行程：香港 → 福岡空港 → 博多 → 門司港 → 酒店
今早四時多起床，梳洗後檢查好行裝就起程出發。乘的士約五時半到達機場，時間雖然很早，但機場已經有很多人，到了香港快運的櫃台更是排長龍，幸好不是用了太多時間就辦妥手續。過了海關，先到麥記買打算在飛機食的午餐，但是見到買野食條長龍就頭暈，原來太早的關係，其他的食店還未開始營業，所以旅客們都沒有其他選擇。排了半個多小時，才買到兩個漢堡包。
本來打算先到附近閘口的飲水處裝熱水才到T2，但行行下覺得都要行幾遠，心想新大樓應該都有熱水，所以就直接到登機閘口。原來決定是錯的，T2只有凍水供應，真係晴天霹靂，點算好呢？最後只好搭無人駕駛電車番去T1。一來一回差不多用了二十多分鐘，本來打算到了登機閘口後，吃自家製花生醬三文治做早餐，不過回到登機閘口已經差不多夠鐘登機，唯有上機先食。
新春期間，機場也粉飾一番
在麥記買的了兩個漢堡包做午餐，而自家製花生醬三文治是早餐，不過趕唔切吃早餐，唯有兩樣都帶上飛機食
還準備了朱古力粉，在飛機上可以慢慢嘆下
在T1跟住指示直行一段路才到，都幾遠！
今次要去新大樓登機，坐無人駕駛電車，到總站落車
白熊唔好行咁快啦，等埋我呀，前面就有飲水機，唔使咁急啦！
蒸餾水機，我開熱水制先，唉！凍冰冰嘅？？原來無插電制，無熱水，點算？？要返舊大樓攞熱水，我暈啦
今日係新大樓 205閘口登機
在飛機上用餐，果汁，就連水都要錢，而且價錢也不平宜，一枝蒸餾水要HK$20.0，都幾貴，空姐會不停推住架飲料車仔行嚟行去，唔知仲以為可以免費添；看到隔離座位一對夫婦預定了飛機餐，但係個餐真係少得可憐，食完唔夠飽，還要另外加多個杯麵才夠；幸好我哋沒有預定飛機餐，食完漢堡包後就飲熱朱古力，白熊諗住慢慢嘆下，點知俾空姐見到，即刻被提醒，不可帶食物飲料在飛機吃或喝。吓！？乜原來唔可以係飛機上食非航空公司食物？不過佢講完就行開，沒有阻止白熊繼續飲。
到福岡航程差不多要3小時15分鐘，今次班機都幾準時，約十二時多就到福岡機場。海關又不是有很多人，很快就過了海關和攞埋行李；我和白熊先到觀光案內所攞下旅遊資料和地圖，下次再來九州，可以預先做下功課。
在等機場免費巴士到 T1 時，見到旁邊的巴士站有巴士去博多駅，原來除了乘地鐵外，還有巴士，回程時可以多個選擇；這架免費穿梭巴士真係行得好慢好慢，真係人行都分分鐘快過佢，由 T2 去 T1 差不多要十多分鐘才到，真係可以瞓下覺先。
在飛機上有 JR九州 PASS出售，而且還有特價添，差不多有 92 折，平咗 HK$45.00，比旅行社買的還要平
填入境紙，白熊話唔想填，要我填晒
出境大堂的總合案內所，這裡有很多九州各縣的旅遊資訊和地圖，我和白熊在這裡攞了很多資料，回家後可以用來準備下次的行程
Suica 西瓜咭現在已經可以在福岡使用，除了地鐵外，巴士一樣可以通行，真係很方便，所以今次帶埋張咭同我哋一齊旅行；到了福岡空港駅，首先幫張咭增值，到了博多駅後轉乘JR到門司港。原本打算在車站買便當在電車上食，之前在網上見到有新幹線限定便當出售，白熊話要買嚟食，但係去了多間便弁店都搵唔到，又揀唔到啱心水，最後到了便利店買野食算了。便利店內有很多種類的便當，而且還可以幫你用微波爐番熱，仲有即炸的小食，蒸包和關東煮，有很多選擇。
買完午餐之後，行番去車站買車票，到門司港要由博多駅坐JR特急列車，然後在小倉駅轉乘普通列車到門司港駅，車費 1980円；另外還有一種 2枚きっぷ，到門司港來回只需 3080円，一個人來回平了八百八十円。出發前在網上搵定資料，做足功課學下如何操作售票機，但係到買票時，發覺同網上教學有些不同，付款時發覺金額不同！點解貴咗咁多？原來係最後揀是否指定席時我按錯咗，又要重新開始，搞了差不多十分鐘終於買到車票了，可以入閘啦。
去到月台時架特急列車音速號 ソニック已經係度，列車有分指定席和自由席，我哋買的是自由席，所以要行到去 4號車廂才可以上車，放好行李喼坐好後不久就開車，跟住當然係開餐啦，日本的電車係可以飲食，有部份還會有車務員在車上出售便當添。
