行程：酒店 → 皇居外苑 → 池袋 → 新宿 → 酒店
住宿：新宿アーバンホテル
今朝八時半起床，梳洗後食昨晚在便利店買的飯團後就出發，第一站是到皇居外苑，先到新宿三丁目駅乘都営新宿線到市ヶ谷駅，跟住轉乘東京メトロ有楽町線到桜田門 260円，由於都営同東京メトロ是聯營，祇須買一次車票就可以，而且在市ヶ谷駅出閘時要在轉乘閘口出閘才可以，唔係會比人食咗張車票，初初嚟東京自遊行時每次在車站買飛都搞咗好耐先買到，而且每一間公司的售票機用法都不同，現在的西瓜咭（Suica Card)已經可以通用所有地鐵和私鐵．方便了好多，用法同香港的八達通一樣。
到了桜田門駅後在 3 號出口一出就係皇居外苑的桜田門，入到外苑後看過地圖後就周圍行下，行到二重橋時個天開始下微雨來，但細看一下原來是下雨雪，而且仲十分大風，真係好凍。影完正門石橋後諗住行去影二重橋，點知見到有好多警察封咗上石橋的路及外苑中間部份路段，行唔到上去及另一邊，唔知點解，唯有行到外苑的外圍的行人路行過去，但是沿途見到好多日本人想入去外苑都比警察阻止，好似會有事發生咁，行到和田倉門時企咗一陣八卦一下，發現和田倉門對出的馬路封咗，無幾耐連外苑旁的內堀通り都封埋，等多一陣就見到有隊車隊由皇居駛出嚟，原來係日本天皇要離開皇居，唔怪得咁大陣象喇。
日皇離開後就解封，一切回復正常，行完外苑後諗住到東京駅行下，東京駅十分大，而且仲係古蹟，點知到咗後就先知車站要維修，唯有行車站內的店鋪，點知大部份的店鋪不是食店，就係手信店和便當店，無乜特別地方想行。
今日的早餐
在新宿三丁目駅內有清楚的指示，唔怕坐錯車，坐兩個站就到市ヶ谷
明明而家係 09:55am，但係指示牌顯示下班車在 9:27am 到，怪怪的，原來係誤點，等車時還有位伯伯指住個指示牌問我哋添，我哋猛話：すみません、分かりません．．．．
到了桜田門駅後，先看下指示牌
法務圖書館，這座大廈很有歐陸風格
警視廳，成日係日劇睇到
桜田門，我哋由這道門入外苑
桜田門的高麗門
桜田門度木門下有個細的小門，應該係以前比士兵和士從出入
桜田門的魯門
外苑好大啊
在護城河上的天鵝，很悠閒在游水
睇完天鵝就去二重橋
這個專業攝影師在最佳的攝相地點幫人影相做生意
這些長櫈就係佢幫人影團體相的工具，有好多人幫親佢架
正門石橋，不過好多人誤以為係二重橋，其實後面的鉄橋才是，這條石橋建於 1887年，已經有百多年歷史
皇居警察更亭
有架警車停咗係皇居正門的入口，而且條路封咗，初初以為唔可以行上去石橋度，後來才知原來日皇出巡封路
皇居正門
伏見櫓，櫓：即係護城牆上的城堡，用作防衛之用
行去另一邊時在見到好多烏鴉
呢隻烏鴉好大隻呀
巽櫓及護城河
日皇出巡，都幾大陣象，外苑及附近的馬路都封晒，日皇離開後一切回復正常
桔梗門
解封後行返去正門，見到工作人員開始把封路用的圓石搬番埋
咁大舊的石原來係用呢部摌車嚟搬運
正門石橋
皇居正門
正門前的警衛
正門鉄橋，這條才是二重橋，這條鉄橋建於 1964年
楠木正成像
行去和水倉噴水金園時，見到隻好肥的白鴿係草地休息，佢好大方，任影唔嬲
和田倉噴水金園
行去東京駅的路上種滿了樹，整整齊齊
舊的護城河
更亭
東京銀行協会ビル，護城河上的倒影，很美
皇居以前的城牆
東京駅，整個車站做緊維修，只係露出少部份
