行程：酒店 → 下關 → 唐戶市場 → 門司港 → 博多 → 酒店 → 博多城 → 酒店
今天七時多起身，梳洗後到酒店餐廳食早餐，搵咗位坐好，侍應先給每人一份早餐，這早餐份量和種類都很少，只有一碟沙律，一隻雞蛋和一杯咖啡；至於麵包就自助形式，不過款式就得兩三款，不過沒問題啦，免費早餐是這樣的，而且今日要留肚到唐戶市場食美味的海鮮。
早上窗外的景色，個天好多雲，希望唔好落雨
可以遠望門司港レトロ展望室
酒店餐廳
我的早餐
白熊的，其實兩份早餐都係差不多，只是麵包有些不同
酒店大堂有部微波爐，買了食物後可以到這裡番熱，如果早些知道，昨晚的豬扒飯就不用凍冰冰
還有電腦可以用，設備都算齊全
這些茶包只在早餐時段免費供應
初初還以為係按摩椅，原來只是一般普通的椅子
食完早餐返房執好行李到大堂 CheckOut，跟住在酒店寄存好行李，出發到唐戶市場。今日氣溫比昨天低了十多度，而且又大風，真係好鬼凍，雖然由酒店行去碼頭只是幾分鐘路程，但係我同白熊足足行了十多分鐘，全身被風吹到凍冰冰，行到碼頭時見海面很大浪，有點怕船太抛會暈船浪，不過船程不是太遠，應該頂得到。我和白熊在售票大堂一邊買船票，一邊暖番個人，夠鐘開船時個人已經暖番，可以出發；由門司港到下關船程只需十多分鐘，而且船長技術又一流，航行得很穩定，沒有暈船浪。
到了下關後就到唐戶市場食午餐，途經カモンワーフ時見到有一兩個街頭藝人正準備表演。到了唐戶市場，景象同我五年前到過的真係有很大的分別，上次睇錯時間，平日嚟到，成個市場冷清清，人都唔多個，但今天係星期日，市場就很熱鬧，有很多店舖營業，真係人生人海。
早上的超市～ハローデイ
隔一條街還有一間很大的藥房，成座都係，好誇張
特色餅店，有很多很美味的西餅麵包出售
途中還經過一條商店街～栄町銀天街
門司港駅，進行緊維修工程
関門汽船碼頭
除了可以到唐戶市場外，還可以到巌流島
自助售票機，單程 400円，以前買來回票是有優惠的，現在沒有了，不過還是買了來回票，方便好多
船票
船長原來係位女士
仲係美女嚟添
見到呢隻大河豚公仔，就知道到了下關
海響館
海上有很多魚排，應該係用來存放漁船捕獲的鮮魚
唐戶市場
我和白熊先行一圈，看看有甚麽好食；唐戶市場的食店主要出售壽司，天婦羅，丼和照燒各式海鮮，真係花多眼亂，至於期待了很久的蟹湯都有出售，而且還有河豚湯，這些美味食物我和白熊當然不會錯過，每樣都買嚟食下。
這裡的壽司要 100 円至 200 円一件，在東京迴轉壽司餐廳只要百多円一碟兩件，好像貴了些少，但原來在福岡不是有很多壽司店，價錢一般都比東京的貴，不過原來這裡的壽司上面的魚生很多大件和厚，貨真價實，所以見到很多人都買了壽司食。
市場內有隻很大的河豚
到處都係河豚，市場內當然唔少得有河豚刺身出售啦
還有禮盒裝出售，送禮佳品
哇～好多海鮮呀！
各式各樣的魚生飯
即燒即食的帶子和海螺
這間就出售照燒海鮮
見到剛剛煮好啲帶子，好新鮮好美味咁喎
忍不住買了一串嚟食，多謝 300円，新鮮熱辣，很美味
海膽丼，有大有細，最後買了個細海膽丼，不過原來啲海膽級數只是一般，鮮甜味也是一般
