行程 : 酒店 → 別府八地獄 → 狭霧台 → 金鱗湖 → 由布院湯の坪街道 → 九重夢大吊橋 → 大観峰茶店 → 酒店
住宿：ホテル角萬 阿蘇内牧温泉 19,300円 (一泊兩食)
由於今日計劃天黑前要去到阿蘇，行程又十分緊密，所以今朝六時半就已經起了床，梳洗後七時多就到大堂食早餐。今日的早餐選擇比昨天多，唔知係唔係已經習慣了咁早食野，所以今餐食多了一些，食飽飽後就返房執好行李到大堂 Checkout，取埋泊車咭就去攞車，有了上次的經驗，好快就搞掂，坐上車set好部 GPS約 08:30就出發到血の池地獄（Mapcode：46 552 802），車程約半個鐘。
離開酒店時個 GPS 又好似昨天咁，遲遲都無指示，好彩係去血の池地獄的路我仲記得點行，出到大路時果部儍儍地的 GPS仲話我行錯路添，明明記得係咁行，一於信自己，過了分零鐘個 GPS 自己重新設定後，就叫我一直行，都話我無行程路喇，真係俾佢吹漲！
揸咗兩日車，已經行了二、三百里，係時候要入油了，之前果兩日都有留意油價，唔同地區價格都不同，大約 138円～145円，好貴呀，較平的油站好多都係自助式，而且有好多油站都沒有標價，所以都無特別想去邊間油公司入油。離開酒店後我哋一直都係沿著慢線行搵入油站，見到間 ENEOS油站，雖然無標價，但見唔係自助式油站喎，於是就駛入去，同職員講：「レギュラー，まんたん(満タン)ください」和「Cash」就得，職員趁部機入緊油時仲會用條毛巾幫我抺下車頭玻璃添，入油一共入了2,940円，睇下張單原來入了20.85L油，每公升油 141円。
09:20 到了血の池地獄，架車泊咗係龍卷地獄前面的無料停車場，我哋先到龍卷地獄，入場時職員話龍卷地獄會在 09:45噴發，仲有成二十幾分鐘，建議我哋先行去血の池地獄，咁我哋就離開龍卷地獄行去血の池地獄，唔好以為好遠，不用半分鐘就到，入到去時行咗一陣就有團韓國旅行團入咗嚟，都係快手啲影相，唔係人多就影唔到喇。影完相後已經 09:35，時間差唔多，就去龍卷地獄睇間歇泉，行到個噴泉口時已經有十多人係度等，在附近影下相，到了 09:45時個龍卷地獄真係噴發呀，又幾準時喎，個噴泉噴出大量的熱水，滿天都係水蒸氣，真係好壯觀呀！
今日的早餐
行程，今日要由大分市揸車到阿蘇市 129km，要揸成四個多鐘頭車
第一站～血の池地獄
在門口的木刻赤鬼，不過唔係紅色喎，唔通係青鬼呢！
血の池地獄入口
又見到你喇～係度影番張相留念先
血の池地獄
原來啲泉水係紅色架，所以呢度就叫血の池地獄
山邊有條小瀑布
水池度養咗兩條鯉魚添
點解呢度有個石磨呢？唔知有乜用途？
赤鬼石枱石櫈
原來依度有個足湯
泉眼有個好得意的赤鬼公仔
離開時見到呢個好樣衰的赤鬼，好易嚇親細路，應該係前面放個牌寫住「家長指引」先啱
紀念印，呢度一共有四個印，揀邊個印好呢？
時間差不多，行番去龍卷地獄
龍卷地獄就只係得呢個間歇噴泉景點
夠鐘喇，開始噴發喇
好利害呀！
睇完噴泉後約 09:50就離開出發到山地獄（Mapcode：46 521 440），不用十分鐘就到，行到去個路口時見到山地獄，但係個 GPS話仲未到喎，部 GPS 又出錯呢？泊好車就入去行下山地獄，呢個地獄除了個溫泉之外，仲有個用溫度水飼養的動物園，啲動物隻隻都好得意可愛，遊完後就行去隔離的海地獄和鬼石坊主地獄，要行幾分鐘先到，原來係海地獄和鬼石坊主地獄中間有個大型停車場，側邊還有山地獄的另一個入口，應該係呢個停車場泊車先啱，原來部 GPS無錯呀，係我錯先啱。
