行程 : 酒店 → 城山展望台 → 仙巌園 → 熊本城 → 酒店
住宿：スーパーホテルCity熊本 6,300円
高速收費：鹿兒島至熊本 3,150円
早上未夠七點就起床，梳洗後就到地下大堂食午餐，食飽後就返房執好行李，到地下接待處 Checkout，取車後 08:25出發到鹿兒島市城山展望台（Mapcode：42 036 155），車程約 9分鐘，好快就到，泊車後沿手信店旁邊的小路行，不用一分鐘就到展望台，不過啲火山灰搞到個天好灰濛濛，這裏原本是看桵島的最佳位置，現在連桵島影都見唔到，真係好失望。
熟口熟面的早餐，不過好飽肚架
今日的行程，要由鹿兒島揸車到熊本，仲要係遊埋熊本城，時間有些緊，所以不可以在仙巌園逗留得太耐
城山展望所巴士站，原來可以乘定期観光バス嚟依度，會經多處景點，部份地方還可以落車參觀遊覽，不過車費要成 2,200円，都幾貴
有個大型無料停車場，有好多車位，唔怕無位泊
對面有好多手信店
跟住指示牌方向行去展望台
「行幸記念碑」，第30代島當主津忠重所書的紀念碑
城山茶屋
哇～個天好鬼矇，桵島呀！你係邊度呀！！！
連鹿兒島市都係矇查查
有投幣式的望遠鏡可以睇風景，不過咁鬼矇，都可以慳番
回程落山時見到路旁有個好大個石像，於是駛入去泊低架車行下，原來係西郷隆盛的銅像
銅像旁的西郷隆盛洞窟資料館せごどん，洞窟內展出西南戰爭的資料
09:00出發到仙巌園（Mapcode：42 099 585），車程約10分鐘，去到仙巌園時有職員指示點去停車場，泊好車後就到入口購票，在自動購票機前有職員同我哋講解收費，一般參觀庭園（庭園コース）每人1,000円，另外一種門票是包埋參觀磯御殿（御殿コース），收費是1,500円，我們買了兩張御殿コース後就入去參觀仙巌園。
仙巌園因所在地的地名為「磯」，故又名為「磯庭園」，薩摩藩主島津齊彬的後代島津忠義於1658年建立的別墅，庭園以磯山為靠背 眺望錦江灣和櫻島，設計上完全將錦江、櫻島和磯山融為一體，是極具代表性的日本式借景庭園。園內多處地方是2008年NHK年度大河劇創下最高收視率『篤姬』的拍攝點。
停車場入口，收費300円一次
在停車場旁的鶴嶺神社是島津家所建立的神社，是供奉島津家族歷代戶主及家人的神社
入口
自動售票機
御殿コース門票和園內旅遊地圖
紀念印，個印又幾靚喎
島津家的盔甲
薩摩藩百五十斤鉄製大砲，哇～好巨型嘅大砲，乜原來係百幾年前日本的軍備已經咁勁架
昇平丸模型
桜島大根，即是櫻島蘿蔔，是鹿兒島的土特產，健力士記錄大全認定為世界第一大的蘿蔔。重量通常約6kg，最大的約30kg，而直徑約40-50cm
「水天渕発電所記念碑」，有島津家族的「圓型十字」家紋；在明治40年(1907年)，水天淵發電站是為了供電給姶良郡（現霧島市），在島津家經營的山ヶ野金山（横川町・さつま町）上興建的發電站。紀念碑是水天淵發電站被拆後，留下的一部份，由九州電力株式會社送出，在這裏展示給遊人
仙巌園的正門，薩摩藩12代藩主島津氏29代當主島津忠義建造，門上刻有島津家族的家紋～圓型十字紋和桐花紋，不過現在這度門祇是供遊客觀光
