chris 的小小世界: 07年東京箱根8天自由遊 Day 1

第一天

日期：2007年11月18日（星期日）
行程：香港機場 → 東京成田機場 → 池袋
住宿：池袋劇場

　　早上 5 時半就起身，搭 6 時 40 分的 A22 機場巴士到香港國際機場。到了機場後就到國泰櫃台辦妥登機手續，並且詢問回程時是否真的在成田機場 T1 登機，正常應該是 T2 才對；但是國泰職員答覆是沒有錯，而且在 T1 也有國泰的櫃台（原來是錯得好利害，令到最後一天有些麻煩）。完成登機手續，並登記飛行里數後，就安心過海關食早餐。

　　今天乘國泰早上 10 時 15 分 CX 520 班機，下午 3 時 15 分就到達東京成田機場。由 11 月開始，日本入境要打手指模，剛開始實行，擔心要用好耐時間才能辦妥入境手續，點知行到海關發覺人龍行得好快，奇怪？原來個海關櫃台的手指模機每部都停用；好野！唔使打指摸，好快就過了海關。

第一次帶黑白豬去日本旅行

過了海關就在大家樂食早餐

在 4 號登機閘口上機，行一陣就到

外面風景好靚呀

有些肚餓，食D小食頂住下先

派餐個位空姐好慢，派到我只係得日式魚塊餐，無奈

　　今次原本係打算坐京成 N'EX 到池袋，因為 JR 東日本做緊推廣，只須 3500 円就可以坐京成 N'EX 及有一張面值有 1500 円限定紀念 Suica；但係過了海關後只有去新宿的列車，去池袋的要等成個鐘先有，所以都係坐番京成特急去池袋。

　　行到車站就要幫上次嚟東京時買的西瓜咭增值，有位靚靚服務員幫我，好快就 OK。用西瓜咭在東京搭車真的好方便，好像香港的八達通，所有電車地鐵可以一咭通行，而且搭巴士、在便利店買嘢都可以用，現在去東京旅行一定要有番張咭傍身才夠IN。

　　電車到了日暮里後，就轉車坐山手線到池袋。日暮里駅現在大裝修，安裝了扶手電梯，比以前方便了好多，唔使再做咕喱要搬行李了。去到池袋，因天黑的關係，有些迷路，行了一陣才找到池袋 60 階通り，跟住好快就搵到這幾晚入住的酒店『池袋劇場』（池袋ホテルテアトル）。

　　辦妥 CheckIn 手續及俾埋跟住果兩日的費用後，就上房放低行李，行街食晚餐。今晚的晚餐打算去酒店對面的若貴迴轉寿司，但係去到要排隊，而且那時已經七時多，仲要去東急買潤膚液，所以就先行東急買嘢，之後才食晚餐。用最短時間就行完東急，不過就買唔到要買的馬油潤膚液，行完之後就到若貴食晚餐了。行番去時點知條龍仲長過之前，但係都係等咗十多二十分鐘就有得食。個女服務員用普通話同我地講可以同佢落單，仲俾咗張有圖既 Manual，我見其他的日本人個個都好利害，一個人就算係女仔，閒閒地都食十幾碟，好利害。我地唔知係唔係因為坐完飛機的關係，無乜胃口，兩個人都只係食咗十零碟，好失禮。

　　返到酒店，換過了衫，就試下部可以有線轉 Wi-Fi 絡的新機，部機原來係好方便，只須插好線就 OK，可以用部 PPC 上網睇吓無線電視喇，睇了一陣就洗白白上床休息了。

終於到了東京了，在 T2 搭京成特急到池袋