上星期在電視上得知米埔觀鳥季節開始了，好想去睇雀仔，一直以來以為參加旅行團才可以去參觀，偶然之下，在世界自然基金會的網頁上搵到有關資料，原來米埔濕地公園會在星期六、日舉行公眾導賞團，於是立即在網上預定了 11月7日的紅樹林浮橋之旅 ，完成手續付款後，開始期待這天的來臨。
今天一早起床，梳洗後九時多出發，先乘巴士 268C ，不用五十分鐘車程，約十時半便到元朗。見時間尚早，先找找今日食午餐的地方～天鴻燒鵝飯店，這間飯店十一點才開始營業，於是在附近行下，見到有間賣潮汕滷味專門店，聞到十分香，忍不住買了些鴨腎豬耳肉，跟著即刻在對面的公園搵個位來開餐，食落真停不了口，豬耳肉十分爽口彈牙，鴨腎又好爽，十分好食，最重要的是不是太咸，而且仲無乜味精，真係好好味‧
食完咁好食嘅小食後，時間差不多了，於是行去天鴻食午餐，去到時剛剛開始營業。這裡最出名的是燒鵝，而且標榜無味精，當然要試下喇～白熊要燒鵝脾(免切)瀨，我就想試下其他，於是點了燒腩叉燒食，另外要了五花茶及青寧七喜，一共 $124，這裡的燒鵝真的很好食，皮脆肉嫩，加上原隻脾來食，真更加好食到不得了；碗湯瀨也不錯，湯味十分鮮，無餸也可以食一大碗。
我的燒腩叉燒也不差，燒腩十分脆嫩，入口即溶，至於叉燒就較遜色，雖然很稔很嫩，但是同燒腩比就差了少少，食完這餐咁美味的午餐後十分滿足，跟著便起程出發到米埔。在青山道乘 76K，在米埔墟前落車，落車後向前行，跟住左轉担竿洲路行二十分鐘，這段路沿途景色很美，而且又可以睇到雀仔，邊行邊影相，結果行了三十分鐘才到目的地。到了遊客中心後，報到和租用望遠鏡後，跟著便去洗手間，因在米埔濕地公園內只有在教育中心才有洗手間，其他地方都是流動洗手間。
講解員點名後，先簡單介紹米埔濕地公園，然後一路行，一路講解，一見到有雀鳥就立即話俾我哋知，沒有望遠鏡的話，可以用講解員的大望遠鏡，這個大望遠鏡十分利害，遠遠的雀鳥都可以看到好清楚。在禁區前是漁農自然護理署辦事處，講解員內進為我們領取禁區紙，跟著便進入禁區開始行程。禁區內可以看到更多雀鳥，行了不久就到教育中心，中心內有各種雀鳥的介紹，在這裡補充食水及去洗手間後就繼續行程。再行多大半個鐘頭，便見到一排圍網，網後面就是紅樹林。在附近的涼亭稍作休息，便進入紅樹林浮橋，行浮橋要十分小心，好彩是潮水退，不是太難行，行到尾是觀鳥屋，講解員話如果是潮漲，潮水剛好在觀鳥屋前，便可以見到一大群水鳥在覓食，十分壯觀，可惜現在潮水退到很遠的地方，還好用望遠鏡到可以睇到少少，幸好在觀鳥屋前的一大遍泥灘，有很多彈塗魚及招潮蟹，可以影個夠本。
離開了觀鳥屋，回程再次行浮橋，已經無咁驚。回到涼亭附近，講解員告知有兩條路回程，一是行原路回去，二是向另一面行，可以看到黑面琵鷺的機會會大一點，不過路程會遠一些，大家最終決定行新路程碰碰運氣。行了不久就不斷見到好多候鳥開始停下來休息準備睡覺，在天上還見到有黑面琵鷺飛過，十分驚喜。到了基圍的排水位，講解員告知這裡在夏天會排水收集基圍蝦，而且有舉辦團可以參觀，有得食又可以買番屋企加餸，聽到為食的我流晒口水，明天夏天一定要參加。
再行不遠，見到很多雀鳥在對岸休閒休息，從來也沒看過有這麼壯觀的場面。跟著行一陣見到有一個斜台的地方，原來冬天基金會會定期向漁民購買些雜魚，過磅後就在這斜台放落基圍，很多雀鳥便會飛來食魚，場面非常壯觀。講解員估計因這位置常有魚吃，故有很多雀鳥在附近聚集。
邊行邊睇雀鳥，五時半左右返回遊客中心，這個行程便完滿結束。交還望遠鏡，到洗手間洗個臉後，便離開到大馬路乘 76K 返元朗。在元朗吃過晚餐和甜品後，臨走前再到潮汕滷味店買鴨腎和豬耳肉回家宵夜，是日真是非常非常滿足，非常非常愉快的一天。
新順興潮汕滷味專門店
見到好靚，忍不住買了些鴨腎及豬耳肉來食，哇～好好味呀！
食完後就到天鴻燒鵝飯店食午餐
今日的午餐～燒鵝脾湯瀨、燒腩叉燒飯加青寧七喜及五花茶，一共$124
好大隻燒鵝脾呀，皮脆肉嫩，正～
食完飯就出發到米埔，落巴士後轉左行二十分鐘
行行下見有細小的牌坊小橋，不過好像已經荒廢了的
担竿洲路的雨旁都是魚塘，風景很美
這個魚塘原來是參加優質魚場計劃，看來這裡的水質很好
打氧機，咁大個魚塘當然唔會用家居的氣泵喇～
鷺鳥呀，灰灰地色，咁遠睇唔清楚係乜野品種添
