行程 : 酒店 → 小倉城 → 魚市魚座(午餐) → 別府八地獄 → 酒店
住宿：東橫inn大分駅前 7,050円
今朝未夠七點就起床，梳洗後約八時就落大堂食早餐，我哋係第一次食東橫Inn 的早餐，聽好多人話佢啲早餐都唔係好差，點知落到去時只見食物種類唔係好多，尤其我鍾意的麵包就只得一款，原來尋晚不是好多客人入住，所以預備的食物也比較少。嚟咗日本已經係第四日，但係仲未習慣咁早食野，攞咗少少野食就算，點知食落口又幾好味，而且大部份食物都係由酒店的姨姨親手做的，好有親切感！
食飽後就返房執好行李 Checkout，之後就去攞車，接待員給了我泊車咭和教了我點樣攞車，原來程序都係好簡單，只要將張咭放埋部機「カードリーダ」do 一下，跟住放張咭入去「カード投入口」就得，點知我呢個大鄉里又搞出了笑話，我 do 完張咭將張咭放咗入去「カード投入口」度等好一陣，但係無咩反應喎，點解呢？唯有又行番去大堂搵人求救，那位小姐一見我就好似知發生乜野事咁，同我行去部機度搞番掂，原來將張咭放埋部機度 do 咭時，要佢個螢光幕有顯示和聲音提示後，先可以放張咭入去，而我可能放得唔夠埋，部機感應唔到，職員打開カード投入口，攞番張咭出嚟，再幫我do多次，等了分幾鐘後停車場度門打開喇，我部車就係裡面，而且仲掉埋頭添，將車駛出停車場後，度門會自動關閉。
09:00 一切搞掂後， set 好個 GPS就出發到第一站～小倉城，架車泊係勝山公園有料駐車場（Tel：093-582-2761），但係離開酒店時部 GPS 仲未有指示點行，唔知轉左定轉右行，最後我選了轉左行（其實轉右先啱），我哋行咗成分鐘佢先有指示，真係好遲鈍(後來研究過，原來在有瓦遮頭既地方set GPS，佢係會唔知自己係邊），但係我哋已經行咗幾條街咁遠，睇地圖原來離目的地遠咗好多，又要兜一個大圈，約 09:20先到勝山公園停車場，這個停車場係先泊好車，然後到入口收費亭取泊車票。
泊好車後就入去到小倉城參觀，入場費 350円，我哋今次只係參觀小倉城，無去隔離既小倉城庭園同埋松本清張記念館。小倉城樓高五層，展出城內的文物和介紹小倉的歷史，最高果層係展望室，城內除了兩幅老虎畫像可以影相外，其他的地方都不准影相。參觀完之後就番去停車場取車，在車場內見到有洗手間，昨天過了一個驚險的一天，都係洗下個車頭玻璃好啲，洗洗下先記得之前補鐘師傅話在冬天揸車要開暖氣吹著塊車頭玻璃，如果唔係會有水氣矇查查，啊～原來昨天塊玻璃咁矇係咁解！抺乾淨塊玻璃後約 10:45就可以再出發，呢個停車場收費首小時200円、之後每30分鐘150円，多謝 350円，呢度有位伯伯係度負責收錢。
今日的早餐就係放在長枱上，左邊就係廚房，好多食物係即做架
我哋的早餐，下邊果份係我的，只係食咗條腸、一舊飯團、沙律、味噌湯同埋一個麵包咋
回收處，食完後就把個啲盆和碗碟放在這裡，而且仲要分類，而垃圾就放入旁邊的垃圾桶
泊車咭
立體停車場入口，架車唔可以高過 2M，長過 5M
泊車控制機，部機左下角就係カードリーダ，右邊係カード投入口
係度門有說明點泊車和取車
do 完張咭後畫面就會顯示運行中，請等一陣
今日的行程路線圖
第一站～小倉城，係勝山金園駐車場泊好車後，要先到收費亭取張票
跟住行去小倉城，這裡有好多古蹟，這是旧第十二師団司令部的正門．鉄門遺跡
白洲燈台
花塜
護城河
小倉城
入口，一行入去上條樓梯就係售票處
入口旁有兩舊木化石，已經有四千萬年歷史
買咗入場券，可以入去參觀
