行程 : 酒店 → 阿蘇神社 → 城山展望所 → 草千里展望所 → 阿蘇中岳火山 → ニュー草千里(午餐) → 米塚 → 酒店
住宿：亀の井ホテル 熊本大津店 5,300円
今朝四點多白熊就爬出被窩，點解？睇日出囉，但係仲未見到日出，於是訓下醒下咁，見到天上厚厚的雲層，諗住今日都睇唔到日出，點知到了差不多七點半終於見到太陽，雖然有好多雲，但都好靚。影完日出後就到地下餐廳食早餐。我們將朝食券交給職員後，被安排到昨晚的枱坐，今餐係自助餐早餐，在枱上已經放了一些日式食物，西式食物就係自助形式，品種不算太多，雖然日式早餐唔係好食得慣，但係啲食物味道都好好味，我同白熊都差不多食晒啲日式食物。
食飽後返房執好行李後就到大堂 Checkout，比埋酒店食宿費用 19,300円（當中300円係溫泉費，浸唔浸都要比架），跟住就拖住個大喼去停車場取車。昨晚氣溫降到零度以下，我地就高床暖寢，架車就係外面露宿，今朝見到整架車都結咗一層薄冰，好彩預早在酒店裝了兩大枝水喉水，放好行李後就立刻幫架車洗白白，啲水沖過架車後啲冰好快容晒，再幫佢抺乾淨，set 埋部 GPS，08:50 出發到第一站～阿蘇神社（Tel：0967-22-0064）。
由於昨日去咗大観峰，所以今日的行程就比較輕鬆，09:10到了阿蘇神社，雖然在網上搵資料時知道有無料停車場，但係去到時只係見到時鐘停車場，不過唔係好貴，每小時 100円，所以就泊咗係呢個停車場，泊好車就係開始遊阿蘇神社，原來個無料停車場就係正神社前面，今日係大年初一，當然要順道拜下神喇～遊完後就到城山展望所（Mapcode：256 797 662）睇風景。
早上阿蘇的日出
雖然有好多雲，但係都好靚
行出露台影日出時覺得好鬼凍，等我攞個溫度計出嚟睇下有幾多度先
哇，有無搞錯，零下 6.7度，凍死人咩，都係返入房暖下個身先
梳洗後就準備落去食早餐，白熊，記得帶埋果兩張早餐券
今日的早餐，呢份係白熊的，盤內的是酒店安排的日式早餐，而漬物、味噌湯、飯同埋鮮奶等等就係出面拎
我的早餐，日式食物每個人都係一樣，我就係出面拎咗麵包同沙津
湯豆腐，天氣咁凍，食番啲熱野成個人暖晒
溫泉蛋，好滑好嫩，好味道
左邊的係燒魚，右邊其實都唔知係乜野，不過都幾好味架
Checkout 後就到停車場取車，睇下個停車場幾大，唔驚無位泊車
架車全身都結咗一層冰，從未見過咁嘅景象，真係大開眼界
今日的行程， 臨回酒店前，順路去多咗一個地方預先探路，就係到咗木之內農園，這個地方是明天第一站要到的
我啲就係泊係呢個阿蘇神社前面的時鐘停車場，收費每小時 100円
泊好車後我地行去時鐘停車場後面條街
原來個免費停車場就係呢個～第一駐車場，就係時鐘停車場後面
三連水車
うなり茶屋前の湧水
第一神陵の神杉，亭內的神杉已經有七百多歲
阿蘇神社
阿蘇神社的大樓門，是日本三大樓門之一，其他兩個係茨城県の鹿島神社、福岡県の箱崎宮
車御祓所，乜野嚟呢，應該係同架車做驅邪的地方
呢度就係同架車做驅邪祈福的地方
拝殿
石鳥居，原來呢度仲有個入口
神幸門，還御門就係拝殿的左邊
今日咁啱又係日本嘅「節分祭」，神社裡有好多酒
各種驅邪物品
嚟到神社當然要求下籤喇，呢度有幾個籤箱，每支籤 100円～300円，點解會價錢唔同呢？唔通貴啲會靈啲？
最後我哋揀了中間的七福神，打開一睇，原來支籤除了有張籤紙之外，仲有個細細隻金色的七福神神像
有紀念印喎，印完就返停車場取車離開