山地獄
入到去就見到呢張長櫈，呢兩隻熊仔好可愛，見到咁大枝雪榚就好想食，不過都係睇完啲野之後先食
裡面有個小型動物園，呢度同之前的地獄一樣，都係用溫泉水嚟飼養動物的，大象呀，行埋去就聞到好大陣臭味，有無人得閒同佢沖涼呀
呢兩隻美洲駝（羊駝）係度望乜野呢？
紅鶴
毛色好紅呀
鴨？？唔記得影佢個日本名添
河馬，佢好鬼死懶，郁都唔郁，見到佢個頭上面有塊紅蘿蔔都唔食
啲紅蘿蔔 100円一份，本來都想買嚟餵下河馬，但係見到佢咁懶，都係可以慳番
有好多孔雀呀
可惜睇唔到佢開屏
好大煙呀
啲水蒸氣原來係石頭中間噴出嚟的，喎～所以呢度就叫山地獄
連個地下都有煙出
回程買了巨峰雪榚食300円，啲雪榚好濃提子味，好味
呢度有好多野食賣，啲溫泉蛋 100円兩隻，平過かまど地獄
海地獄
入到去見到有個大水池，仲以為就係海地獄，原來仲未到，水池後面噴緊煙果度先係
在水面有個盆喎，上面仲有好多隻青蛙，見到池底同個盆都有好多銀仔，日本人真係乜野都可以攞嚟祈福
呢個先係海地獄
在溫泉邊有枝竹掛著個籃，用來煮溫泉蛋？唔係，原來只係俾人影相的道具嚟咋
呢度有好多鳥居
上邊小路仲有好多個
原來係山邊有個神社
白龍稲荷大神神社
神社旁邊的神像，睇個樣好似係狐狸嚟
在離開時見到有大鬼蓮的指示牌，話啲大鬼蓮的葉大到細路仔坐上去都唔會沈，右邊的小路上山，見到前面有好大煙，行去睇下，原來呢度有個溫泉，啲水係紅色架，同血の池地獄的差唔多顏色，影完相後就去睇大鬼蓮，不過好失望，唔知係唔係唔啱季節，水池上面的蓮花好多都枯萎了
足湯，今日趕時間無得浸
旁邊有毛巾賣，每條 200円，無帶毛巾都唔怕
在海地獄門口有極樂饅頭賣
由海地獄行去鬼石坊主地獄唔洗一分鐘，在入口前的小賣部，呢度有鬼石坊主地獄名物～蒸し寿司
真係用溫泉嚟蒸架
鬼石坊主地獄
呢個地獄的泉眼係泥漿嚟
山地獄？行完八地獄後，發覺其實佢地的溫泉好多都好相似
行到尾有個大泥漿池，呢個先係鬼石坊主地獄
足湯
買票時問職員取了這張地圖，一面是地圖一面是可以吸紀念印，終於集齊八個地獄的紀念印喇，好野！
行完八地獄差不多十一點，係時候出發到金鱗湖，因為行高速只是比行國道快幾分鐘，所以選行國道，可以慳番七百幾円，而且仲可以順道去埋狭霧台（Mapcode：46 301 725）添，設定好 GPS後就出發。途中見到路的兩邊都鋪滿了雪，好彩今朝無雪落，唔係就要出動雪鏈，行了半個鐘頭就到狭霧台，係狭霧台可以望到整個湯布院的景色，但係天氣唔係幾好，有好多雲，望落去啲景色矇矇地。
影完相後就出發到金鱗湖（Mapcode：269 359 553），由狭霧台揸車去都只係十五分鐘程，呢度有兩個停車場，一個係時鐘停車場，每小時 200円，另一個係每日每次 300円，我哋決定係時鐘停車場泊車，泊好車後就開始遊下金鱗湖，仲以為天氣咁凍，金鱗湖湖面會有霧氣添，可惜無呀，有啲失望，金鱗湖如果無果啲霧氣的話，就同一般湖無大分別，行一陣就返停車場取車，因為唔想行咁遠，遊完金鱗湖便揸車到湯布院駅搵停車場泊車，然後再逛由布院湯の坪街道。
去狭霧台途中，兩邊山邊鋪滿了雪，好彩條路無雪啫
到了狭霧台喇