獅子乗大石燈籠
園內有好多梅花樹
剛好有部份白色的梅花開咗，雖然唔係好多花開咗，但係好靚
鶴燈籠～-因造型似仙鶴展翅而得名，島津齊彬藩主靠蘭學家翻譯外國的方法，由御殿舖設一條煤氣管道至此，完成日本第一盞的煤氣燈
遠處是磯御殿
過了條石橋就到園的另一邊
在「篤姬」劇中尚五郎下雨天撐傘狂奔的石階，這裏行上去就係「曲水の庭」
「曲水の庭」是舉行曲水宴的庭院，宴會中要在水中漂浮的酒杯漂到自己的位置之前要作出詩句。現在是冬天，所以地上沒有青綠的草
睇吓「篤姬」的劇照，綠油油的草地，好鬼靚，可惜現在睇唔到
「曲水の庭」另一邊，如果多番啲綠色就 Very Good
諗住沿著行一個圈，點知要過呢條咁鬼危險的石橋，萬一企唔隱點算呀，都係行番轉頭好啲
遠處山上的千尋巌
薩摩藩10代藩主27代當主島津齊興於1814年興派了接近四千人，花了三個月時間在岩壁上刻了「千尋巌」三個大字，共長11米
「江南竹林」，受中國文化影響，1736年薩摩藩4代藩主21代當主島津吉貴從中國引進孟宗竹栽種，從此傳遍日本各地
御庭神社
淨手處的水是地下泉水
社殿
「発電用ダム跡」，29代當主島津忠義建造的蓄水式發電機遺跡，1892年使用這個水力發電機為府邸和庭園提供照明和電話，而鹿兒島市內的電燈和電話分別於1897年和1906年才開始使用
茶室「秀成荘」「徒然庵」昭和62年被建的茶室，1851年28代當主島津齊彬，建造「集成館」，其養子29代當主島津忠義於1892年，把集成館的部分功能遷移到此，命名為「就成所」
平凡的水池
原來這個池叫「瓢池」，我估係因個池形狀似葫蘆而得名，可惜影唔到佢既葫蘆形狀
園內中間的小河～保津川
行呢條石橋過河
水道橋周辺，篤姬在這裏拍攝時的情況
保津川旁的一間小茅屋，這是拍攝「篤姬」時搭的茶店佈景
現在留下來給遊人拍照留念
「猫神神社」是祭祀17代藩主島津義弘自朝鮮帶回來的貓．當時人們習慣以貓瞳孔的門合來判斷時間，它成鹿兒島鐘錶業界的人必來的參拜神社
淨手地方
好細的貓神社
睇下，裡面真係有隻貓公仔架
猫屋，即貓商店，店內出售好多同貓有關的物品
好神氣的貓公仔
招財貓原來係分左右手的，右手招金運，左手招人運
估吓呢間係乜野屋？
「濾過池」，當時都有濾水池，真利害！
旁邊有棵盛開的梅花樹
好靚呀
迫ン太郎
自動水力打磨機，引山上的水來推動呢部迫太郎，定時會自動打一下個鎚，發出好大的聲音，初初仲被佢嚇親
本來想沿指示牌行去觀音舍舊跡和筆塜舊跡等等
不過唔知要行幾耐，見時間唔鬆動，都係唔行好啲
向番下行，見到「筆塚」石碑
錫門～最大特色是瓦片以薩摩相當出名的特產品錫來製造，再配朱紅色的大門，是日本國內唯一的錫製大門。錫門原是仙巌園的正門，後來薩摩藩10代藩主島津家27代當主島津齊興擴建庭園後，這裏變成中門，相傳祇有戶主和世子才可以由這度門進出
磯御殿是歷代藩主生活居住處，主屋的參觀行程，每20分鐘一場，包括參觀島津忠義的臥室、起居室、工作間、會客室、餐廳，還有梳妝間、洗手間和浴室（御湯殿），入內參觀要先在玄關除鞋，內裏不可以影相，職員知道我哋是外國人，派發了兩份中文的解說．咁都無咁驚，如果唔係真係唔知佢講乜