智能咭增值機，由於我只有一萬円紙幣，所以要用呢部機才可以增值
博多駅，站內有很多儲物 Locker，如要放低行李沒問題
站內原來有多間駅弁當店，店內有很多不同的便當，白熊話想買新幹線限定便當，但係搵唔到，好失望
買門司港車票，參考了網上資料，買這 2枚套票比較平宜，兩個人去門司港來回只是 5760円，平了 2160円
在這部機買，先按左邊第三個紅色制開始，跟著指示再按下去
車票，兩個人一共四張車票，有效期一個月
入閘後睇下指示牌，特急 ソ二ツク 係 2號月台上車
架車已經係月台，白熊，要搵自由席車廂，唔好去咗指定席呀
車廂內有行李架，等我放好件行李喼先
坐好開車後就開餐，今餐係便利店買的，每件都有獨立包裝
炸雞件，好嫩好多汁，好味
炸牛肉餅，一樣好食，最重要係新鮮炸的，仲熱架
壽司和乳酸飲品，這餐只係用了 500円
雲海呀，啲雲好似水咁係山頂流落嚟
一邊食野一邊欣賞風景，約五十分鐘就到小倉駅，落車後，係對面月台見到去門司港的電車，一落車就可以上另一部，真方便。去門司港只係三個站，很快就到。原來我哋係第一次嚟門司港駅月台，之前自駕遊，只係在車站外面影下相，原來車站內有站長服裝借用作影相留念，當然不會錯過。
同一路線的電車有不同的車種
這架睇嚟是舊款
車站月台，個頂係用木做架，夠晒古色古香
SL 28627號蒸氣火車的主動輪，在 53年7月解體時留下作展品
「旅立ちの鐘」，在1914年正式開業起，便已經設立了此鐘，「旅立ちの鐘」(出發之鐘)。隨著時代變遷，進入平成之後，這座鐘開始被賦予了其他的象徵，由於門司港車站是鹿兒島本線的起點，因此對於許多即將升學，婚姻，工作和新生活的人來說，到門司港車站來祈求一切「順心如意」
幸福の泉
哇～好多銀仔呀！好多人係度祈福
人力車，門司港以前的交通工具，可以坐上去的影相留念
車長人形紙板，我又影番張留念下先
有服裝借用，仲有帽可以借嚟影相，全部免費，任影任借！
車站附近食店的立體地圖
影完相就出發到酒店，由車站行幾分鐘就到，不是太難搵。酒店附近有間好大間藥房和超市，要買野入貨好方便。在博多時天氣不是太冷，但係到了門司港係凍咗好多，而且又好大風，行行下仲下起雨。
去到酒店，辦妥手續上到房間，休息一陣就出發。先到附近的超市行下，本來打計劃影下門司港夜景，和在附近食晚餐，但係啲雨越下越大，氣溫就更加凍，所以只好行超市時順便買埋晚餐返酒店食。很久沒行日本超市了，足足行了兩個多鐘頭才返酒店，食完晚餐梳洗後就上床休息。
行去酒店時見到這部自動售賣機，以為有麵包超人飲品，原來只係一般飲品，包裝加了麵包超人的 Logo
酒店旁有間好大間的超市，一陣可以行下
今晚入住的酒店～ホテルポート門司
大堂係二樓，無升降機，要行樓梯，點算？無法，要做苦力搬行李喼上去
原來地下用來做了車場，還有幾部洗衣機可以供住客免費使用
仲有乾衣機添，免費架
酒店大堂
櫃台旁邊有些小食出售，肚餓又唔想行可以幫親
門匙和早餐券
房間不是太細，設備齊全，唔錯
當然唔少得部大電視
最好係有窗，可以睇下出面風景，無咁侷促
茶具齊全
茶包，伊藤園煎茶，名牌子
電熱水壼
還有兩支免費水供應
枱底有支常備燈，在停電時緊急用
個天花有做咗批盪，真係好少見
拖鞋，日本的酒店多數會這類可以再用的，環保麻
洗手間，比東橫INN的大
洗澡洗髮用品齊全
牙膏牙刷，樣樣齊全
風筒裝係洗手間內，唔可以係廳使用
走廊有幾部風扇給住客借用，咁凍仲要用風扇？
酒店斜對面有間大型超市～ハローデイHalloDay
這隻綿羊仔ハロッコリー，係間超市的吉祥物
好多剌身呀！又新鮮又平，臨走時買番盒返酒店食先
好多士多啤梨，花多眼亂
最後揀咗左邊較大粒較紅的，多謝 880円
蛋包飯，日本的小孩很喜歡食的食物，出了急凍產品，隨時食都可以
今日在超市買的戰利品，原來啲煮干除了可以用來煮湯外，蒸嚟都好好好味架（不過要買細條的）
今晚的晚餐，買咗兩個青森縣蘋果，雖然是貴了少少，但真係又甜又爽，好好食
上一篇 : 16年九州福岡新春四天悠遊行～預備篇
下一篇 : 16年九州福岡新春四天悠遊行 Day 2
