行程：香港 → 九州福岡空港 → 酒店 → 川端商店街 → 櫛田神社 → Canal City → 酒店
住宿：Sunroute Hotel Hakata (ホテル サンルート博多)
早上五時起床，梳洗後乘的士到機場，約六時多就到，辦好手續和把行李寄倉後就過海關，因時間尚早，海關不是有好多人，很快就搞妥。今日的早餐在麥記食漢堡包，食飽飽後見尚有時間，所以沒有坐無人駕駛列車，改為行去登機閘口。原來禁區內也有佈置新年裝飾，而且還有「香港掠影」和「粵劇舞台美術展覽」，於是便看完這兩個展覽，再繼續行去登機閘口等上機。
飛機準時九點起飛，香港至福岡需時三個多鐘頭，加埋日本快香港一小時，下午一時半就到福岡機場，福岡機場不是很大，很快就過咗海關，在離境大堂影完山笠後就乘免費接駁巴士到國內線機場，再轉乘地鐵到博多駅(250円)，去到酒店都只係兩點幾，仲未可以 Checkin ，我們於是放低行李去食午餐先，食飽飽才回來Checkin。
香港機場內的新年裝飾
過咗關先到麥記食早餐，今次終於唔使再食大家樂喇
禁區內也有新年裝飾
行行下見到有野睇，見仲有好多時間，於是行去細心欣賞，這個係「香港掠影」
對面就係「粵劇舞台美術展覽」，展出好多有關粵劇的用品
蝴蝶盔和鳳冠
綠石頭飾
金錢劍、金錢葫蘆和金錢扇
黑地繡金龍坐車靴，睇下個鞋底好鬼厚
淺棕色顧繡文生鞋
淺綠色繡花鞋
紅地顧繡蹻鞋
馬鞭和白地綠片車旗
藍地疏片大漢裝
粉紅地疏片海青
睇完展覽後就行去登機閘口等上機，今次係 50 號閘口上機
呢架就係今次坐的港龍機，俾個登機橋遮住，只可以影到個機尾
飛機起飛後，空姐給了我哋今餐飛機餐的餐牌
原來今餐係早餐，份量不是太多，白熊的雞肉腸奄列
我要咗中式點心
食飽後就開始填寫入境紙，填好後就安心訓下覺，過海關時才知黃色果張入境紙原來係有中文版的，點解嚟咁多次日本係飛機度無人俾過份中文版我哋嘅
福岡呀，到喇～
福岡市，左邊的應該係博多車站
離境大堂內的山笠
原來都幾巨型喎
觀光案內所
影完相後行去搭免費接駁巴士到國內線機場，由觀光案內所旁邊既門口一出就係巴士站，好易搵
落咗巴士後覺得好鬼凍，買枝熱飲暖下先，這枝檸檬茶好有檸檬味和茶味，幾好飲架
到了地鐵站後在自助售票機買了兩張車票 250円，只是兩個車站就要250円，好貴呀！
在博多駅落車後，行到月台尾的筑紫口出口，好野，有扶手電梯喎，唔使做咕哩
離開車站後行兩三分鐘就到酒店，但我地實際係用了十多分鐘才到，點解？因為酒店只在門口放了塊好鬼細又唔起眼的招牌，而酒店附近的其他酒店都有好鬼大塊的招牌，相對就十分不起眼，最搞鬼的就係企係酒店門前面揸住地圖搵都見唔到，以為果度係第間酒店，結果在門前行來行去，才無意中睇到果塊爛鬼招牌，搵緊酒店時，仲忽然落起飄雪添。
酒店門口原來係依度
未夠鐘 Checkin 上房，放底行李後職員俾了塊 100 號的牌我哋
放低行李後，我地回到JR 博多車站預先搵下過兩日辦租車手續的地方，就係車站內的總合案內所，問過當值的小姐確定無錯後，就行去一蘭拉麵食午餐，由筑紫口穿過車站就是博多口，落到地下街搵咗一陣就搵到，食店內不是太多人，無人排隊，入到去時先在自助售票機前買食券，不過搞咗好耐先買齊食券，買票時有位靚女待應係旁邊一直等緊帶我哋入去，真係唔好意思。入到去點好麵的味道後等一陣就有得食，效率十分高。碗拉麵原來真係好好味呀～～，唔怪得每個人嚟遊九州都一定嚟一蘭食拉麵，不過啲麵我就略覺得硬了些，下次再嚟時要剔少軟。
總合案內所，過兩日租車手續就在這裡辦，不過諗咗好耐咁點樣攞車同還車呢，滿腦子都是問號（答案請看 Day 3 遊記)
博多駅地下街一蘭拉麵，事後睇番呢張相，覺得有些奇怪，點解門前塊招牌布反轉咗嘅
店內的自助售票機，我哋買票時入咗張一千円紙後按了制後，打算再入錢買第二張時，點知～～部機竟然自動嘔番啲尾數(找錢)，後面又有人等緊，咁點算好呢？唯有行開俾人哋買票先，唔好阻人哋喇，就咁等咗一陣先買到第二張食券
今餐我同白熊都是拉麵，另加一隻半熟蛋
一蘭內的坐位比較窄，在入口度有免費Locker
這部機係顯示空席的位置
每人一個獨立位，等我地填張「品書」，剔下對碗麵的「要求」，品書有中文版，唔驚唔識填
填好後就按右下角的制，我哋當然唔識喇，店員留意到我地係外國人，昅住我地填「表」，見我地填完就伸手接，我地係在等食時才發覺呢個制
未食完時又要離席一陣的話，就要放這張咭在枱面，如果唔係碗麵會俾人收咗
有得食喇，湯色很濃很香，好味呀！上面仲有三塊叉燒添
白熊的同我一樣，不過佢就多咗隻蛋
