chris 的小小世界: 16年九州福岡新春四天悠遊行 Day 4

日期：2016年2月16日(星期二）
行程：酒店 → 樂水園 → 住吉神社 → 柳橋連合市場 → SUN ROAD商店街 → 博多城 → 酒店 →機場 → 香港

　　今朝比昨日早了少少起身，梳先後落去食早餐，今朝比昨日少了很多人，成盤麵包無人攞，原來今日的住客多是日本人，佢哋習慣早上食飯，所以見到大多數人都係食緊飯，飲緊味噌湯，咁我唔客氣啦，不過唔知點解無果占，得牛油，可惜，整唔到我的至愛～油占包。

　　食飽飽後就返房執行李，今日黃昏機返香港，有好多時間，CheckOut後在酒店寄存好行李就出發。首站係樂水園，先到博多站旁的巴士中心博多バスターミナル二樓乘上行線 100円巴士，其實去樂水園應該乘下行線的 100円巴士線，但係唔知個巴士站係邊度，所以就坐咗上行線，一樣可以到，不過當然慢好多，白熊唔知仲以為樂水園係好遠的地方，真係傻！

　　落咗巴士行幾分鐘就到，到了才知樂水園今日休息，只好怪自己沒留意預先搵定資料；無得行樂水園，只好繼續行程到隔離的住吉神社，由樂水園行去都只是幾分鐘，由於我哋由停車場入口進入，所以沒有經過鳥居和神門，住吉神社原來都幾大，仲有個奇怪現象，就係裡面有很多不同地方的迷你神社，想拜邊個神靈都好方便。

今日的早餐，好豐富呀！

博多城旁的博多バスターミナル，初初還以為只是巴士總站，原來入面有好多商店食店，5樓還有間100円店的DAISO，一陣可以去行下入貨

今日打算乘巴士到機場，所以先搵定個巴士站

11號閘口有巴士到太宰府和福岡空港

在閘口剛見到巴士像香港的機場巴士一樣，有很大地方可以行李喼，帶行李喼上車沒問題

我哋就係3號閘口乘 100円巴士

只要見到旁邊有 100円字樣就可以上車

巴士內原來有 WIFI，可以上網搵下資料

坐咗二十幾分鐘巴士終於到啦，如果係乘下行巴士線的話，幾分鐘就到，在這個巴士站落車

樂水園，行兩三分鐘就到，今日休息，天呀！

連旁邊的專用停車場也關閉

沒開門，只好行去隔離的住吉神社，見到有入口就入去，原來係車場入口

這裡放了很多唔到地方的迷你神社

管原神社，個神社真係好細

一共有十個，想拜邊個都可以

有神社自然就會求籤

求籤係自助的

先入一百円

然後自己抽一張，好方便

稻荷神社

住吉神社本殿

古代力士像，雙手的手掌紋有“力”字的漢字

前面塊石碑介紹

金色的神船，這是用來御神幸巡遊用的

神門

左右兩邊的随身像

查了很久才知這是事務所，還以為係神殿

寫上心願後的繪馬可以掛在這裡，住吉神社都有幾多人嚟祈求心願

有地圖喎，睇下先

原來旁邊有惠比須神社

三日惠比須神社

神社本殿內有兩個好大的緣起熊手，熊手（くまで）就是竹耙子，緣起（えんぎ）就是吉祥的之意，買了這個稱為”熊手”的吉祥物，表示可以把明年的好運、身體健康和生意興隆通通耙進門。

惠比須神像

摸不同的部位，可以祈求不同的願望，白熊，快啲摸下佢條金鯛魚

手水舍，拜神洗下對手先

功德池

南門

跟住行返去西門，途經儀式殿，這是舉行結婚的地方

住吉神社的手水舍，比惠比須神社的大好多

好多酒桶，中國就添香油，日本就添酒桶，各處鄉村各處例

路邊有間小神社喎

少彥名神社

西門

西門對面的天津神社，剛好有位伯伯正在餵白鴿

其實係乜野鳥仔都會嚟搶食，好誇張

　　行完神社後，係時候去下一站～柳橋連合場食午餐，由於神社離市場不是很遠，而且又唔知點樣搭巴士，所以就直接行去，在西門弄清東南西北，看看地圖後就出發，原來真係不遠，我行得咁慢都只用了十多分鐘就到。

