船費：來回HK$40
去蒲台島要在香港仔坐船去，星期六早上只得早上十點的一班船，所以一早就出門，坐地鐵在金鐘站落車，然後轉乘 70 號城巴，過了香港仔隧道見到香港仔避風塘就落車，約九點半到了碼頭。
在碼頭等了一陣就可以上船，船程約一小時，船起航後船上便會有職員來賣票，外來人都是買來回票，每位 $40。約十一點就到蒲台島，由於驚會暈船浪，所以沒有食早餐，落船後好肚餓，諗住去到食番碗美味的糖水才出發，點知 ......，成個島得一間酒家營業中，仲好像是剛開舗，無得選擇，只好在那間酒家食午餐。
食飽後就起程，先在左邊的山路上山，經棺材石，到了山頂的觀景亭，這條山路不是太難行，行了約一個鐘就到，休息一陣後就繼續行程，原來落山的路全是樓梯，都唔記得有幾多級了，只知行到隻腳軟，行完這條長樓梯後見到有條分叉路，一條去南角咀，另一條返碼頭；蒲台島出名的景點『佛手岩』、『靈龜上山』及『僧人石』都係在南角咀的，當然不可以不行喇。
行完幾個景點後就回程返碼頭，係碼頭坐下休息，乘四點的船返香港仔，之後轉乘巴士回家。
香港仔海濱公園的往蒲台島的碼頭
上船前睇下船期表先
隻船到喇～
可以上船，當然係坐上層，揀個靚位坐先
開船喇～經過香港仔出名的香港仔畫舫
海蝕洞，真係好大喎，成隻船仔都可以駛入去
海洋公園的過山車，下個仲有個好大好大的海蝕洞
赤柱半島的衛星通訊站
離開赤柱後坐多半個鐘船就到蒲台島，這是天后廟
見到碼頭喇
第一次嚟蒲台島，好緊張呀！
上到碼頭後首先睇下幅地圖，今次我哋係行呢度呢度....，計畫好就起行
好野！有糖水豆腐花食，而家好肚餓呀，點知無開檔
離開碼頭時見到這棵大樹，真係好大棵
係碼頭係仲妹記糖水喎，點解唔見嘅，原來這些都只係星期日營業，今日星期六無開門，無得食
無得食唯有行下條漁村，睇下有無其他野食，近碼頭的村屋好多都破爛無人住
見到間好特別的小屋，屋內放滿了好多神像
離開碼頭較遠的地方才有人住，這間屋外面掛了幾隻臘雞
這家就掛了好多隻魷魚係度曬
真係好肚餓，去了唯一有營業的明記海鮮酒家食午餐
嚟到蒲台島當然要點紫菜湯
另外要了碟炒飯
酒家出面是個沙灘，見到少女與狗係沙灘玩耍
食飽就起程，向棺材石出發
上山的路不是太斜，不太難行
中途休息時望番落去，原來蒲台島漁村唔係好大
沿途都大指示牌
棺材石
就到山頂喇，努力加油
山頂的觀景亭
係呢度風景好靚
條樓梯好斜呀
好長好長的樓梯，都唔知有幾多級
這條是返碼頭的小路
在海灣內停了幾隻遊船，呢度d水十分乾淨清晰，最佳的遊船河地點
呢舊石好似隻腳板
見到有個亭可以休息下，之前落樓梯隻腳真係好攰
終於見到第一個景點『僧人石』，呢個角度唔多似
『靈龜上山石』
『佛手岩』
南角咀石灘，呢度好大風，吹到好唔舒服，都係回程返碼頭
坐四點船，約五點返到了香港仔，跟住轉巴士回家
沒有留言 :
張貼留言