行程 : 酒店 → 木之內農園(士多啤利園) → 高千穗觀光物產館トンネルの駅 → 高千穗峽 → 国見ヶ丘 → 酒店
住宿：スーパーホテル 宮崎 6,980円
今朝未夠七點就已經起床梳洗，07:40就落去食早餐，呢間酒店的早餐係在地下的「志高」食，落到去攞了食物後就搵個位坐低，但見到餐廳有好多人食煙，都係快啲食完返上房。食飽後我地先到停車場睇下架車有無事，見到架車同尋日朝一樣，成架車都結咗層薄冰，睇嚟今朝又要洗車。
執好行李後到二樓接待處 Checkout，因為今晚入住スーパーホテル宮崎的停車場要打電話預約，所以攞番 500円cable線按金後就將預先在行程紙上寫好的日文交給女職員看，請她幫忙打電話，但係佢好似唔多明我地想做乜咁，好彩後來有位男職員出來，再同佢講多一次，比埋預先寫好的資料佢睇，佢就明我地想做乜，立刻幫我哋打電話預約了車位，好野，搞掂晒，真係唔該晒。
到了停車場後，放好啲行李就用預備的兩大支水喉水嚟洗下車頭同車尾塊玻璃，搞掂後 09:00出發到士多啤利園～阿蘇いちご畑～木之內農園（Mapcode：480 732 867），順道一提，部 GPS指示去阿蘇いちご畑的路有些少問題，佢係會指咗你行條好鬼窄，真係窄到架車大啲都行唔到嘅路，正確應該行右邊的小路先啱。
今日要行成二百幾公里路，都係入咗油先，所以沿慢線行，不過搵唔到咁心水的入油站，諗住晏啲先算。09:15到阿蘇いちご畑，同昨日見過面的靚女職員講話嚟摘士多啤利，不過我地今次唔係食放題而係拎走。職員給了我一個紙箱，然後帶我地到隔離的溫室，佢示範唔洗用較剪摘士多啤利，原來只要用中指同食指夾著條士多啤利梗，一拉一扭，士多啤利就會同條梗分開，真係好方便，摘士多啤利係計重量的，咁樣仲可以輕啲秤添。示範完職員仲請我地食咗一粒唔係好紅但係好甜的士多啤利，跟住我地就自己係度摘，摘夠就返回接待處磅重。
本來諗住摘些少就算，不過今日我地係最早到的一個，所以園內還有好多又大又紅的士多啤利，真係摘到唔停得手，結果裝到成個紙箱滿晒，返到去搵職員秤下，哇～～1,354g，乜原來我哋摘咗咁多，每 100g @170円，多謝 2,302円。
朝食券
早餐就在地下呢間餐廳食
呢啲就係我同白熊的早餐．雖然種類唔係好多，但味道都唔錯
我哋部戰車，成架佈滿層薄冰
成塊車頭玻璃都係冰，今朝又要洗完架車先可以出發
今日行程，由阿蘇揸車到宮崎，要揸209 公里 5小時 30分鐘，今日係全個旅程揸車最耐嘅一日
阿蘇いちご畑～木之內農園地圖，要行紅色果條路去士多啤利園先啱
阿蘇いちご畑
裝士多啤利的紙箱
好大個士多啤利園呀，呢度係種係架上面的，高度剛剛好，唔使彎低腰，唔似上次 09年係「津久井いちご園」咁辛苦
啲士多啤利又紅又大個
唔覺唔覺摘咗成箱添，真係有排食
拎番去磅下重，哇～ 1,364g，一公斤有多，多謝 2,302円
今日的收穫，啲士多啤利真係好甜好好味，一路揸車一路食，真係食到唔停得口，唔夠兩日就俾我地食晒
離開阿蘇いちご畑，就出發到高千穂觀光物產館トンネルの駅（Tel：0982-73-4050），車程約個半鐘，啲油已經用咗差不多一半了，打算到高千穂前入一次油，所以沿途行慢線，一見到有油站就立即入去幫親，咁啱今次又係到了上次入油的油公司 ENEOS，入了15.5L @ 136円，一共 2,108円。
我哋一路揸車一路食美味鮮甜的士多啤利，不經不覺離開了熊本縣向宮崎縣進發，行緊國道 325號時，在紅綠燈位轉右時見到有個大公仔係路邊，原來宮崎婆婆(我改的)就係係呢度（Mapcode：685 060 719），入去泊低架車影下相，順便行下鬆下根骨，影完後就繼續行程。11:00到了高千穂觀光物產館トンネルの駅，內有免費停車場，泊好車後先入去手信店幫親下個洗手間，成個人舒服晒，之後就四圍行下，係手信店內有好多支酒任飲任試，如果係好杯中物的一定唔捨得走。
去高千穂途中在 325號國道路邊見到好多公仔
宮崎婆婆
後面仲有四個大公仔添
咸蛋超人
高達
超核突的犬夜叉