停車場旁邊的手信店
前面就係湯布院喇
影完風景後就揸車到金鱗湖，我哋泊咗呢個時鐘停車場
係前些少仲有個停車場，一日 300円
金鱗湖
湖邊有間ペンション金鱗湖 豊の国溫泉酒店，可惜 jalan.net無得訂呢間酒店
在水上的鳥居，右邊就係天祖神社
遠處山邊有好多水蒸氣，呢度原來都係溫泉區，住係度的人每日都可以浸溫泉，真幸福
金鱗湖環湖散策圖，今日唔夠時間行，都係下次嚟先慢慢行
離開金鱗湖後就到湯の坪街道，在搵資料時知道這裡有好多小型停車場，每日每次 500円，但係沿途都唔多覺眼有，最後差唔多到由布院駅先見到有個時鐘車場，唔埋喇，一於係呢度泊底架車，呢個停車場收費每30分鐘100円，好彩都唔係好貴。12:05 泊好車後先到由布院駅，唔知係唔係呢個車站都係景點，我哋無買車票都可以行入去月台影相，係車站逗留了一會，都唔見到架観光辻馬車，有啲失望。
影完相後就到 B-Speak買蛋糕，點解一早就買，睇完其他人的遊記，話 B-Speak的蛋糕好快就賣晒，所以我哋咁早買。去到B-Speak店內都有唔少人，排了一陣間隊就到我哋，本來想買細size的原味和朱古力味各一件，兩樣味都可以試下，點知話只得大size，所以只係要了原味 1,380円，跟住沿著湯の坪街道慢慢行。一邊睇野一邊影下相，原來之前在網上見的停車場就係湯の坪街道呢條街，而且仲有好多添，還見到一個在橫街的小規模無料停車場。
差不多 12:45見個肚已經好肚餓，於是就到田舎三昧食午餐，由於今日不是假日，唔係好多人，入到去搵了個窗口位坐，研究一輪餐牌後最後點了豊後牛たたぎ膳(冠地鷄めしの「おにぎり」2個付き) 2,400円和冠地鷄めし膳 1,550円，咁即係叫咗乜野呀，其實我都唔係好清楚，只係睇圖知道係一個豐後牛餐和一個雞餐，等了一陣有野食喇，這裏啲食物好好味，雖然貴了一點，但係都係覺得好抵食。
食完野出嚟，開始下毛雨雨，本來諗住搵下間 Hello Kitty專門店，但係行到差不多到金鱗湖都搵唔到，啲雨越下越大，只好放棄，（番香港上網搵番啲資料時，先知原來間 Hello Kitty專門店 さんりお屋係金鱗湖附近，原來我差唔多就行到）行番去停車場取車，一共泊了一個多鐘，多謝 400円，13:55 離開停車場時發生了小意外，撞車？唔係呀！！真係大吉利事，在停車場出口俾錢時，將 500円入咗落部自動收銀機，佢竟然食咗我啲錢，救命呀，點算好呢？好彩個天對我都不薄，剛剛有兩個職員係度搞緊部機，見我入咗錢都無反應，就自動幫我哋搞，那兩位職員幫我拆開部機攞番果 500円出嚟，然後再入番落部機，搞掂喇，真係唔該晒，攞埋收據後就出發到九重“夢”大吊橋（Mapcode：269 012 125）。
我地就係泊係呢個停車場
由布院駅
停泊在月台上的黃色電車
呢個景都唔錯
呢度周圍都有無料手湯，等我地暖下雙手先
間鋪頭上面有個好大個既啤酒樽
白色鳥居
呢隻貓好受觀迎架，係呢條街見到兩次
貓貓好可愛呀！
有好多handmade貓貓肖像的產品
行無幾遠就到B-speak，入去買湯布院名物先
買咗喇，睇下啡白熊幾開心
Monchhichi專門店
哇))))有好多monchhichi公仔
どんぐりの森
係門口有隻大龍貓
有好多宮崎駿出品的公仔
龍貓
魔女宅急便的黑貓
呢度都有鬼太郎商店
又見到佢喇!
