旅行社：油麻地旅遊
團 費：HK$119 + 小費 HK$15
行 程：大學站碼頭 → 吉澳 →東平洲 → 大學站碼頭
今次的旅程要 8 時 30 分在大學站美心集合，所以早上 6 時半就起身，梳洗後就坐地鐵轉東鐵。東鐵十分多人，幸好準時到達車站，到了美心，見到那裡人山人海，有好多不同的旅行社都係在這裡集合，找了很久才找到我要找的旅行社，點了名後人齊夠鐘，就浩浩蕩蕩地行去碼頭。
由東鐵站行去碼頭都幾遠，幸好安排很好，沿途都有多名職員帶領，唔會行錯路。到了碼頭時已經有隻大船係度等緊，因於太多人的關係，上船都用了二十分鐘，人齊後就開船向吉澳出發。
原本的行程是遊完東平洲後，才到吉澳食午餐，但是導遊話因下午太多團係吉澳食飯，所以就改了先去吉澳食飯，哇～11 點鐘食午餐，早唔早 d 呀，不過無辦法啦！食完一餐不過不失的海鮮餐後，見有少少時間，雖然導遊事前話遊完天后廟才買手信，但是我們決定快手快腳先去買了些咸魚、魚乾和菜乾做手信，應該都是國內產品，不過都十分香。遊過了無開門的天后廟後就返碼頭，中途買了導遊推薦的茶果，但係就十分多人，買完後就回碼頭，在路口看到另一檔有多種味道的糯米滋， 忍不住買了些上船食。 上到船後發覺原來我哋係最遲上船的， 無位坐，要坐側邊位添
今次帶咗懶惰熊及懶散熊去旅行
去東平州要成個幾鐘船，中途先到吉澳食午餐，原來係吉澳可以見到鹽田港
吉澳碼頭，已經有好多遊船係度
吉澳漁村
吉澳唯一的村落
一上碼頭就見到這間專賣茶果糯米滋，因太早，只係睇下，諗住臨上船先買
開餐喇，十個人一張枱，我哋係第一個到
食完海鮮餐後就去天后廟，可惜無開門，無得入去睇
唯有影下個香爐，兩邊有龍，夠古色古香
間廟牆上有好靚的陶瓷公仔
呢隻係咩呢？真係唔知
吉澳另一個出名的景點～姻緣樹，原來是在天后廟前面的空地，一次可以去晒兩個地方
睇完後就行返去碼頭，行行見到吉澳水警警崗
仲有吉澳村公所
臨上船前買番一些茶果食先
砵仔糕
當然仲有茶果喇
買咗 d 上船食
係碼頭有個幾乾淨的洗手間
我哋坐的船，有兩層，都幾大隻
在船上食了些糯米滋及茶果，唔知係唔係食飽搭船，有些暈船浪，唔舒服。到了東平洲後，先遊東平洲名勝『斬頸洲』，行了差不多20分鐘，但是到了『斬頸洲』，有好多人上同落，行唔到落去，由於時間不太足夠，導遊改了去『龍落水』。
因為到『斬頸洲』時我們是隊尾，大部份團友都係前面，而家轉頭改去『龍落水』，我地反而變了在隊頭。又行20分鐘小路，終於到了『龍落水』，行下影下相，行了一陣就回程。今次我們是最早上船的一批，可以揀個好位坐，等到人齊後就回程返大學。這程要坐 1 小時 45 分鐘，大約5點40分到碼頭解散，跟住坐東鐵返屋企。
坐了成個鐘頭船，終於到咗東平洲喇
這裡是受保護的海岸，禁止好多活動
東平洲都有警崗
這裡的岩石好特別，其他地方是沒有的，全島這裡最特別，值得一遊的好典型的沉積岩
這些沉積岩，全香港只有東平洲有
大塘村，但係這裡已經沒有人住，只是星期六日假期時，才有村民返嚟開士多、食店做生意
村民留下的舊雪櫃
行去斬頸洲時見到這些特別的路燈
金絲貓呀，好耐無養了
行行下見到有些紅屋
門口寫住係政府產業，唔知有乜野用呢？
途中見到有地圖，睇下我哋而家係邊度先
見到斬頸洲喇，不過果度真係好多人，行唔到入去
唯有改去龍落水，成個島主要都係得一條路
行到龍落水，個景都幾靚喎
龍落水果條龍其實係一個斷層
條斷層一直伸到落水，由上面睇都幾似條龍
呢有都有好多沉積岩
九孔鮑魚呀，活生生的野生鮑魚都係第一次見
碼頭附近見到棵樹生咗好多菇，唔知叫乜野名呢，食唔食得呢，睇睇下有 d 肚餓添
回程時差不多太陽落山，係海上影日落真係好靚