在網上的遊記見人讚這裡的蟹湯很鮮味，這間還有河豚湯，我哋一於每樣都買番碗嚟試下
要先付款，取票
然後就在店舖後面這位嬸嬸取湯，但兩碗湯真的很失望，明明寫住蟹湯和河豚湯，但係味道都係味噌湯味，食不出蟹味和河豚味！
買完野食可以去開餐
這裡枱櫈不是太多，這邊只有一張枱
門口旁邊放了幾個木箱就當櫈坐，不過由於很婑的關係，坐得有些辛苦
開完餐後啲垃圾可以放在這些垃圾桶內
食完野還有水可以洗下隻手，不怕弄污對手
好多小食，買了兩包返香港食
千五円一碟海螺，有成十多隻，很抵
大海蝦都係千五円10隻，每隻蝦有成尺長，而且不是養蝦，真係好鬼平
這間店賣一日魚乾，上面裝了兩把大風扇，風扇下面還裝了幾個有翼樽仔，當風扇不停咁風，佢就不停咁轉，可以用來拒驅趕蒼蠅
市場旁邊的小商場設有Locker，係日本 Locker真係無處不在
這店出售北海道各種不同的豆，見佢的金時豆真係又大又靚，不過 940円一公斤，本來想買一些，不過當時覺得好貴，所以沒有買，回香港後到日式超市看看，金時200g已經售價竟然要二十多蚊，真係好後徣
由於我不食生冷食物，所以大部份都是白熊食的，我打算到隔離 カモンワーフ 食午餐；但係去到 カモンワーフ 時又搵唔到合心的餐廳，最後都係去返市場買野食，這餐真係食得好飽好滿足；之後我和白熊就在附近行下，不過真係很凍很大風，行一陣成身都凍到好似雪條，所以快快坐船返酒店。
カモンワーフ
聖フランシスコ・ザビエル下関上陸の地（聖方濟‧沙勿略於下關上陸之地），聖方濟‧沙勿略（St. Francis of Xavier）是第一位踏上日本陸地的天主教傳教士，1949年登陸日本鹿兒島傳教，此碑正是為紀念他於1550年經平戶後於下關上陸。
堂崎の渡し場跡（堂崎的渡口原址）
海旁有位女表演者同猴子係度表演
倒樹葱，又幾得意喎
表演都幾有趣，啲小孩睇得好開心
表演完仲識鞠躬，隻猴子又幾叻
另一邊仲有一位表演者，不過就無乜觀眾
搵唔到啱心水食店，返去市場再戰江湖，有好多壽司呀！
不食生冷野的我最後買了太卷，海鰻壽司和蝦天婦羅
蝦天婦羅，熱辣辣，很美味
太卷也不錯，不過海鰻就麻麻
唐戶桟橋
售票處，旁邊有間便利店，等船時可以入去買下野食
真係好大風，啲單車全部被風吹到瞓低晒
售票機，同門司港果部唔到架
儲物箱，不過得這四個，都係唔好諗住放低行李係呢度
巌流島，宮本武蔵和佐佐木小次郎決鬥的地方
白熊，影番張相呀！
海響館前的雕像，係乜野呢？個樣好以係雀仔。。。
行近睇下，又唔似雀仔
原來係條鯨魚
係海響館對出睇下關海峽最清楚
門司港，不過今日天氣唔多好，矇查查
下關旅遊地圖，睇下有乜野好地方可以遊覽一下
這個雕像唔知係海豚定鯨魚呢？
有幾隻企鵝散步，唔同品種，體型大小差好多
冠企鵝
附近有個遊樂場，當然唔少得個有摩天輪
有架古老英國巴士喎，去邊度呢？
原來係下關第一條巴士線，由下關碼頭到旧下関英国領事館
恋人椅，一張長椅，掛個牌就話係景點，唔係呀！
未夠二時就返回門司港，行去音樂藍橋，上次維修影唔到，今次一定要影番夠本，但係真係人算不如天算，網上資料明明話係正點時條橋會開啟，但係我哋由下午兩點等到兩點二十五分，條橋郁都唔郁下，有無搞錯，唔通個天唔鍾意我！唔開就算，返酒店攞番件行李。