城內唯一可以影的就係這兩幅畫～迎虎和送虎，原來這兩張畫係慶応2年 (1866年)畫的雌雄一對，「迎虎 」(雄虎)和「送虎」(雌虎)。各高4.7M，幅2.9M，這幅係迎虎
送虎
行到去五樓的展望室，原來這裡有紀念印，當然唔可以錯過喇，好彩有帶埋本簿仔姐
小倉城庭園
小倉祖靈殿
參觀完小倉城後就出發到杵築市的魚市魚座(Tel：0978-63-9100)食炭燒海鮮，由小倉市去杵築市大約要 2小時49分鐘 109km，其中一小段要行有料高速，但係我想熟習一下部 GPS ，所以揀咗全程行國道，唔行高速，最後都只係用多了二十分鐘，差不多 14:00就到魚市魚座。
經過了一段時間熟習和又行錯路的經驗後，終於識用部 GPS 喇，原來轉彎時係要睇右上角的指示，最重要的係距離，行到離路口40M~50M時，前面最近的路口就是轉彎的路口，唔好等到 0M先轉，係咁就會行過龍轉唔到彎，如果在橫街多的地方就更加容易行錯路；另外要留意路口係唔係燈位，如果係燈位就會顯示應該行邊條線，如果唔係燈位就要小心，可能係分叉路，要預早選定行車線，例如如果話要轉左的話，在 100M前就要靠定左行，好似我哋去魚市魚座時，行緊條右線時，部 GPS 話要轉左，又無留意係唔係燈位，諗住差唔多到路口時先靠左行喇，點知......原來個路口唔係燈位，在離路口 100M時條路分咗左右邊，變咗兩條路，想行番條左線都趕唔切，結果又行錯路喇。為免行錯路，浪費時間同油錢，白熊係餘下既旅程充當了導航，負責睇住個GPS，部機畫面有咩顯示就話比我聽，等我可以專心留意路面情況，唔洗分心成日昅住架機。
魚市魚座有免費停車場，地下係賣手信和海鮮，二樓才是食店，泊好車後就上二樓食野，坐低後點了壽司拼盆 1,050円、炭燒海鮮魚弍番2,310円，另加一隻帆立貝 420円和魷魚串 315円。點完野食之後店員就入內取出已燒著的炭出嚟，放係張台中間，原來果啲炭係備長炭嚟架！等一陣就可以燒野食，但係啲海鮮點燒嚟食呢？店員見我哋係外國人，有位靚女姨姨在旁邊教我哋點燒，而且仲攞了本自製的說明書出嚟俾我哋睇添，原來啲蠔(カキ)和帆立貝(ホタテ)要先燒平果面，等到有汁出時就取出反轉放在濕布上，跟住用工具打開佢，不過係好熱，要小心打開才可以，除去了平果面殼後就放番係爐上繼續燒，等到個殼上面的汁滾，就用個夾反轉下啲肉，燒多一陣就可以食喇；因啲帆立貝都幾大隻，煮得差唔多時取出用較剪剪細佢，加埋牛油再煮多一陣就OK。原來係咁燒法，我明喇，海鮮就十分新鮮美味，我變身喇！！至於啲壽司呢？味道都唔錯，不過同啲海鮮比，都係啲海鮮好味好多。
靚女姨姨教完我啲點燒後就自己動手燒，幾好玩喎，但係燒燒下有另一位靚女嬸嬸見到我哋雞手鴨腳就行埋嚟幫我哋燒，佢仲好鬼風趣，明知我地唔知佢講乜，佢就不斷用身體語言同我地溝通，搞到我地呢餐食得好鬼好鬼開心！差唔多食晒啲野時覺得唔夠喉，再嚟多一份炭燒海鮮魚弍番，今次真係自己燒喇，啲蠔同帆立貝都係越食越好味，連啲汁都飲晒，我又要變身喇！！！！食晒啲海鮮後我同白熊都覺得好飽好飽，跟住落地下埋單，多謝 6,405円，真係好抵食呀，啲海鮮又新鮮又唔貴，雖然係特登揸車嚟食，但係都係值得嘅。
GPS 轉左指示畫面，注意右上角藍色的指示，路口係燈位，離路口 40M，要選最左的行車線轉彎，這張相係白熊影的，影相時我停咗係燈位度等緊轉彎
要行成三個幾鐘車，途中在這間超市買啲飲品小食充下電
呢間超市啲野都幾平，買咗咁多野都唔洗 400円
