行程 : 酒店 → 太宰府天滿宮 → 光明禪寺 → ロボスクエアRobo Square → マリゾン Marizon → 福崗塔 → 酒店
住宿：Sunroute Hotel Hakata (ホテル サンルート博多)
今朝七點起床，梳洗後八時多就到二樓的餐廳食免費早餐，這間食店是日式的，要除鞋才可以入去，出示早餐券後女侍應就帶我哋入去，初初以為要坐地下添，原來張枱下面有個大窿用來放腳的，咁就無咁辛苦，早餐係日式早餐，有飯同湯，而且只有兩款選擇，咁早我就無乜胃口，只係食咗少少就算，白熊就唔同，成份食晒，利害利害！
食飽後就返上房執好行裝，約九時多出發，今日第一站係太宰府天滿宮，先乘地鉄到天神駅 200円，然後穿過地下街到西鉄福岡駅乘西鉄到太宰府駅 390円，約10時半就到太宰府。先到天滿宮前的商店街行下，當然要買梅枝餅同埋梅味雪糕食喇～。
食完野後就行去天滿宮，沿途都有好多人，入到大殿時仲見到好多人係度排隊，行去龍頭睇下搞乜科，原來係排隊祈福，估唔到日本人真係好守秩序，連祈福都排隊；今次嚟天滿宮除了參觀影下相之外，最重要的就係嚟祈求這次自駕遊順順利利，安全無事的，所以我同白熊也跟住排隊祈福，之後就去買交通安全平安符，預備明天將符掛在車內。
早餐券
今日食早餐的日式餐廳
我哋就係坐呢個雙人位喇，下面有個大窿，唔使跪坐咁辛苦
水吧，有汽水燈汁咖啡任飲
坐好後啡白熊係度等食
我的早餐，炒蛋配火腿，但係有飯有味噌湯，日式配西式，怪怪的，而且啲蛋係凍的，好難食，只係食咗少少就食唔落
白熊的就係燒魚，味道還尚可以，白熊就食晒份早餐，真利害
條燒魚燒得都唔錯架，睇下啡白熊眼金金咁流晒口水
返上房執好行裝就出發，在博多駅買了兩張 200円車票就出發到天神駅
坐三個車站就到天神駅
穿過天神地下街一直行，不過要留意指示牌，旁邊還有另一條地下街
行約三四分鐘就到，跟住乘扶手電梯上番地面，一上去係三越地庫，再上多一層就係西鉄福岡駅
買了車票 390円後就可以入閘
入閘後第一件事就係睇下指示牌，我哋要到 3號月台乘10:00 去大牟田特急列車
旁邊還有指示話到太宰府要在二日市換車
開去大牟田的特急，未上車前見啲坐係反方向的，仲以係要坐倒頭車，點知入去見到其他人將坐椅背拉前，好似天星小輪啲長櫈咁，變番向前
到了太宰府駅後，一出車站就見到這塊木板，土曜市，即係乜野呢？唔埋喇，去遊下太宰府
太宰府駅
車站前的空地
今日係星期日，所以條路封咗，變咗行人專用區
原來呢度有間鬼太郎商店
鬼太郎和鬼眼老爺
星君鼠
這裡還有龍貓店，可愛的龍貓
各款龍貓手巾
見到這間雪榚店有梅雪榚賣
我哋買了嚟試下，但係～～味道怪怪地，「梅」味十足
旁邊有熱鮮奶賣
見凍凍地，買了杯嚟暖下
這些雀仔又得意喎，原來係風鈴嚟
這間是賣梅枝餅的店鋪，見咁長龍，應該係好好食
原來啲梅枝餅係即製的
我哋又排隊買番兩個嚟試下
熱辣辣，外層脆卜卜，裡面軟綿綿，紅豆餡，又幾好食喎
食完野就行去天滿宮
神牛，昨天係櫛田神社都見過
見到遠處有部好可愛的單車的士
過埋這條太鼓橋就到
橋兩邊好多這樣的東西，每個上面的字都唔同架
路旁的寺賀社
前面就係天滿宮，今日都有幾多人喎
樓門，呢度門前有個好大既葫蘆，啲人都係穿過個葫蘆入去
原來呢度舉行緊厄除大祭，加上是星期日，所以好多人
淨手地方，洗下手先去拜神
御本殿
條石橋細細條，又幾得意
絵馬掛所，係絵馬寫完願望就掛係呢度
哇～好長龍呀，白熊，我哋快啲跟住去排隊囉
就嚟排到喇，祈望今次行程順利，無意外發生
祈完福後就買番個交通安全平安符先，有好多種，大大細細，最後揀了這個
拜完神後就行去光明禪寺，在商店街尾轉右直去就係，我哋只在禪寺的前院行下影下相就算，沒有入內觀拜，跟著就回程返福岡天神駅。到了天神區後已經下午一點多了，有些肚餓，於是行去大丸百貨地庫食午餐，食飽後才出發到福岡塔(福岡タワー)。
跟住路牌直行就到光明禪寺
門口
寺廟的入口，入場費每位200円，我哋無入去，只在外面行下
前面的碎石畫了一些圖案，以前係用來防盜的，當有人行入嚟，就會知道
高腳樓，有無留意下面收埋咗啲野呀
原來係維修用的瓦片
神像
鐘樓
鳥居，後面的唔知係供奉乜野神呢？
行下完回程，行行下見到地下的梅花圖案的渠蓋
到了車站，返福岡天神車費 390円
要在二日市轉車
等等下車突然下起雪來，而且都幾大吓，白矇矇，又幾靚喎