又有手湯
Cotton Bear 都有唔少分店
成雙成對的花道祖神，好恩愛呀
我哋就係呢間田舎三昧食午餐
呢間係一間好有日本特色的食店
點完野食後又係啡白熊影相留念時間
白熊的午餐豊後牛たたぎ膳 2,400円，呢個餐有燒豐後牛、凍豆腐和冬菇
仲有味噌湯和兩件冠地鷄めし飯團，都有幾多野食
我的冠地鷄めし膳 1,550円，有冠地鷄めし飯，凍豆腐，冬菇，兩串燒冠地鷄和味噌湯，呢餐樣樣野都好好味，好飽好滿足呀
呢碟就係燒冠地鷄串，啲雞肉好嫩好有雞味，真係食雞有雞，好味道呀～～
去九重“夢”大吊橋我哋又係揀了國道行，又可以慳番 450円，大約 55分鐘就到，比起行有料高速只係用多 10分鐘，14:00到九重“夢”大吊橋；我哋由國道 216號左轉行國道 40號，條路就變得又窄又多彎，真係扭軚都扭到手軟，而且仲有對頭車，路的兩邊鋪滿了雪，路面又十分濕滑，真係要好小心咁行才可以，好彩無落雪咋，如果唔係，真係今晚都唔知趕唔趕得切去到酒店。
今次係用電話號碼嚟 set 部 GPS，行完條又窄又多彎的路後就見到有九重“夢”大吊橋的路牌，但係部 GPS話仲有成幾百米先到，點算好呢？今次我就信下佢喇！點知......又衰咗，到咗目的地竟然係一個空地，乜都無，下次都係用番 Mapcode 嚟定位，我哋只好掉頭行番轉頭，好彩唔係行咗好遠，好快就行到之前的路口，一行入去就係無料停車場，停車場大部份地方都積滿了雪，只得少部份車位可以停泊，泊好了車後就去買入場券 500円，之後就開始行下條吊橋，呢條橋橫跨於鳴子川溪谷，吊橋長390公尺，高度173公尺，號稱日本第一，四季的風景都不同。
行到上條吊橋就感受的「高處不勝寒」又大風又凍，而且條橋仲有少少左搖右擺，好彩都唔係郁得好利害，無覺得唔舒服，我哋行到中間點就回程，無行到去對面，臨取車前到手信店行下，一場嚟到日本一吊橋，當然要買番啲手信喇。
這裏是售價處、手信店和我地急需要的洗手間
好大的停車場，不過好多地方都積咗雪
九重“夢”大吊橋入場券，兩張的風景都唔到架
九重“夢”大吊橋，開始行下呢條日本一
山邊有多條瀑布震動の滝(雌滝)，係夏天時呢度啲風景應該會好靚
九醉溪
震動の滝(雄滝)
對面山
條橋唔係好闊，只夠兩個人行
到咗中間點喇，好鬼凍呀，唔想變雪條，真係要回程返轉頭
行返到橋邊時，見到山邊啲雪又白又滑，好靚呀
係手信店買咗杯焦糖芝士布丁嚟食，哇～好好味呀！乜成日都係呢句呀，不過真係好好味呀，好滑好好濃奶味同蛋味，真係唔識用第二句嚟形容
九重“夢”大吊橋限定和菓子和芝士蛋榚