行下停下影下相，這段路足足行了三十鐘才到世界自然基金會辦事處
遊客中心，入去報到先
接待處，講解員已經到了
小賣部
好大隻熊貓呀，好似係用 Lego 砌成的
夠鐘集合，這部大望遠鏡是講解員的，好遠既野都可以睇得好清楚架
租來的小型望遠鏡$20，雖然係細部 d，但性能都好好，一樣睇到好清楚
出發喇～
行不久就見到隻鷺鳥好孤單咁企係湖中心
郁都唔郁，企係度任影
跟住又見到大白鷺及小白鷺，遠望真係分唔到
跟住右轉
先到漁農自然護理署辦事處取禁區紙
在辦事處屋簷下有個人工燕子雀巢，不過上面是隻鳩，真是燕巢鳩佔
攞咗禁區紙就開始進入禁區，無禁區紙係唔入得去呀，警察叔叔會拉架
進入禁區後右邊是屬於基金會的基圍，亦是香港唯一一個仍然運作的基圍
右邊是私人的魚塘，魚塘的人會在魚塘上面圍線（池塘邊一支支杆）是為了防止雀鳥食塘裏的魚
在路邊奇怪的路牌，上面的標誌唔係好明白
小白鷺，嘴黑腳黃，細細隻，好易分別出來
哇～成棵樹企滿晒黑鷺，好多雀仔呀
在這裡有很多海芒果，葉子及果實都很像芒果，不過係好毒的，唔好手多多攞嚟玩
樹底下見到遠處有隻白鷺，這個角度望，畫面很靚
水池中心有個像樓梯的東西，好似是荒廢了的建築物的一部份
給候鳥看的路牌，等佢哋唔會行錯路
教育中心，前面剛好個有團體搞活動
敎育中心旁的盛開著蓮花的蓮花池
教育中心主要以展板介紹
這裡有個觀雀台，睇雀的最佳位置
剛好有雀仔飛過，好彩手快影到
影完相就參觀一下教育中心，好多大雀仔頭
行上樓有仲有候鳥的模型
休息及補充食水後便離開教育中心，轉入基圍旁的小路
路旁的紅樹幼苗"小筆仔"，這品種的種子會在母體發芽長大到一定程度後才脫落
行行下講解員哥哥問我哋基圍上有好多白色物體，估吓係乜野嚟呢？
初初以為係樹葉，拎上手才知不是，硬硬的圓圓的，係乜呢？原來係在幾百萬年前的蠔殼化石，這些化石原本是埋在魚塘底，是基圍挖深魚塘時被挖出來
前面一大遍自然景色，後面卻是深圳的高樓大廈，只有香港這個地方才會有這樣的獨特風景
河中有隻孤單的黑水雞在游水，在野外，原來連雞都會游水，現在才知道
行到攰攰地，係涼亭休息下飲下水先
跟住就進入這度門，門後是紅樹林濕地，這一排圍網原來就是香港的邊界，過咗度門就可以行去深圳
當度門一打開，門前面這攝影機就會影住這裡，以防有人偷渡
圍網後的小路
跟住開始浮橋之旅
浮橋一路行一路郁，要好小心行才可以
浮橋兩旁有好多紅色的招潮蟹
公蟹有隻好大的蟹蚶，好威風
雌蟹就沒有大蚶及比較細隻
浮橋的盡頭是觀鳥木屋，潮水已經退到很遠，屋前出現一大遍泥灘
泥灘有好多招潮蟹及彈塗魚
時間差不多了，原路行返出去
行行下見到隻大白鷺鬼鬼魅魅咁裝我哋
出番圍網就沿這條路返遊客中心，希望可以見到黑面琵鷺喇
基圍的水閘
當夏天時會放水收集基圍蝦，講解員話夏天會有團參觀及購買基圍蝦，有時間一定會參加
佢仲話香港現時街市所出售的基圍蝦大部份其實係用魚塘養的，而且是用飼料谷大的，但這裡係全天然，啲蝦係食紅樹的枯樹
水閘旁有個工作場地，看樣子應該是用來收集基圍蝦
魚塘發生死亡事件，在水閘前發現有條魚屍，不過好奇怪點解唔會俾啲雀仔食咗呢？唔通唔新鮮唔食？
一見到有雀仔，講解員就用佢個雙筒望遠鏡望下，這個 post 好有型呀！如果唔係佢咁敏銳，我哋會錯過好多睇靚雀鳥既機會
行行下見到好多黑色的鷺鳥企滿晒係棵樹度
前面仲有好多白鷺，因為我哋的聲音，佢哋一聽到人聲就飛走
不過好快又飛番落嚟
冬季時會同漁民買魚，在這裡磅完魚後，就在這斜台放魚入基圍，所以咁多雀仔係度等食
太陽開始落山，不知不覺原來已經到了黃昏
前面有好多白鷺
用望遠鏡望先知原來係黑面琵鷺，終於見到喇～好開心，原來佢哋搵緊野食
太陽已經落山，岸邊已有好多白鷺係度休息
這裡有群黑面琵鷺休息，原來佢地係企係水度休息架
差不多到遊客中心時，在路口的水池又見之前的鷺鳥仍然企係舊石度，唔知佢有無飛開過呢？
離開米埔，乘巴士返到元朗市，食過晚飯後在這間藤原豆花食甜品
入到去坐底後先見到店內有個 86，原來這間豆花店是以 "頭文字 D" 內藤原豆腐店做卓頭
這裡推介三色豆花，好～一於試下
三色豆花是用飲筒飲的，好得意，白熊就要朱古力雪花冰，啲冰幾好味，不過 $18 得咁少，貴咗啲
沒有留言 :
張貼留言