逛完東京車站後，約下午一點就乘山手線到池袋駅 190円，出閘後由北口出，到立呑亭帆立屋食午餐，立呑亭帆立屋是流行東京節目中介紹過的，未出發前已經在網上找了資料，做足功課才幫親，因為這間食店是居酒屋，沒有熱茶或清水免費供應，入到去點了野食外還叫要了兩杯飲品，綠茶和巨蜂サワー各315円，初初以為巨蜂サワー係提子果汁汽水，點知飲落口先知原來係有酒精成份的，不過就好易入口，並且十分好飲，但對於我滴酒不沾的我，飲後有些少醉醉地。
吃得很飽後，經池袋駅行去池袋太陽城的餃子博物館，在池袋駅商場見到有間商店出售新鮮鮮奶的牛乳バー，醉醉地的我買了枝鮮奶來解酒，這些鮮奶奶十分濃，很好飲，人也舒服好多。餃子博物館其實在太陽城二樓內的Namja Town，Namja Town除了有餃子博物館外，仲有雪榚博物館及遊樂場，入場費 300円，遊完Namja Town及食了餃子、雪榚後就準備離開了，但發覺並沒有出口指示牌，找了很耐及看了幾次地圖才找到，離開太陽城時六點多，未夠鐘食晚餐，於是到隔離的東急百貨公司行下。
行到差不多七點後，就到若貴迴轉寿司食晚餐，這間寿司店的的寿司同以前一樣美味，食飽後乘山手線到新宿駅 150円，在赤札堂買了蜜瓜和在西新宿的韓式超市買了士多啤利做宵夜，跟住就返酒店。蜜瓜十分甜，正～但士多啤利就不是太甜，而且仲好熟添，食飽宵夜後就梳洗休息。
西池袋的商店街中央通り，立吞亭就在這條商店街右邊
立吞亭帆立屋
餐牌，大部份食物飲品都係 315円
綠茶和巨蜂サワー
魷魚一日乾，這個很夠味很好食
タコのから揚げ（炸章魚丸）
燒帆立貝，不是太鮮甜，沒有電視講咁好食，而且略為咸咗啲
兩份串燒セット
手羽揚げ（炸雞翼），一共 3080円
池袋駅內的牛乳バー牛乳店，即內出售的是高原牧場出產的即日的鮮奶
280円的山吹色のジャージー牛乳，奶味很濃，正～
位於太陽城商場一樓的Namja Town入口
貓博士，Namja Town內到處可以見到佢
Namja Town正門
自助售票機
入場費每位 300円，買了飛後可以入場
入到去仍然可以看到好多貓貓
按摩中心，裡面有好多按摩店
手掌～不同穴位對應身體不同的部位
餃子博物館
入到去後見到好似祭祠的佈置，放了好多枱櫈，見到好多人買了外買坐係度食
這裡有幾間貓貓神社
舊式抽水機
以前日本民居的房屋模型
商店街，唔係真係有野買，係展示以前的商店街
車站
街頭電視機
遊樂場
這些真係扭蛋機嚟架
餃子街，這裡有十多間餃店，真係花多睇亂
最後選了這間包王的牛とん包 550円
餃子係即整的，買了票後取過號碼牌後坐底等食
有得食喇～，餃子真係好好食，肉嫩多汁，不愧係餃子金賞得主
食完再試第二間，這是我選的第二間餃子店，450円六隻
這間也是即整的
但餃子單睇外觀就麻麻，有幾隻餃子皮煎爛咗，而且味道一般，都係包王的好食
雪榚博物館
這店出售日本各地的雪榚
保溫外賣盒，最長可保冷八小時，臨上飛機前嚟買，再帶番香港食都得
選了北海道的原味及雪呢拿，原味奶味比較濃，兩杯都很美味
軟雪榚店
Magic Ice，這店係出售炒雪榚，其實香港都有得賣，不過無食過，就試下喇
有多款可以選擇，我哋選雪呢拿雪榚加豆漿、草莓及香蕉
這位哥哥落齊材料後開始炒
完成品，幾種味道混埋一齊，幾好食喎
行完街夠鐘食晚餐，店內所有寿司都係 136円，很抵食，而且啲寿司又夠新鮮好味，所以每次到東京都會幫親
開餐喇
兩個人一共食了十碟，多謝1360円
今晚食的生果宵夜及明天早餐：杯麵及牛乳