到喇～今日食午餐的魚市魚座
係門口掛了條大木魚
點了野食後店員就入去取了一些燒到紅紅的備長炭出嚟
茶係自助的，取了熱茶後，啡白熊就係度等食
店員放了個半邊竹筒係我哋面前當碟用的，好環保
教點燒海鮮的說明書，不過只有日文，好彩淨係睇圖都可以明白
個海鮮セート嚟到已經等唔切攞咗啲海鮮嚟燒，燒咗一半先記得無影相，啲蠔同帆立貝好肥美呀，啲蠔反轉啲肉燒多陣就可以食，再加啲橙汁，係呀，橙汁呀，我都唔知點解係橙汁，不過佢只係俾咗幾瓣橙我哋，無俾檸檬，原來用橙汁都一樣咁美味，而且仲有陣陣橙香添，我唔客氣喇，哇～～好肥美呀
帆立貝燒到差唔多時，用較剪剪開幾份，加牛油燒多陣就食得呀，好鮮甜好美味，好好食呀！！！啲汁唔好晒，飲埋佢，哇～好甜呀，好正呀～～
壽司拼盆 1,050円，都幾抵食
食食下先記得要影下碟海鮮，不過已經俾我哋食得七七八八了，跟住就係要燒蝦喇，當然都係嬸嬸幫我哋燒喇，原來啲蝦係要鹽燒的，燒果時在上面澆啲鹽嚟燒，燒好時嬸嬸仲幫我哋剝埋殼添，真係服務一流，啲蝦好鮮甜呀！係香港都係好少食到咁鮮甜嘅蝦；至於啲魷魚呢，原來係加胡椒粉的，不過啲魷魚啲內好厚肉，要燒好耐先熟
啲魷魚就嚟熟喇，再加啲胡椒粉先，啲魷魚好彈牙，好有魷魚味，好好食呀
真係好食到唔停得口，再嚟多份魚弍番 2,310円，唔記得講呢個set有啲乜，呢個set有四隻蠔，一隻帆立貝，四隻海螺，兩隻對蝦（車海老）和一串魷魚
好野～有得食喇，今次係自己動手燒的，好似特別好食咁喎
等唔切，放晒啲野一切燒，食得好飽呀，呢餐都只係要6,405円，好抵呀
餐美味既午餐食咗成個半鐘，下午三點半出發到別府地獄～かまど地獄，車程約 48分鐘，架車行到去別府市時，個 GPS指咗我哋行條又窄又多彎的小路，窄到剛剛夠兩架私家車過，除了係雙單程路之外，而且仲有好多途人添，一邊行一邊要避車避人，都幾驚險，仲有呢條路有好多分叉小路，而GPS嘅指示又唔清楚，結果行錯了幾次路，好彩最終都可以到達目的地；晚上係酒店上網睇番個地圖，原來去かまど地獄應該沿海邊的小倉街道右轉九州横断道路上山，條路又闊又好行，原來部 GPS設定的路只係會建議路程最短的路，但係條路係點，好唔好行就無顯示。
去到かまど地獄無料停車場 (Mapcode：46 521 509) 已經 16:20，好彩都係預計時間到達，泊好車到入口售票處出示割引券買8地獄共通観覧券，原價2,000円，有割引券平200円，但職員話別府地獄五點鐘關門，行唔晒咁多個地獄，想唔賣比我地，我哋同佢講話無問題，聽日還會再嚟，買完飛後睇下個手錶，仲有四十分鐘就關門，原本我們計劃今日行六個地獄，聽日行較遠的兩個，現在時間唔夠，唯有行得幾多就行幾多。
入到去かまど地獄時剛好有一團韓國旅行團，到處都係人，由其係個足湯，真係想搵個位坐下都無。かまど地獄內的溫泉一共分為六丁目，影完相後就離開行去隔離的鬼山地獄。鬼山地獄內有個鱷魚養殖場，呢個養殖場係用溫泉水來飼養鱷魚的，睇完鱷魚就已經 16:50，見還有些時間，於是行埋白池地獄。白池地獄內有個熱帶魚館，同鬼山地獄一樣都係用溫泉水來飼養熱帶魚，不過啲魚無乜特別，魚街的仲靚過佢好多，行完剛剛好五點，餘下的五個地獄明天先去，跟住行番去かまど地獄停車場取車，然後出發到酒店～東横イン大分駅前 (Tel: 097-534-1045)。