下午三點左右出發返博多，不過係小倉駅轉車時就出了些少問題，係 6 號月台落咗車，係對面 5 號月台明明睇到指示牌係去博多，但係點解月台的時間表上要等兩三個鐘頭先有車呢，而且架車的編號唔同咗，明明每二十分鐘就有一班特急，點算好呢！四圍搵又唔見到其他的指示牌，於是決定乘扶手電梯上去大堂搵其他月台的指示牌。
一上到去就見到 4 號月台個指示牌寫住特急博多，個心安心啲，到了 4 號月台，車還未到，見還有二十分鐘，於是入去候車室坐下休息下，日本的候車室除了有櫈坐之外，還有空調，天氣咁凍幸好有暖氣，唔係都幾辛苦。
時間差不多了，因為我哋係坐自由席，所以要預先到月台排隊，唔係好易無位坐，出到月台已經見到有些人係度排緊隊，都係行快步。架特急飛鳥號準時到站，因小倉是轉車大站，所以有很多人落車，成架車差不多落咗大半，放好行李，搵位坐好後就開車。
行行下見到車務員由車頭行到車尾，做乜呢，原來係查票，昨天到門司港時已經有車長查票，我哋俾咗張車票佢睇，佢會係張票度蓋章；今日係小倉月台四圍行時，見到部特急券售票機，係喎！原來坐特急到博多駅要另外買特急券，所以有車務員查票，不過我哋張套票係包埋特急券，唔洗再買。
今日海面很大浪，遠處的關門大橋都睇唔清，條橋似唔似香港的青馬大橋呀！
今日搭的連絡船 かんもん 號
ブルーウイングもじ（音樂藍橋）
時間差不多，要開閘啦，白熊行快啲啦
行到一個好位置慢慢等，等，等，點解等咗咁耐都唔開橋？
門司港レトロ観光列車潮風號線路軌，可惜冬天休息，無得坐
平交道，今日沒有火車行駛，可以行下路軌
噹噹噹響起時就唔好橫過路軌呀，好危險架
由門司港駅返博多，乘普通列車到小倉再轉特急，但係應該係邊個月台轉車呢？研究了陣才知由門司港開出的所有列車都會停小倉，見到邊架車開就搭邊架
在小倉駅落了車後迷茫了一陣，上到大堂就見到指示牌，原來係 4號月台轉車
月台上的自由席特急券售票機，用儲值咭入閘的就要係度買特急券才可以上車
班車就到，排隊先，已經有不少人係度排緊隊
月台地下有指示，唔怕排錯隊
885 系かもめ，海鷗號！
來回可以搭唔同的觀光列車，真係 Lucky
坐位係唔同架，不過無咗張枱，食野好唔方便，但好寬闊，放到行李喼
坐位上面可以放小型行李
車長查票，白熊，張車票係邊度呀？
這位年輕車長很有禮貌，一路查票，一路鞠躬，條腰唔辛苦咩！
這兩日住的酒店，東橫INN博多口駅前，今次係第二次住這間酒店
辦完 CheckIn 手續，職員小姐給了兩份了小禮物我哋，唔知係唔係因為今日係情人節
今晚住的房間，很寬敞
床上有張告示，話床底可以放到大行李
床下底有很大的空間，幾大個行李喼都放得落
長褲熨板，日本人真的很講究
房間另一邊
洗手間
白熊話想飲茶，等我沖番杯香茶俾你飲啦
房間內沒有睡衣提供，如需要可以在大堂免費取用
梳洗用品，有需要也可在大堂攞
大堂還有其他設施，微波爐和水機
自助售賣機
電腦和打印機可以免費使用，還有 FAX機，不過要收費的
明天食早餐的地方
早餐由早上 6 時 30 分至 9 時
