chris 的小小世界: 09年新春東京九天自由遊 Day 3

第三天

日期：2009年1月25日(星期日年三十晴 3-9度)
行程：酒店 → 川越 → 上野 → 新宿
住宿：新宿アーバンホテル
　　今天七點多就要起床，八點半出門，點解要咁早出發呢？因為今日要去『川越』，由新宿駅坐山手線到池袋駅（150円），再轉乘東武東上線到川越駅（480円），車程差不多要一個鐘，所以就要早點出門。為了爭取時間，係酒店食埋杯麵早餐先出門，如果唔係就一定會餓死。
　　到了川越後就去巴士站，遊川越可以坐兩種巴士，一是『川越巡遊巴士』，一日pass 500円；另一是東武觀光巴士『 小江戸名所めぐり巴士』，一日pass 300円。在網上看過了班次表後，發現假日的比較密，平日的比較疏，所以決定今天星期日來這裡。
　　因川越巡遊巴士比較疏和昂貴，所以今次坐小江戶名所めぐり巴士，九點半到咗川越，行東口出，去到巴士站後找到司機大叔，買了一日pass後上車，等了幾分鐘就開車，咦～成架車除咗司機，得我地兩個人咋。嘻嘻！好似包咗架車咁～
今日我哋既早餐，日本名物～日清杯麵

新宿歌舞伎町街頭每朝都有很多烏鴉，原來真係好大隻，初初見到時都有d驚驚地

今朝天氣好好，但係只得 3度，好凍呀

轉了兩次車，坐了成個鐘車後終於到了川越駅

係3番乘車站搭東武觀光巴士～小江戶名所めぐりバス

一日乘車券 300円

司機大叔係車外面吹緊水未上車，影下相先～

　　夠鐘開車喇，架車內有個好大的顯示屏，有中日英文，唔怕唔識落車，第一個要去的地方是喜多院。落車時見到有位穿著紅色外套的伯伯等著我們，而且仲好主動同我地交談，係雞同鴨講的情況下，我估計應該是駐廟義工，在假日負責給遊客講解的。
　　於是我就用簡單的日文同佢話我不明白（わかりません）後，他就明白我們不是日本人，哈哈～～第一次有人以為我們是日本人。於是他開始用英文問我們是不是從台灣來，原來他去過台灣，我們告訴他是從香港來，來了第三天。他用簡單的英文，但非常流利，開始講解喜多院，很專業的啊！！！
　　他帶我們行了一個圈後，來了一句Have a nice trip!我們回了一句Thank you so much! 就結束這次講解，真的很多謝這位伯伯，可惜忘了和他合照呢！！
　　在行完拜完神之後，就行返去巴士站坐巴士去下一站，那知在喜多院門前又遇到那位伯伯，見到我們又主動跟我們交談，知道我們接著的行程，便拿他隨身給遊客的地圖上畫上圈圈，教我們在那處下車，那裏很少食店，那裏較適合吃午餐，下一班車是幾點，點知講講下原來架巴士已經到站，伯伯一見到就立即飛奔去幫我們去追車，真的很好人啊！好感動！上了車還不忘向他躹躬（應該是點頭才對）。
真係好大個顯示屏，近視同老花都睇到