落在衫上的雪，好快就溶
返到天神區，在大丸百貨地庫食午餐，呢度有好多野食，最後選了這間
點解選呢間，其中一個原因就係有位坐有水飲喇，可以舒舒服服咁食番餐
啲野嚟喇，日式炒麵(焼そば) 420円
日式燒餅(お好焼き) 420円
食飽後就到天神バスセンター前的 1A巴士站乘巴士(302番、305番)到福岡塔 220円，總站在TNC放送会館。我們在總站落車，先行去ロボスクエアRobo Square。ロボスクエア 在TNC放送会館的二樓，免費入場，館內展出好多電動玩具，而且有些還有得玩添，真係大人細路的樂園，行咗一陣後聽到有廣播，原來係機械狗跳舞表演 ，動作十分有趣可愛，跟住是機械人表演，那些機械人可以做多種不同的動作，真係大開眼界。
睇完機械人後就到隔離的福岡塔，點知原來出面好大風好凍，我同白熊好快變咗兩條雪條，行到去福岡塔後在便利店買啲野食暖下，見時間尚早，只是四時多，於是到海邊的マリゾンMarizon行下影下相。
バスセンター前的 1A巴士站
巴士嚟喇，305番福岡タワー
白熊，上車時記得要攞整理券呀，唔係落車時就會好麻煩
橙色的箱就係整理券機
落了巴士入到TNC放送会館就見到ロボスクエアRobo Square的海報
乘扶手電梯到二樓
一上到二樓就見到ロボスクエアRobo Square
放正係門口的係 Hello Kitty
這裡放了不同年代的機械狗
1999年第一代的機械狗
2002年代的
場內中間放了好多不同種類的機械人
機械企鵝
除了會四圍行之外，個肚仲有隻蛋添
呢個機械人Robovie，不過無出嚟表演
有機械狗跳舞表演呀，佢哋的動作好搞鬼
最後嚟一招「黃狗射尿」
跟住係機械人表演，先嚟個掌上壓
再嚟個倒立
睇完後落地下，另一邊有好多卡通公仔
夾公仔機，不過呢部係控制個小機械人嚟夾公仔，幾好玩咁喎
離開 TNC 後就見到福岡塔
福岡塔入口
裡面有好多手信賣外，還有大板的通天閣神像
好大條壽司卷呀，原來係特別版2月3日日本丸かぶりの日壽司
因為個身覺得好凍，想食杯麵和豬骨湯，問過店員得知有熱水供應，所以就買了嚟食，唔知係唔係我哋好凍好餓之故，覺得特別好味
還有時間，於是行去福岡塔後面的マリゾンMarizon
呢度都幾大，不過一個人都無
由公園行落去海邊，見左右兩邊樓梯，令我想起北九龍裁判法院以前常用來拍戲的地方
好靚呀，好有歐洲 Feel
Marizon側面
在マリゾンMarizon 影福岡塔，又幾靚喎
旁邊還有個靚沙灘，不過天氣咁凍，個沙灘鬼影都無個
海邊就只得幾隻海鷗係度搵野食
另一邊的沙灘，一樣都係無人
都係海鷗的世界
約五點就返福岡塔，在購票時我哋出示在網上列印的割引券，女職員問了我哋從那裡來之後，只收我哋每位 640円，諗咗好耐都唔明，割引券有九折，即係720円，而家只係640円，平了80円，點解呢？睇番個收費表，原來外國人只要出示護照，就可以用團體票的價錢640円來購買入場券，比割引券還要平。
在地下乘電梯到五樓展望室，五樓咁矮，係呀，唔好以為成座福岡塔咁高有好多層，原來佢真係一座塔，成座建築物大部份只係鋼架，只有塔頂幾層咋，五樓展望室 123M高，可以好清楚睇到福岡全景。
影完相後睇嚟好快就天黑，於是就搵了個位坐等天黑，等了半個鐘，個天開始黑，影相時間又開始到喇，影完福岡夜景就離開福岡塔乘巴士返博多，在車站附近的一間拉麵食晚餐，食飽後就返酒店，執好行李後就上床休息，明天要開始自駕遊，好緊張呀～
福岡塔紀念印
情人鎖
售票處
售票處有情人鎖(愛鍵)出售，每個 1000円
買咗飛，可以入場喇
福岡塔內部，底層全部都係鋼架
五樓展望室的放情人鎖地方，旁邊還有得求籤
マリゾンMarizon
福岡市
太陽落山喇
雖然個天仲未黑晒，不過都幾靚喎
個天黑晒喇，影出嚟仲靚
中間的就係Marinoa cityマリノアシティ
見唔見到呀?有個發光摩天輪果度就係嘞
睇完相後就落三樓影下個「恋人の聖地」，這裡還有個固定的腳架提供，可以影番張雙人相留念添
旁邊還有好多情人鎖，五樓的就一把鎖都無，呢度就放到滿晒，唔通鎖係呢度會靈驗啲
福岡塔夜景，真的好靚呀，真係好佩服自己的技術
今日晚餐就在這間博多駅筑紫口附近的拉麵店食
我要的拉麵 480円
白熊要的明太子拉麵 780円，的麵唔錯，湯又夠味，正
餃子(ぎょうざ) 350円
沒有留言 :
張貼留言