15:45離開九重“夢”大吊橋，出發到今晚入住的溫泉酒店～ホテル角萬 阿蘇内牧温泉（Tel : 0967-32-0615），車程約個半鐘，由九重町去阿蘇要行一條又多彎又要上千四米高的山路，又係要考驗駕駛技術的時候，在編行程時我最憂心的就係這段路，因為條山路有千四米高，而兩邊的山又有成千七米高，分分鐘都會下大雪，不過我都話個天對我不薄喇，雖然半夜有下雪，但係日間沒有下雪，條路只係有些濕滑，無問題「大丈夫」。
做完手部運動後（不停咁扭軚），16:20 行到ミルクロード路，見仲有些時間，應該可以去埋大観峰茶店（Mapcode：256 878 383），於是就停在路邊重新設定部 GPS，終於在 16:35到了大観峰茶店，大観峰茶店五點就關門，要爭取時到，快步行到展望台睇下阿蘇全景，阿蘇的天氣唔係幾好，好多雲，視野麻麻，有啲矇矇地，睇完風景後就返停車場取車，剛好五點就離開大観峰茶店，出發到ホテル角萬 阿蘇内牧温泉。
去到長者原，爬過前面呢座高山係係阿蘇，山頂鋪滿了雪，真係有啲擔心
好彩條路無積雪，個心安樂晒
睇下個 GPS畫面，條路真係多彎到暈，行完呢段山路後有啲手軟
及時趕到大観峰，仲可以睇埋日落添
大観峰茶店，唔夠時間入去睇野，係茶店旁邊是無料停車場，左邊的小路行去展望台
行了一段路就到
大観峰最高點標石，高939.91M
呢度睇風景一流，前面就係阿蘇市和阿蘇火山，可借今日天氣麻麻地
影番後面，左邊的就係大観峰茶店，原來都幾遠喎
離開大観峰後揸多十五分鐘就到酒店，今次又有少少問題，就係搵唔到個停車場入口，架車就到酒店前面，但係部 GPS就要我係前面路口轉右，諗住佢會帶我哋去到個停車場入口喇～點知，佢只係帶我哋去到酒店後面條街就收工，今時今日咁嘅服務態度係唔得架，於是我就圍住酒店行了一個圈，終於搵到個入口喇，原來係酒店前一個路口轉右就係（Mapcode：256 785 089）。
酒店有大型免費停車場，唔怕無位泊，泊好車攞埋行李到大堂接待處辦手續，俾了封確認書佢地，搵了好耐先搵到我哋的約預資料，搞掂後同接待員講我哋架車泊咗係停車場，洗唔洗登記，佢哋竟然話唔洗，原來係可以任泊的，咁外面的車都可以係度泊車？
攞埋房匙準備上房，有位先生帶我哋到升降機，順便簡單講解一下酒店的設施，之後我哋就返上房。今晚係住乜野房呢，其實未入房都唔知，點解？原因我哋係訂了馬刺＆赤牛溶岩焼き 懐石プラン 和室なのか？洋室なのか？19,000円，即係可能係和室或和洋室，任由酒店安排，比起指定訂和室或洋室平了1,000円。
原來今晚係住和室呀，仲係十疊和室添，好大呀，而且仲有個向東的小露台，可以望到阿蘇五岳，風景很美呀，放低行李換過浴衣後就到地下餐廳食晚飯，今餐係訂了馬肉刺身和赤牛溶岩燒懷石料理，將條房匙給職員看一看後，佢就帶我哋到窗邊的枱坐，原來張枱上有我個名架，真係好 warm，枱上已經放了一些食物，初初以為今餐只係得咁少野食，咁當然唔係喇，懷石料理喎，我哋坐好後職員就陸續上菜，真係好多野食呀，掛住食，都無數下有幾多款，只係知大約十多款。
