熱心的日本男士主動問我哋想去邊，教我哋搭那條線可以去上野，知道怎樣可以去到上野這個熟悉的地方就安心得多，多謝了這位先生後，就上車向上野出發。

　　真係要提醒自己，以後去日本旅行一定要做足功課，不論是否真係會去都要搜集好有關
資料的地圖和交通路線圖，如果萬一行程改變，最終都要識得返屋企──酒店。

雷門

口裡還有魚生味，飲罐咖啡先

淺草仲見世通り

即製人形燒

貓貓七福神呀

你做乜咁睇唔開呀，咁高好危險架

原來係個公仔

對面大廈都有個，好得意

唔好行，睇完個告示先

除了仲見世通り之外，其他的橫街都好有特色

哎呀，我鍾意的小丸子人形燒呀

充滿雷門特色的吊飾

又見到七福神，在日本係好信七福神的，好多寺廟都係供奉他們

雷門五重寶塔，建於 1648年，因關東大地震及二次大戰時燒毀，現在這座塔是在 1973 年重建的，裡面供奉了斯里蘭卡傳來的佛舍利子

見到有位婆婆係度寫生，睇下先，哇～畫得好靚呀

有個好古老的水井，要用人手打，玩下先

影完相就要去拜神喇，洗下手先

之後去買香

100円一扎

用這個火爐點香

就嚟著喇，唔好心急

搞妥，著咗喇

將d香插入這個香爐，順便揆d煙落身，聽聞會身體健康架

拜完神就去求籤，記後要放底100円呀，求到乜野籤，秘密～

有個好似墓嘅野喎

乜野嚟呢，唔識睇，唔知佢講乜

側邊沒有人的求籤筒，梗係喇，係求籤都係大殿度求喇

好大隻草鞋呀，第時著草就啱用，可惜得一隻

　　行完就行去道具街，途中見到麥記，去下洗手間，跟住就食下 100円的漢堡包及雪榚，個包係即做的，熱辣辣好好味，好juicy；雪榚當然好濃味喇，係日本食軟雪榚一定唔會令你失望

見到大廚師個頭就知到了道具街

好可愛的便當盒

這裡都有試飲杯賣呀，要入貨就快手喇

靚靚的蛋糕盒，如果鍾意做蛋榚的話一定唔好錯過

小心呀，好大隻豬通街走呀

梗係唔係真喇，係道具街的假食品模型，呢d係鎖匙扣

電話繩，不過都幾貴，700-900円一個

好大個蛋榚呀，真係假嘅

好多雪榚呀，雖然明知係假，但係都睇到口水流

行行下見到這間幾層高的商店，好多野賣架

除靜電機，因上次已經買咗所以無買

但係今次忘了帶，這幾日已經電咗幾次，冬天去日本記得買番個傍身，這個好平，441円就有

達文西另一發明，手動電筒收音機，要光就要努力加油喇兄弟

爐端燒呀，買番個返去BBQ呀好唔好呀（但係白豬話我痴線）

甲蟲襲地球呀，白豬快ｄ走呀（今次仲唔報番仇，話我痴線）

大刀呀，千祈唔好俾白豬睇到呀，佢實攞嚟斬我

玩完又繼續行程，河童仔

咖啡杯露台，個設計師一定好鍾意飲咖啡嘞

　　約四點半去到上野，個心安樂晒，仲未食午餐，今餐想食迴轉壽司，於是去了活魚の大江戶，每碟 126円，唔知係唔係太晏食飯的關係，兩個人只係食咗11碟，好失禮。

　　食飽飽後就去東京鐵塔睇夜景，在上野御徒町駅坐都營大江戶線去，赤羽橋駅落（260円）；都營線呀！點解我今朝唔記得買Pass呀，天呀！！！

　　坐二十多分鐘就到，一出車站就見到個好靚好壯觀的東京鐵塔，忍不住在馬路邊影相，個腳架袋咗係個袋成日，終於有用武之地喇，影夠就繼續行程，雖然唔知點行，跟住人行向住個鐵塔方向無錯，行了幾分鐘就到，但係入到去鐵塔搵唔到售票處及鐵塔入口，在商場內亂行，點知去到1樓就睇見直到鐵塔頂的快速升降機，問了職員後才知售票處在商場1樓的外面，我們原來係去咗後門，一入就去咗2樓，正確係行前門才對（不過我哋行後門的路線是最短的喎）。

　　上到去後被出面好靚的夜景吸引，個腳架又有用喇，這裡為了方便觀看夜景的關係，室內是係好黑的，只有幾盞燈照路，怕黑的記得帶小電筒。

　　我們買的票只能到二樓展望台，頂樓室外的要另外購票，如果想影人像夜景相的話就要上去，因這裡係用唔到閃光燈，（我估的，係出面有塊大玻璃，用閃光燈一定會反光影唔到的。）影完相買了紀念品後就落下一層，一樓係洗手間同餐廳，但係就唔可以影相，見到有幾位日本美女係度影相時俾工作人員阻止。

　　睇完夜景就返新宿食晚餐，但要走的話是要在展望台一樓坐番部高速升降機落地下，係二樓係唔可以的，要留意。落到地下搭番商場升降機去二樓沿嚟的路行去赤羽橋駅，乘大江戶線係新宿駅下車（210円）。

　　今日的晚餐是在ペッパーランチ（Pepper Lunch），這間食店在 apm 也有分店。在新宿歌舞伎町分店是佷細的，只有十多個座位，幸好日本人食飯是很快，如果去到時沒位，等一陣就會有。

　　這裡也是自助購票的，買了票後坐番埋位，就會有人嚟收飛，等幾分鐘就有得食，係食之前要自己煮一陣才可以食，有說明書講解，再唔係去 apm 間 shop 幫襯下，做下功夫先，我都係之前去食過才知點搞。食飽飽後就返酒店休息，今天真的好累，早點休息，明天又要早起。

大江戶迴轉寿司，午餐就在這裡食