半個鐘車程就到酒店停車場，見到有位叔叔當值，我出示酒店確認書，佢就幫我安排泊車，付了泊車費 500円，泊好車後就拖住個喼去大堂 Checkin。將昨天申請的會員咭和確認書交給接待員，然後只須填寫會員咭號碼和簽名就得，真係快好多呀，俾埋房租7.050円就可以上房休息，我哋返到房放低行李．就出發到大分駅食晚餐，由於午餐真係食得好飽，都未肚餓，故最後決定在便利店買了飲品和麵包返酒店食。
食完個簡單的晚餐，就要做在日本第一次做的事～洗衫，我地預算這個旅程四天洗一次衫。今日係第四日，係時候要洗衫喇，我地攞了呢幾日著過既衫到地下大堂洗手間旁的コインランドリー（投幣式洗衣機），每機 200円洗 38分鐘，洗衣粉30円一包，不過我地有帶洗衣液，所以可以慳番，乾衣機就 100円30分鐘，由於我哋啲衫大部份都唔可以入乾衣機，所以洗完衫後就返上房涼衫，好彩冬天開了暖氣，間房十分乾燥，明天早上啲衫已經乾晒，涼完啲衫已經好攰，不過仲要上網睇日本新聞，霧島的新燃岳火山今朝又再噴發，噴出大量火山灰，今次已經係第四次爆發了，為了安全，我哋最終決定不去霧島。揸咗成日車，真係好眼訓，要早啲上床休息，大家早抖喇，おやすみなさい。
かまど地獄入口旁的大釜
かまど地獄入口，旁邊就係售票處
8地獄共通観覧券，裡面有齊八地獄的入場券
一入去就見到呢個「御幸の鐘」
玩完個鐘後就跟住在指示牌行
點知行咗去手信店，入到去行到最尾就有度門出番就到一丁目，原來佢設計出入都要經過呢間手信店，真係識做生意
山上有個好大個赤鬼，係八地獄都會見到佢嘅蹤影
好大個釜，釜即係依家的飯煲，咁大個，赤鬼都好開胃喎
一丁目，水溫有成90度
睇下啲岩漿係咁噴出嚟
二丁目，唔好睇佢咁細個，無乜水蒸氣，佢啲水有100度架，啲煙吹埋去，佢會出現大量水蒸氣
三丁目，呢個就無咁熱，得 85度，不過啲水藍藍地色，好靚喎，池底
白色的原來係二氧化硅，那些沈積物研究話要經過七十多年才可以形成，池邊白色的物質都係二氧化硅嚟架
四丁目 80度，影緊相時個韓國導遊介紹嚟四丁目，見佢取了枝煙仔出嚟，初初仲為佢係度食煙，原來佢吸了一口煙後，就向住個泉眼吹煙，突然.....在泉口出現好多水蒸氣，奇景呀
五丁目 95度，呢個係噴得最多水蒸氣的溫泉
池邊有個溫度計，真係有成 95度
每年有幾次會大量噴出水蒸氣，池水的顏色會由濃變淡的，點解呢？自然現像喎，無得解
六丁目 95度，啲泉水紅紅地色，啲顏色其實係泉底粘土的顏色
のど．肌の湯，可以放塊面埋去做下 facial
原來呢度的溫泉水可以直接飲的，不過啲水酸酸地，仲有好重鐵锈味，都幾難飲
足の岩盤浴
手足の湯
小食店
有溫泉蛋出售，不過好飽食唔落
かまど地獄的另一個入口，離開かまど地獄後就行隔離的鬼山地獄
鬼山地獄入口
又見到赤鬼，呢個就細個啲，後面就係鬼山地獄溫泉
鬼山地獄，好大煙呀，呢個地獄就只得呢個溫泉
在池邊的樹上有好多雀仔，不過太遠了，唔係係乜野雀
有啲似係麻雀仔喎
用溫泉水飼養的鱷魚，隻隻都好懶洋洋
展覽室，呢間屋係根據馬來西亞沙撈越州傳統建築方法起的
裡面有隻大鱷標本，原來已經有71歲
旁邊還有副鱷魚骨標本
睇完鱷魚後就到白池地獄
白池地獄
呢個一樣好大煙，泉口有 95度，啲泉水對腸胃病和皮膚病有治療效用
鉄輪溫泉開祖～一遍上人像
行完白池地獄後就返酒店，今晚就係住呢間東橫Inn，房間佈置同之前住果間一樣，所以無影房間相
地下大堂的洗衣機和乾衣機
放啲衫褲入去後，跟住入錢就會自動洗衫，乜都唔洗set，38分鐘後就可以返嚟攞番啲衫褲
洗衣機旁有洗衣粉賣，30円一盒，我哋有帶洗衣液，唔洗幫親
沒有留言 :
張貼留言