　　這個市場給我感覺得有點冷清，可以已經十一點多了，不過最奇怪的是，除了店員外，其他的人竟然差不多全是台灣遊客和香港遊客，不過大部份的人都只是集中在某幾間店鋪，本來我和白熊想在這裡食午餐，但是那間柳橋食堂排晒長龍，而我又唔食得魚生，所以只在高島屋買日式甜餅就走。

　　市場對面是 SUN ROAD 商店街，這條商店街不是很長，賣的都是一般貨品，不過在入口有間蔬果店，見到有煨蕃薯出售，日式的煨蕃薯已經想食了好久，當然唔會錯過，日本的蕃薯真係又甜又香，煨過後就更加香甜，好好味呀！

柳橋連合市場

市場內很少當地人顧客

水產店，這個是乜東東呢？

好多鮮魚

好多明太子，鍾意食的話就可以大手入貨

柳橋食堂，市場內唯一的魚生食店，今日給台灣人和香港人攻陷

好多不同的炸魚蛋

大部份都只是幾十円至百多円，唔係好貴

我哋買咗呢幾件，其實唔知係乜野味架，見到幾靚就揀

買咗後店員問我要唔要番炸一下，心諗凍冰冰，炸番熱佢都好喎，於是就點頭，點知......

原來佢啲油根本都唔係好熱，外面只係暖暖地，中間仲係凍，而且仲吸咗好多油，搞到成手油，睇見到有啲怕，而且佢仲攞舊月歷紙包俾我哋，啲紙乾唔乾淨架大姐，好彩返到香港無肚痛

高島屋，獨立包裝，衛生好多，

包裝好的每樣都買了一兩件，這個沒包裝的好似好好味，未食過，一於買件試下

桜餅，外面係糯米，中間紅豆餡，很好味

好多蕃薯呀！啲大條既蕃薯都只係 60円@100g，好平呀！忍不住買了3條，五百多円，計番只是三十幾蚊港幣，抵！！！這些蕃薯原來又甜又香，好好食，有點後悔買得少，下次有機會買番幾公斤，派下街坊做手信都幾好

SUN ROAD 商店街

煨蕃薯，好香呀！甘太郎一條只係 200円

買咗一條嚟食

黃肉架，好甜，好似食緊糖，我同白熊兩個你一啖我一啖，很快就落晒我哋個肚

　　　由於100円巴士係唔會經柳橋市場，所以要乘其他路線的巴士，幸好在巴士站見到的巴士大部份都是經博多車站，車費都只是100円，所以就有巴士就可以上，過幾個站就番到博多車站。由於未食午餐，所以就到地庫B1的一蘭拉麵食，平日真係唔多人，一去到就有位，唔使等。在門口買好食券，職員就帶領我哋入去，填寫完食物的要求，落咗單後好快就有得食，唔知係好肚餓，定係啲麵實在太好食的原因，細食的我竟然可以食晒一碗麵，白熊也為之側目！

　　食飽後就去巴士中心博多バスターミナル五樓的100円店，第一次到這裡，原來不是每部扶手電梯都可以上到去，要分顏色，每種顏色都可以到達唔到的樓層，要乘紫色和黃色的扶手電梯才可以到。

　　這間 100円店真係大得好犀利，要行成日先可以行得晒，我哋只有個半鐘時間，所以只揀咗有興趣的種類嚟下，行咗大半個鐘已經買了十多件，時間差不多了，俾錢離開，返酒店攞番個行李喼。

博多車站，左邊的就係博多バスターミナル

地庫大裝修，好多店鋪都無營業

差點迷路，好彩還記得一蘭拉麵的位置，好快就搵到

食券機

空位案內板，有無位，一目了然

張紙有分中文，日文，英文，唔怕睇唔明

填完後按下個鈴，職員就會嚟收食券和張紙，好快就有得食

我的叉燒拉麵

白熊的叉燒拉麵，要求的味道同我唔同

真係好好食，白熊連湯都飲埋

每個坐位原本是有塊木板隔開的，如果一班人一齊嚟食，交談就好唔方便，但原來......