我哋泊咗唔夠一個鐘，多謝 100円，09:40離開神社，10:00就到城山展望所，雖然天空無雲，但係遠處的阿蘇五岳好似被啲霧包圍住，矇查查，唔通同霧島新燃丘火山爆發有關呢？係呢度只係逗留咗幾分鐘就離開，跟住出發到阿蘇中岳的草千里展望所（Mapcode：256 456 854）。
城山展望所
停車場旁邊的食店，今朝只係得我哋兩個人，無其他人，好冷清
阿蘇五岳，好鬼矇
阿蘇市內的農田
去阿蘇中岳時，途經呢間コスモス超市，早前係博多買的暖包已經用晒，於是就泊低架車行下超市入下貨
呢間超市除了大得有啲過份之外，啲野仲好平添，我哋行咗半個鐘頭先捨得走，呢車就係我哋的戰利品
係超市對面的拉麵店旁影的，噴緊煙的就係阿蘇中岳火山
睇地圖呢座山應該係往生岳，白雪雪，好靚呀，估唔到係呢度仲清楚過城山展望所
買完野後就繼續行程，12:45到了草千里展望所，係呢度四圍影下相後就向阿蘇山ロープウェー（Tel：0967-34-0411）出發，車程只係幾分鐘，十分近。我哋計劃係揸車行阿蘇山公園道路上到阿蘇中岳，但係如果條路結冰的話就唔揸車改乘纜車上山頂。12:55到了阿蘇山ロープウェー阿蘇山西駅，架車就泊係纜車站外無料停車場，跟住入去車站行咗一陣，之後返到停車場，見到上山條路無積雪，而且仲有好多車上山添，條路應該無問題，如果路面結冰，規定一定要裝上雪鏈先可以揸車上山。阿蘇公園道路收費 560円，比乘纜車來回要 2,000円平咗千四円添。上山時見到好多人行落山，初初仲以為啲人咁好腳骨力，唔坐纜車，原來.....。在火口西駅旁的無料停車場泊好架車後就行去火山口，個火山口噴出大量的煙，等了好耐先等到啲風吹散啲煙，見到個火山口的水，原來啲水係綠綠地色架，睇完後跟住其他人行，初初以為仲有其他野睇，點知行下行下，好似唔多對路喎，原來果啲人係參加旅行團，坐纜車上山，然後自行行落山，於是我地就行番轉頭返停車場取車。
上山中途停低影的往生岳，山下面的草地仲見到有好多馬係度食草
阿蘇市
今日天色真係好好，睇到呢座山好清楚好靚，忍唔住又停低架車影多張相
草千草展望所，係停車場附近都積滿了雪
阿蘇市，之前我哋就係係對面的城山展望所影相，依家就係呢度影番去對面，感覺好有趣
烏帽子岳
噴緊煙的就係阿蘇中岳
停車場旁的鞍形山，細細座，有啲似香港的馬鞍山
阿蘇山ロープウェー駅，就係係呢度搭纜車，裏面有手信店同埋洗手間
料金所，上山要俾 560円
就到山頂喇～
火口西駅旁的無料停車場
停車場前面就係中岳火山口
火山危險信號，依家係黃色信號，如果轉咗紅色就要湃湃聲撤退嘞
呢個牌係講解阿蘇山中岳火山口的危險性和退避壕的地圖
我哋由呢條路行去火山口
在火山口旁的退避壕，即係避難所
路邊有個小小的神社
到咗喇，個火山口好大好多煙呀
望番轉頭，下面就係火口西駅和無料停車場
地蔵菩薩
風向風速儀，今日唔係好大風
終於有陣風吹散啲煙，睇到個火山口喇
啲水係綠綠地色架
原來呢度得 2.5度，但係陽光普照，唔係覺得好凍
中岳附近的山嶺
中間的盆地積滿了雪
見到其他人睇完火山跟住行呢條路，以為有其他景點，我哋咪跟住行囉
點知....行行下見到條路原來係行落山的，我哋係揸車嚟個喎，做乜要行落山咁儍，我哋就行番轉頭返去停車場取車
行完阿蘇中岳火山，我地到草千里（Mapcode：256 456 829）食午餐，只需幾分鐘車程就到。但係在停車場口想俾錢時職員竟然唔收，手指指咁指住ニュー草千里同講咗啲聽唔明既日文，唔通今日泊車唔洗俾錢咁好，於是我哋就泊咗係ニュー草千里前，跟住就入去搵野食，ニュー草千里地下係賣手信的，餐廳就係二樓，上到去時我哋就俾比啲食物模型吸引住，睇到都覺得好好味，嚟到熊本當然要食赤牛喇，最後就點了一個牛ロース燒肉定食（脊肉）1,380円和牛カルビ燒肉定食（肋間肉）1,680円，買了食券後就揀了個近窗邊的枱坐，等一陣就有得食，哇，啲牛肉份量都唔少喎，牛カルビ就比較肥美嫩滑，而牛ロース就係瘦了一點，燒得熟一點就會有點韌。