喜多院

院內的寶塔，有無留意，佢係上圓下方的

唔知係星期日定係祭祀日的關係，院內有好多熱鬧，同埋有好多日本特色食品小販

好多綿花糖呀，乜日本都係用膠袋袋住嚟賣

製綿花糖機，咁多年都無變，只係d綿花糖多咗好多種色

呢檔賣達磨（だるま）

原來除了達磨之外，祈求達到目標的可以買這個破魔矢（箭）

入廟拜神，咁遠嚟到當然都去拜下神求番支籤

好大個籤筒呀，求之前記得放低 100円呀

求完之後就自己去攞籤紙

籤紙，我就求到支吉籤，OK喇

如果求到係凶籤的話，就要在這裡放低支籤（化籤），記得唔好帶返屋企，唔吉利架，呢位太太應該係求到支凶籤

白豬今天也是求到支凶籤，都係跟習俗把支籤打過結，留低佢

各種紀念品

五百羅漢，只係得個籃球場咁大的地方就有超過五百尊羅漢石像

每尊的羅漢神態都不同

　　下站係氷川神社，在宮下町落車，行過對面就係，約10:50就到，這間神社不是好大，不是好多野睇，行十幾分鐘就行完，去個洗手間後約 11:10 就返去巴士站去下一個景點。在巴士站等了十多分鐘仍未見有車，明明話 11:15 有班車，又話日本的巴士好準時，等了十幾分鐘後， 11:30 就見到 11:35 果班車到，原來佢地係會早到的，當上車後就更加明白，原來其他的站因沒有人而飛站，所以好多時都會比時間表快到站，各位要留意喇。
　　下一個地方是菓子屋橫丁及一番街，我們在扎の辻落車，行一分鐘就到菓子橫丁，全條街都是賣日式菓子，而且好多都是百年老店，很值得行。
川越巡迴バス站，兩條巴士的路線大部份都是相同的

氷川神社

日本神社必有的洗手地方

一入去就見到好多穿住日本神道教服飾的女仔，都係第一次見

氷川神社的神殿

原來這個才是神社的正門，之前那個只是個側門

隔離有座好現代化的會社，拜完神就入去幫親下個洗手間

這裡有清洗身心的紙公仔

放在溪水上給聖水洗淨

等咗十幾分鐘，終於巴士嚟喇

川越一番街

過了馬路行多一分鐘就到，這個路牌真搞笑，咁樣放嘅，唔見咗個菓字

番薯雪榚呀，當然要食喇，250円一個，好濃好香番薯味呀，正

終於到了菓子屋橫丁喇

食下日本出名的燒丸子，即係燒糯米丸

原來係咸的，第一次食，感覺怪怪的

橫丁內的店鋪大多是賣日式菓子

這檔是由兩位老人家經營，伯怕好細心一隻一隻的整，好有heart

好靚的鯛魚燒，而家日本番薯當造，梗係要揀番薯味

麵粉公仔呀

乜d公仔的手工咁差架，好鬼肉酸

行完橫丁後就行一番街，見到有寫住小江戶橫丁的，入去睇下，原來那裡有幾間食店

好大碌番薯呀

番薯蛋榚，試食過真係好好味

這裡有間日式燒餅店

午餐就到這裡食拉麵

500円一碗，湯底尚可以，但係d麵就...... 咁平，不要要求咁高

食完拉麵後就去時の鐘，上次因天黑無影到相，今次要影番夠本

時の鐘下面原來有間神社

沿途見到服部民俗資料館，不過祇係影咗張相，無入去參觀

有隻大肥豬呀通街訓呀

在路上有好多好得意的公仔銅像

山崎美術館

去川越就是想睇這些江戶時代的房屋

蓮馨寺

原來今日剛好是唔知乜野節日，七間七褔神寺都有紀念印

寺內的肥貓，好乖，任影任摸都唔嬲

川越商店街街頭，真的好旺，假日就更多人

怪物呀，初初睇仲以為人扮，原來係個公仔

兩年前來過這裏，都見到這毛公仔，現在她仍然呆呆的坐在街角的長櫈

今次日本之旅最大收穫是在便利店找到 105 円的各款美味飲品

在便店除了有野食有野飲之外，仲有各大遊樂場的割引券賣

馬油 1580円，雖然比在大阪的貴少少，但仍比東京都商業區的平

行到街尾竟然有收穫，這些日本牌的袋做緊清貨大平賣，原本三千幾円一個的袋，而家兩個只係 3800円咋，當然要買喇

這座是在車站旁的商場

每個鐘頭都會有公仔出嚟報時

　　約下午四點多就到上野，見早就向動物園出發，行過上野公園後再行了幾分鐘就發覺唔多妥，點解個吊車會係上面經過嘅？去動物園係要第二條路入先可以坐吊車，我係下面行係唔會經過個吊車站的，跟住仲俾我見到個告示牌話個動物園16:00關門，唔係呀？咁早關門，d動物咁早就要瞓？無法啦，只好行番轉頭。
　　在アメ橫丁行了一陣就去了『まぐろ市場』食晚餐，這裡的魚生飯真的很美味，入口即溶。食完飯後就坐大江戶線返新宿，在東新宿駅落車，出了車站後行去赤札堂 Shopping，之後返酒店，食過宵夜梳洗後就上床休息了。
上野恩賜公園