chris 的小小世界: 07年上海蘇杭四天遊 Day 4

第四天

日期：2007 年 10 月 1 日（星期一)
行程：酒店 → 翠景緣 → 新天地廣場 → 黃埔灘
　　　→ 乘坐磁浮列車(自費) → 上海機場 → 香港
住宿：香港五星級的家

　　今朝七點 Morning Call，七點半就到餐廳食自助早餐，這間餐廳的食物水準不錯，食飽飽後八點多就出發。第一站是去翠景緣，這是一間賣玉石的店鋪，我們去到後直上兩樓，話個太子爺會接見我們，等咗一陣就見到一個好似剛訓醒的男人，佢同我哋談天說地，又話 d 玉石利潤好高，可以好平咁賣比我哋，唔通這是另一個銷售手法？講咗好耐都無得走，等到個導遊頂唔順話飛機唔等人先可以走得，咁長氣真攞命。跟住就去『上海新天地』，這個是一個舊區重建的新旅遊區，那裡的建築物全是舊樓用最新科技維修的，沒有一座是新建的，可以看到以前舊上海的舊貌，很值得一去。

今日的自助早餐，五星級酒店係正 d

噚日入住的酒店～上海巴黎春天大酒店

上海早上的街頭

國內的巴士

仲有這些電車，不過係用車轆行，比香港的靜同快

賣玉石的購物景點～翠景緣

上海新天地，全部的都是古老建築物

用咗高科技將 d 舊磚整硬，咁 d 樓就安全好多

共產黨第一次全國代表大會會址

在新天地旁有個好大好靚的噴水池同豪宅

好大棵樹呀，唔知係唔係柳樹呢？

　　行完後就去黃埔灘旁的黃埔公園睇風景，坐十幾分鐘車約 12:40 就到，黃埔公園是可以好清楚睇黃埔江兩岸的風景，是睇風景的一個熱點，而且今天又是十一國慶假期，去到公園時真是人山人海，幾經辛苦終於上到公園，導遊話人多要小心錢包，要求大家不要行開，聚在一起影相好了，而且導遊又可以方便幫各團友影相。

　　在公園逗留十多分鐘就離開，跟住導遊行去黃埔區，在這裡有十五分鐘自由活動時間，可以在附近行下影下相；條街真的好多人，而且又要提防扒手，所以只在附近影相就算。

　　大家影完相後就上番車，出發去食飯，今餐是在上海的最後一餐，食物水準都唔錯，大家食飽飽後就要起程去機場，由於大家想坐下磁浮列車，導遊安排了有興趣的團友在車站落車，然後坐磁浮列車到機場，而不參加的團友同我們的行李就坐旅遊巴去機場，看看邊個快呢？

　　我們上到車站等導遊買車票，車費為 50蚊人仔，一次買幾十張票，都搞咗幾分鐘才 OK，之後就入閘上月台等上車，在月台等了幾分鐘就有車，班次都幾密，上到車後當然要揀個窗口位坐，感受一下時速四百三十一公里的感覺。

　車程只是約七分鐘就到機場，但是落了車後要行一段頗長的路才可以行到機場，出番機場旅遊巴停車的地方時，原來我哋的行李已經到了，而且仲放埋在路邊等我哋，實驗証明坐這磁浮列車都唔係會快咗。

　　攞咗行李後就到去 Checkin，好快就搞妥，在機場行一陣就過海關等上機，點知差不多夠鐘時聽到廣播話會 delay，雖然遲了個鐘頭才可以上機，都沒所謂喇，點知在機上又聽到廣播，又話會 delay，之前聽過話近排在上海北京番香港的班機時常都會 delay，原來係真架，但係見到 d 空姐空哥好忙咁去安排小食，忙到一頭煙，都唔好意思話不滿。

　　在機上又等了一個鐘，架機終於可以起飛了，約九點多返到香港了，過了海關攞埋行李就坐機場巴士返我五星級的家了，而這個華東遊亦完滿結束了。

上海黃埔公園