好多行李喼呀，這間酒店位置很方便，很多旅客都寄存行李
約四點半才到酒店，辦妥手續後上房。今次訂房定不到不吸煙房間，唯有訂了吸煙的，幸好入到房又聞唔到煙味，間房又很大，真的喜出望外！稍作休息一下，出發到博多城，博多駅由多個商場組成，而地下街又錯綜複雜，真的很易迷路。
今日的第一站係天台屋台鐵道神社，不過上天台真的不易，成個博多城就只有一邊的升降機可以到達，其他的只能上到十樓，然後再轉乘扶手電梯才到。到了天台已經過了五點半，到了天台就見到迷你電車燕子號行駛，幸好手快影了幾張，原來這班車已經係最後一班，火車到了總站後就收工用布蓋住，影唔到相。
跟住行去神社，但係神社前的店鋪一樣已經開始收工關門，幸好神社沒有關門，可以慢慢影，影完相個天已經黑了，都係到商場行下，近來我和白熊都喜愛逛超市，於是就到地庫行下，但係地庫出售的大部份祇係食物，沒有大吸引力，行了一陣肚仔餓了，係時候去搵野食。
上天台要由博多城十樓再乘扶手電梯
一上到天台就見到熊本亞蘇男燕子號迷你火車
架小火車好可愛呀！好想坐下，但係原來係最後班，無得坐
熊本阿蘇男小火車時間表，十分鐘一班車，都幾密喎～
鐵道神社
鳥居，真係有隻雀仔喎
原來係公仔嚟
神社兩旁種滿了梅花
剛好正是賞梅季節
聖水，拜神前要洗下手
旁邊還有個神龕，因關了門沒看清入面的神像
鐵道神社
很細的神龕
兩旁種了兩棵很清秀的梅花
九州鐵道建設恩人：Dr.Hermann Rumschottel的紀念碑豎立在這個神社內，他是德國工程師，1887年開始負責監督九州鐵道建設
還有小池流水，這個神社雖然係細，但樣樣齊全
神社前地下放了幾個小公仔，乜野嚟？
原來下面塊木係九州地圖，上面的七個小人搭著繩子散步在九州土地上，七個小人象徵著七個縣市攜手合作把九州鐵道串起來！
本來打算去一風堂食拉麵，但今天是星期日，到處都排長龍，於是到地下美食街的牛舌店看看，點知整條地下美食街都是人，每間店舖前都有條長長的人龍，咁今晚食乜野好呢？最後去了車站旁小街的食店食晚餐，這裡有很多不同的食店，最後選了一間 ちゃんぽん 雜菜煮，上次自駕遊時係長崎食過，味道很清甜美味，不過今次的味道同上次不同，很重醬油味，比較味濃。食飽後諗住行下地下間超市，但係博多城真的變化很大，搵咗好耐都唔見，行了一陣商場就返酒店休息。
地庫一樓的美食廣場，這間食店用個火爐煮緊的食物，好新鮮喎，點知～～
原來啲火係假的，做到好似真咁樣，真係俾佢呃咗
有微波爐免費使用，番熱食物好方便
9，10Ｆ有很多食店，真係花多眼亂
本來想係這間一風堂食，點知排長龍，其實這裡間間假日都排長龍，要食野真係要好有耐性
唔想等，最後揀了在這間食店食～長崎ちやんぽん
啡白熊係時候開餐了，日本人真的好怪，餐廳內只提供冰水，天氣咁凍，仲飲凍水，好傷身喎
我的長崎ちやんぽん炒麵，有點似福建炒麵
白熊要了湯麵加餃子，其實ちやんぽん即係雜菜煮，都幾建康
坐位後有幾個籃可以放外套
今日的戰利品只有在唐戶市場買的小食
上一篇 : 16年九州福岡新春四天悠遊行 Day 1
下一篇 : 16年九州福岡新春四天悠遊行 Day 3
沒有留言 :
張貼留言