塊木板有個制的

拉起個制就可以收埋塊板，不過我係食完麵臨走時先知，所以食麵時好孤獨，見唔到白熊

店外面有一蘭拉麵手信店，有各款拉麵手信出售

　　由於今朝已經搵定邊個閘口搭巴士去機場，所以攞完行李行去巴士中心，直接到二樓的 11號閘口，去到時已經排長龍，咁我同白熊就只好跟住排啦！但係。。。點解有巴士嚟咗，條龍都唔係好郁嘅？？於是我行前去睇下啦，原來前面有一班香港人係度等人，霸住個龍頭位，有巴士又唔上，又唔讓開，阻住晒其他人，真係好無禮貌，搞到我同白熊都唔敢出聲，怕比人知我哋係香港人，真係好無面。
　　
　　上巴士時才知這架巴士係經機場去太宰府，車內沒有位置放行李喼，好彩我個喼唔係好大，所以直接攞咗上車，放係坐位旁邊。

　　巴士開得好慢，好慢......，而且日本的巴士係仲奉行停車熄車，行下，停下，開下，原本幾分鐘車程足足用了二十分鐘才到，不過同乘地鐵轉免費穿梭巴士的差不多，現在起碼不用轉車，簡單好多，舒舒服服就到。到了機場，先到航空公司辦理手續，寄好行李就過海關，手續一切都好順利。

　　到了登機閘口，想搵啲暖水又出了問題，禁區內的飲水機只得凍水，沒有熱水供應，問下商店職員，佢話係母嬰室有熱水供應，不過入到去只見到個水龍頭有冷熱水，沒有顯示有可飲用的熱水，究竟係邊度有熱水呀，咁唯有行去另一邊的母嬰室睇下，情況都係樣，點算呢？

　　最後決定在自動販賣機買熱茶，一樽可以斟滿我的暖壼，所以就不再去搵熱水；由於我哋係坐廉航，機上沒有免費飛機餐供應，所以先在機場禁區食啲野先，食完啲野食好鬼口渴，諗住去斟水飲，途中聽到好似改咗登機閘口，於是就行去中間，睇下個電子板確認一下，原來真係改咗去另一邊的閘口，斟咗少少水就番去搵白熊，但白熊見我咁耐都唔返嚟，又走去搵我，結果玩咗一陣捉迷藏，見面時同佢講轉咗閘口，不過就係前面，唔使行。

　　係時候上機，於是到自助販賣機買熱茶，但係唔熱，日本其他地方的自助販賣機賣的熱飲係好熱喎！點解呢度的唔熱架，早知就直接斟凍水啦！唔知點解今次的行程，每次登機前都有些阻滯，搞到好遲先可以上機。如果冬天再來，要搵定點樣可以搵到熱水，聽聞機上可以問空姐攞熱水（當然要俾錢），如果可以，咁就唔使咁煩。

　　坐了三個多鐘頭機就返到香港，回到家已經九點多了，成個身散晒，都係執好啲野就休息。

　　寫遊記期間，像五年前一樣，日本發生地震；上次是311日本東北發生9級大地震，今次是熊本地震，以前到過的阿蘇神社、熊本城都受破壞，無數日本人痛失家園，災難實在令人傷感，希望不幸的災民可以可以快快重建家園。努力！加油！

我同白熊乘的巴士，車外車底層可放行李，不過上車時沒有留意到，巴士去太宰府，不過架車行得咁慢，唔知要幾耐先到太宰府