今餐係溶岩燒，當然有燒牛食喇，職員幫我哋點火後，就叫我哋將果幾件赤牛放上去燒，好香呀，啲牛入口即溶，好好味呀～弊～～我又要變身喇，食完赤牛輪到馬肉刺身，生馬肉真係食唔慣，試了一件馬刺後，將其餘的燒熟嚟食，點知......真係好鬼韌，雖然味道都不錯，但係o趙咗好耐都o趙唔爛．早知就唔燒熟佢喇。
呢餐真係食得好飽，返上房時見到酒店職員已經幫我哋鋪好了床舖，休息一陣就到貸切風呂浸溫泉。酒店有六間免費貸切風呂，可以一家人一齊浸，今日終於可以同白熊一齊浸溫泉喇，每個風呂都有獨立更衣室和沖身的地方，六間貸切風呂，分別是鎮魂の湯、洞窟の湯、子宝の湯、岩神の湯、露天の湯和ひのきの湯，今次我哋揀了ひのきの湯，浸完後就返房，休息一陣，睇下電視飲下茶，差不多九點半就食埋個B-Speak蛋糕做宵夜，明天仲要早起睇日出，都係早啲上床休息。
今晚入住的酒店～ホテル角萬
酒店大堂入口，我就係企咗係停車場入口影的
我哋就係住呢間十疊的和室
地方好寬敞
向東的小露台，除了可以睇日出外，仲可以望到阿蘇五丘添，正呀～
個梳妝台竟然係露台，但係怪怪的
同之上次入住的鬼怒川溫泉酒店一樣，浴室同廁所係分開的，中間有個洗手盆
浴室
廁所，不過就比較窄了一點
沖廁時上面係有水出架，應該係用來洗手的，之後的水就係在下次用來沖廁，不過都係到洗手盆先洗手好啲，都唔知係乜野水嚟
今日的晚餐～馬刺＆赤牛溶岩焼き懷石料理
好肥美的阿蘇赤牛，真係入口即溶，仲好食過午餐食的豐後牛
下面的係和菓子，上面的係不知名的漬物和日式蒸蛋
美味的刺身，至於味噌湯，白飯和茶就係自助的，可以任飲任食
開始食喇，放啲赤牛同蔬菜上去煮先
差唔多，食得喇，真係好～好～味呀！
燒魚和蔬菜天婦羅
呢碗係乜野呢，裡面的係魚肉呢，好好味架，但係啲湯就好淡
甜品，已經唔係記係乜野，只係記後係類似布丁，上面一邊加了奇異果醬，另一邊就加了士多啤利醬，好好食架
食飽後返到上房時，職員已經幫我哋鋪好了床舖
休息了一陣就落去浸溫泉，大型溫泉天の湯，今日我哋唔係浸呢個溫泉
跟住就去我哋浸的貸切風呂，著燈的即係已經有人，最後揀了ひのきの湯，入到去鎖好度門，外面呢盞燈會自動著
呢個溫泉四周係木製的，不過就係露天的，晚上氣溫凍咗好多，初初出到去真係凍到變雪條，快手快腳沖乾淨個身就落去浸溫泉，呀～成個人暖晒，好舒服呀～～～
今日的宵夜～B-Speak蛋榚，祇識用好好～味嚟形容，蛋糕香滑，軟棉棉，蛋味非常濃郁，忌廉滑嘟嘟，有機會一定要encore
係酒店買的戰利品，呢啲留番係香港時先慢慢食
沒有留言 :
張貼留言