到高千穂觀光物產館トンネルの駅喇，入口仲有部火車添，好易認
原來呢架火車係餐廳嚟，見到車頭有支大雪榚，仲以為係雪榚店
入面係藏酒山洞，未行入去已經嗅到好大陣酒味，唔飲酒的我都係唔好入去好啲
洗手間前的大白馬，前面寫住「天孫降臨」，乜野意思呢？
試飲コーナー（櫃位）
後面仲有成幾十枝酒，真係一支試一啖都會飲醉
行完手信店就到外面行下，運酒的馬車模型，同實物一樣大，呢個係名物，好多人都鍾意同佢影相
後面就有條瀑布添，個景好靚，睇下，條瀑布有部份係結咗冰的
呢間先係雪榚店
48647 蒸氣火車頭
旁邊還有個火車貨架
離開高千穂觀光物產館トンネルの駅後出發到高千穂峡（Mapcode：330 711 761），車程只係十多分鐘，好快就到。11:40到了高千穂峡，架車泊係手信店旁邊的停車場，500円一日，泊好車沿河邊的遊步道行下，點知行了一陣就有告示牌話前面有工程，封咗條路，要兜路行，咁我地咪照住幅地圖行囉，點知原來係行番上馬路，兜過座山仔先到另一面，果條路不是很闊，而且又沒有行人路添，有些危險，都係唔好喇，行返轉頭好啲。
在附近行了一陣見肚仔餓，係時候食午餐了，但係好多食店都沒有開門，只有在停車場前面的一間「千穂の家」有營業，在沒有選擇下只有入去食午餐。呢間係日式食店，餐廳在二樓，我地上到二樓除了對鞋才可以入去，今餐我地點了高千穂峡定食 1,550円和日向若鷄唐揚げ定食 1,150円，個高千穂峡定食除了有呢度出名的鹽燒山女魚之外，仲有黑毛和牛，但係啲山女魚味道只係一般，沒有想像中那麼美味，至於啲黑毛和牛就唔錯，最好食的反而係炸雞，啲雞又嫩又滑，好味道。食飽後到對面的手信店行下買下野，13:25行返到停車場取車出發到国見ヶ丘（Mapcode：330 768 738）。
到咗高千穂峡喇，我哋就係泊係前面的停車場
淡水魚水族館
御橋
在橋上望下高千穂峡，幾好靚喎
河上的小船
過咗條橋後就沿左邊的遊步道繼續行
久大郎水神鳥居
路邊有座小神社
前面放了好多陶瓷做的彎玉，每個 100円，自助購買
彎玉係可以保平安的，我啲都買咗一個
繼續向前行，睇下左邊山崖啲石
同香港糧船灣多角節理岩柱一樣的
係呢度望高千穂峡，我覺得最靚
真名井の滝
旁邊仲有彩虹添，有無睇到吖，好靚呀
行多一段就行唔到，要兜番出去，神石～「鬼八のカ石」就係前面無幾遠，好彩部相機 zoom埋去都影到
行番出馬路後，要同汽車爭路咁危險，都係返轉頭，在路旁有幾條瀑布仔，原來係叫玉垂の滝
おのころ池
玉垂の滝水，呢度啲水話可以直接飲用，不過我就唔敢飲
咁大舊石碑，唔怕啲人唔知呢度係高千穂峡
旁邊仲有高千穂峡附近地圖
行入去就有得釣魚，每個人 100円，釣到的魚就要每條 200円
好大個水池呀，裡面仲養咗好多魚添，睇嚟要釣到魚都唔係好難，不過今日佢哋休息無營業，無得玩
水池旁的觀光案內所，今日真係好少人，鬼影都無隻
食流水麵的食店，可惜一樣無開門
千穂の家，呢間也有流水麵食，不過一樣無營業
鹽燒山女魚，又係無人，點解間間都無開門架
黑白貓，佢好似唔多鍾意我哋咁，一行埋去就走人，唔係，應該係走貓先啱
好肚餓呀，好彩呢間有開啫
啊！呢間又叫做千穂の家，原來係分店嚟，不過就無流水麵食
好有日本 Feel，但係要坐地下，對我呢個有大肚腩嚟講都幾辛苦
等啡白熊睇下個餐牌有乜野食先
有野食喇，呢份係白熊的高千穂峡定食 1,550円，有燒山女魚，黑毛和牛，除了條燒山女魚味道只是一般之外，其他的都幾好味，有無留意啲黑毛和牛呀，佢係串係條樹枝上面燒的，好有特色，餐牌寫叫做「山賊燒」喎
日向若鷄唐揚げ定食 1,150円，啲炸雞大大件，又滑又嫩又多汁，正～
食飽買完手信後諗住到停車場取車，不過一場嚟到，真係要去睇下人哋扒艇仔，呢度扒艇仔每 30分鐘 1,500円，最多可以坐三個人
係停車場內最埋位置，落埋條長樓梯就到
扒艇仔的碼頭
泊咗好多艇仔，影完相後就返到停車場攞車出發