隻蛋的半熟，好嫩好滑，正！
白熊好利害，成碗麵食晒不得止，連湯都飲晒，原來個碗底寫住「この一滴が最高の喜びです」
臨番酒店前在便利店買了今日飲的水和朱古力小食
這兩晚住的房，張床比較細
其他一般的電壺、風筒、雪櫃、電視同上網cable等等都齊備
唔好以為日本酒店的洗手間間間差唔多，有啲好鬼細架，呢間都算幾寬敞
燙褲板，第一次見
Checkin完離開酒店時已經三點半了，只餘下半天時間，所以只去附近的川端商店街、櫛田神社和 Canal City。在博多駅乘地鐵到中洲川端駅(200円)，出閘後在 5 號出口出，一上地面就係商店街口，旅遊書話川端商店街內有好多間老店，不過我就見到有好多好多賣放神像櫃的店舖。
在街中間有間出名的川端ぜんざい広場，裡面有個巨形山笠，還有出名的紅豆湯店，只在星期六、日和假期才營業，我哋當然要試下喇，這裡的紅豆湯好鬼甜，不過和只有糯米味的年榚一起食味道就剛剛好。
去中洲川端駅買的車票
只係兩個車站就到中洲川端駅
離開車站後先到街口馬路邊影下川上音二郎的銅像
在街口見到有藥店，第一時間走入去買咗兩包暖包呢幾日用
川端商店街
在街中間位置的川端ぜんざい広場
自助售票機
買了兩份ぜんざい，即係紅豆年榚湯
買完票後就交俾這位嬸嬸
等食時四周影下相，這裡是自助式的
店內的巨大山笠
上面有好多鬼神公仔
有得食喇～見到其他客人都自己出去攞的，不過嬸嬸就送到我哋張枱，仲特登問我地要唔要匙梗，可能一眼就知我地係大鄉里外國人，之前我地一入嚟仲幫我哋斟埋茶添，碗紅豆湯煲得好綿好靚，如果無咁甜就 very good
行到街尾就係櫛田神社，見到個門口有個好大的面具，啲人出入都係經由塊面具的口行入去，我哋有樣學樣，跟住人由個口入去神社，見到裡面掛滿了燈籠，仲有兩個好大嘅山笠添，原來2月3日係日本的除厄大祭，即係用炒過的黃豆撒向人扮的紅青鬼度，代表除去一年的厄運，2月3日我哋應該係阿蘇，無得參與。
櫛田神社
入口處有個面具，見啲人由個口入去，唔知係乜野意思呢？不過唔理喇，我哋都學人哋一樣咁由個口行入去
在入口旁的賣燒餅小食店，見到好多人幫親，我諗應該好好食掛，不過我哋兩個都好飽，所以無買嚟食
入口兩旁放滿了酒，日本人好鍾意用酒來祭神的
瑞獸
鳥居
旁邊放了兩個大山笠
後面的山笠，原來兩個都唔同樣架
停車場還搭了個棚
呢度仲放了好多酒
淨手處，拜神前記得要洗下手呀
神牛，係好多神社都會見到
馬，呢隻就少見啲
神社內掛滿了燈籠
神社大殿
以前都無留意，原來神殿前面係掛住條咁粗的繩
自助求籤機
呢度有個靈泉鶴之井，見到啲人直接飲用這裡的水
神社旁的大廈露台掛了兩個好似掃把的東西
櫛田神社的正門
正門前原來也有個大面具，咁得意，真係唔知乜野意思
行完神社後就去 Canal City，由神社行去只係兩三分鐘路程，到了後諗住先到姆明餐廳食完下午茶，但係 Canal CIty 好似八陣圖咁，搵了好耐都搵唔到，好彩在看商場地圖指示牌時，有位職員行埋嚟主動幫忙，我指一指下行程紙的姆明餐廳ムーミンベーカリー＆カフェ後，佢就帶我哋行到去餐廳門口，真係唔該晒。
跟住行去五樓的拉麵競技館ラーメンスタジアム食晚餐，競技館內一共有八間拉麵店，真係花多眼亂，最後選了初代だるま，買了食券後入去搵位坐好後，睇見貼在牆上介紹的燒黑豚腳的相，睇落好好味咁喎，而且只是 380円，不是太貴，一於試下。行番出去買了食券後等了一陣啲就有得食，碗拉麵味道都唔錯，不過不是豬骨湯底、味噌湯底或係醬油底，食完都唔知係乜野湯底；至於隻燒豬腳就只是一般的，沒有太大的驚喜，食飽後本來打算行去商場附近的台屋行下，點知行錯路搵唔到，只好放棄，由商場行番去酒店只係十多分鐘，番到酒店已經八點多了，梳洗沖涼後就上床休息。
Canal City 商場
B1F - 41 的姆明餐廳ムーミンベーカリー＆カフェ
前面放了姆明一家同歌妮
點解姆明個樣變咗又肥又婑嘅
由於仲係好飽最後決定唔食下午茶，只係入去睇下啲飾物，在賣姆明飾物的地方原來有另外一度門通去一間精品店
上5樓的拉麵競技館的扶手電梯
入口係一隻好大的拉麵碗
在競技館的中間放了個東西，唔通係呢度的吉祥物
今餐晚餐就在這間拉麵店食
我要咗普通的拉麵 600円
白熊的叉燒拉麵(チャーシューめん) 800円
燒黑豚腳 380円
行番酒店時見到間店鋪前面放了隻好大好大的招財貓，足足有三呎多高，都係第一次見
在便利店買的食品，右邊的是乳酸菌飲品，味道有啲似益多多，而且又可以幫助消化，這十多天行程全靠呢支食品先可以食得咁多野咋
沒有留言 :
張貼留言