我哋一邊食午餐，一邊留意住個停車場，見到其他遊人係先泊好車，然後才到收費亭俾錢，食飽後行去收費亭俾番啲停車場費 410円，真係好唔明，點解唔係入場時收錢呢，對於我哋呢啲大鄉里遊客嚟講，真係一頭霧水。
我哋係附近行下， 15:20出發到米塚（Mapcode：256 515 792），車程不用 10分鐘就到，架車落緊山見到米塚好靚，山頂有個凹位，成個反轉咗既飯碗咁樣，點知搵到個避車處停低架車後，行番上去有個牌的位置就無咁靚，只係普通山一座，睇唔到個凹位，早知我哋一見到就咁泊係路邊影張相。
草千里停車場入口
我哋就係呢度二樓食午餐，見唔見我哋架車呀，右邊果架就係
好多野呀～，食邊樣野好呢？心大心細添，就要右下面果兩個燒肉定食，買票時職員話俾我哋知原來個食物模型係四人前，即係四人份量，如果一個人前的話祇有四分之一份量
買完票坐低後啡白熊係度等食
有野食喇，呢個係牛ロース燒肉定食 1,380円，啲肉比較瘦
牛カルビ燒肉定食 1,680円，睇下啲脂肪紋幾靚
食得喇，カルビ啲肉都好肥美好好味，不過都係唔夠昨晚嘅赤牛肉咁正
食飽飽後就四圍行下，停車場入口對面的草千里ヶ浜，依家變咗一大遍雪地
阿蘇中岳，原來真係好近咋
呢度仲有其他的餐廳和手信店，我哋食午餐的ニュー草千里係最右邊
阿蘇火山博物館，係草千里最左
草千里のりば，去阿蘇中岳經過時都見到有馬，但係依家就連馬影都無隻
臨走時想買支鮮奶飲下，於是入咗去草千里グリーンパーク買鮮奶，呢度有幾種鮮奶出售，阿部牧場出產的鮮奶 240円
阿蘇高原牛乳 180円
係阿蘇當然要買番支阿蘇鮮奶喇，唔～～好濃奶味，正～
到咗米塚喇
影唔到個碗底添
影完個黃禽禽的米塚後就到今晚入住的酒店～亀の井ホテル 熊本大津店 (Tel : 096-294-3301)，行行下見依家只係四點多，於是就順道去阿蘇いちご畑～木之內農園探下路，到了士多啤利園後問清楚明天開門營業時間和摘士多啤梨細節後就繼續行程返酒店。
今次揀亀の井ホテル 熊本大津店呢間酒店有三個原因，一是近明天要去的木之內農園，二是酒店價錢是全個旅程最平的，三是停車場是無料的。到了酒店泊低架車後就到二樓接待處 Checkin，接待員的英語非常有限，可能酒店很少接待外國人，不過加埋我地啲有限的日語同身體語言都溝通到，比咗今晚房租5,300円，攞埋鎖匙就返房。上到房間四周圍睇下有啲咩設施，點解搵唔到條上網cable線嘅，於是到接待處問下，原來係要俾500円按金先可借用，明天交番條 cable線時就會退回按金，俾咗按金後就拎住條cable線返上房。今晚我哋唔打算出外吃晚餐，因為午餐食得實在太飽了，所以打算今餐食在超市買的撈麵和杯麵做晚餐，估唔到啲麵又幾好食喎，比香港賣的好食好多，食完晚餐後上網睇下 TVB網上直播新聞後就上床休息。
到了亀の井ホテル 熊本大津店，停車場任泊，唔洗登記架
張床都幾細，比東橫Inn的細好多，不過房租咁平，係咁架喇
其他設施都算幾齊，不過就無加濕機，今晚臨訓時要搽多啲 cream先得
洗手間，一樣都係咁細
今晚的晚餐撈麵和杯麵，後面的燒そば（撈麵）好好味架，係超市買時做緊特價， 98円咋，真係好抵
沒有留言 :
張貼留言