去国見ヶ丘只需幾分鐘車程就到，国見ヶ丘旁邊有個無料停車場，係国見ヶ丘可以睇到高千穂峡，而且還可以睇到阿蘇五岳添，睇完風景後 14:00離開高千穂，向今晚入住的酒店スーパーホテル宮崎（Tel：985-61-9000）出發，白熊問：「乜話，咁早就返酒店，唔係呀？」係呀，無錯，由呢度揸車去宮崎市若果行有料高速都要成三個幾鐘頭，去到都已經五點幾，個天黑晒，中途只係在7仔停咗一次，借洗手間和買點小食，全程都努力揸車。
国見ヶ丘有兩個停車場，我哋泊咗係呢個無料停車場
由呢條路直行就到
到国見ヶ丘喇
指示牌，呢度可以望到高千穂和阿蘇
前面係就高千穂喇
遠處就係阿蘇
阿蘇五岳
見到個牌話呢個景係叫阿蘇湼盤像，似唔似有個人打橫訓係度
原來呢度有洗手間
沿著旁旁的小路行上去
在山頂有個木建展望台
山頂有個天孫降臨像，話上天派了天將降臨，平定亂世
在木台睇風景仲清楚
呢條乜野橋呢，係地圖搵唔到
本來一直都是天晴，不過踏入宮崎市市郊，個天變得灰灰暗暗，應該係受到霧島新燃岳火山噴出的火山灰影響。呢程我地都係全程行國道，無行有料高速，所以比預定時間遲了一些，差不多六點才到酒店，去到停車場泊車，諗住有位就可以泊，好彩白熊眼利見到我個名，原來每個車位後面個雪糕筒都掛了個名，全部車位都有人預約晒，我當然泊番自己個位。泊好車後就到大堂接待處 Checkin，原來呢間酒店 Checkin係自助，而房門係用密碼鎖，我地當然唔識點樣自助 Checkin，都係由接待處小姐幫我地搞掂，我哋係呢間酒店連住兩晚，佢收了 1,000円停車場費用，而房租 13,960円就放入部自助checkin機，辦妥手續後自助機就會出張有房間號碼和密碼的收據，佢仲教我點開房門，同埋話比我知浴衣和枕頭放在大堂有需可以自取，我地揀咗浴衣和枕頭就上房放低行李。
我哋訂的係雙人房，但係今晚住的係三人房，本來多張床都無乜所謂，但係多出嚟果張床係係張雙人床床頭上面，好易撞到頭，每次起床都要好小心，但最終白熊都係撞到個頭
。放低行李休息一陣後 18:30就出去食晚餐，本來諗住去「禪」食，但係去到已經滿座無位，要等到八點半才有位，所以就改了去アパス食燒肉。入去睇餐牌揀咗好耐，點了個特選牛盛合せ（Special Mixed BBQ）400g 7,000円，啲肉全部都十分肥美多汁，一啖食落去滿口都係嫩滑牛油，好味道呀，呢度有野菜沙律任食，我哋就一啖宮崎牛肉，一啖野菜沙律，食得津津有味，但係個餐啲肉有成 14安士重，份量就多了一點，食到最後有啲「流」，飽到唔識郁，埋單連兩碗飯和兩杯可樂，多謝 8.000円。雖然食咗 8,000円，但係啲咁肥美咁靚的宮崎牛如果係香港食，無千幾蚊港紙都唔洗諗。
食完晚餐本來諗住去便利店買飲品，但沿住大街一路行到酒店都搵唔到，乜呢度一間便利店都無咁出奇，最後只好放棄返酒店，梳洗後上一陣網就上床休息。
今晚入住的スーパーホテル宮崎
酒店正門
停車場，入口係後面橫街，要過咗酒店兜個圈先可以入到停車場，呢度只有 20個車位，如果無位泊就要泊係附近同酒店掛鈎的停車場
車尾有石壆，唔怕會撞到後面的玻璃
不過佢連中間都有，我同白熊洗車時都比佢「cake」跌過
自助 checkin機
浴衣，全部都係一個碼，唔洗揀
枕頭，間房只得一個大枕頭，唔夠的話可以攞多個，軟硬任揀
大堂，明天的早餐就係呢度食
電腦同打印機，同東橫Inn的差不多，不過佢就無白紙供應
房門門鎖，用收據上印的密碼就可以開門
呢兩晚住的房，上層的床係正床頭，人哋就橫樑壓頂，我哋就橫床壓頂，不過白熊話聽日洗完衫有好多位可以晾衫
電水煲連加濕器
洗手間，細到個坐厠要側側地安裝
晚餐就係呢間アパス食
如要叫待應，按下個鐘就會有人嚟
餐廳內部時間尚早，唔係好多人
燒野食喎，當然唔少得杯可樂喇，杯可樂加咗片檸檬，有片檸檬好味好多
沙律任食，當然要去攞番啲喇，兩大碗野菜沙律，汽水要另收費的
有野食喇，特選牛盛合せ（Special Mixed BBQ）7,000円，睇下件件啲雪花紋幾靚，好好味呀
初初搵資料時仲以為個門口係後街，原來係大街都有一個，不過就細好多，唔留意都睇唔到
今日係高千穂峡買的手信
沒有留言 :
張貼留言