導覽磯御殿的是一位穿著和服的女士，全程都係用日語講解，好彩識聽少少，全程只有兩個地方可以影相，呢度在屋外的長廊影出面的庭園，見唔見到獅子乗大石燈籠，好靚的實景畫
另一個地方就係殿內的庭園
個佈局好靚，好有寧靜和諧的感覺
參觀開始前，職員每人派發了一張お抺茶引換券（抺茶換領券），背後還有地圖指示點去茶室，不過唔識去都唔緊要，導覽結束後，工作人員會帶大家到主屋後方的茶室「竹徑亭」喝茶和吃點心！
竹徑亭，食茶點的茶屋
お抹茶和お菓子(飛竜頭)
小菓子，上面有島津家家紋～圓型十字，小巧菓子味道很甜，吃完再喝抹茶就啱啱好
磯名產～両棒餅，其實是ㄧ顆麻糬串了兩根竹棒，再加上醬油
睇落去幾好食咁喎
我哋買咗盒 300円嚟食
有六條両棒餅，凍的，味道就麻麻，可能我唔係幾鍾意啲醬油味
遊完庭園後已經 11:15，差不多時間要出發到熊本，還有兩間博物館未參觀，於是趕快腳步，好彩館內係不准影相，所以只係睇唔影相，好快就行完，11:40出發到熊本城二の丸駐車場（Mapcode：29 489 194）。
由鹿兒島去熊本原本的高速收費要 4,050円，預計時間2小時35分鐘，我哋就揀了條只係 3,150円的路線行，不過要早一個 IC離開高速，再行國道，時間只係用多了少少。閉～唔記得安排今日的午餐添，揸揸下車好鬼肚餓，於是就入咗去途中的山江 SA買野食，不過呢個 SA唔係好多食店，最後只係買了個包和飯團食。
唔知我揸車係唔係好慢呢，係高速真係逢車過車（不過係俾人過頭），條高速大部份都只係雙線行車，路的兩旁都係山，睇唔到較遠的路，而且又有好多隧道，真係唔敢開得太快，所以比預定時間慢了少少。離開松橋IC後，我哋先搵油站入油，今次都係去ENEOS，入咗22.8L @137円，一共 3,123円。15:00到達熊本城，在二の丸駐車場泊好車後就行去熊本城參觀。
尚古集成館～於大正12年(1923年)開館，展出約1萬件島津家的物品、包括歷代薩摩藩主的文書典籍、書畫、鎧甲，以及薩摩切子、薩摩燒陶瓷等工藝品
「明治天皇行幸所集成館」紀念碑
尚古集成館
館內呈現了28代當主島津齊彬在西歐科學工業研究而設置的工廠群，展現出藩主致力改變日本的心意
尚古集成館別館，館內展出好多當時的人形公仔
高速收費咭，離開高速就用佢嚟計算收費
GPS係高速時的畫面，清楚說明跟住會經過的 IC和SA/PA，我哋係松橋 IC出，仲有 111km
山江SA
大型停車場，有好多車位任泊
乜呢度有咁大嘅茶壼，做乜放咁高呀，點酙茶呀
「五木の子守唄像」
今日的午餐，我的芝士漢堡包 126円和白熊的三文魚飯團 100円，雖然個漢堡包係番叮，有少少暖，不過味道都唔錯，食完就繼續行程
由停車場行去熊本城的桜花小路，可惜依家唔係桵花季節，如果唔係就正～
穿過西大手門就係熊本城
到咗熊本城喇～
正門玄関～頬当御門，旁邊就係售票處
入場券，每位 500円，門口收飛的大叔見到我哋係度影門券就知我哋係大鄉里外國人，於是問我哋係邊度嚟，跟著去售票處攞張中文版旅遊指南比我哋
中文版熊本城簡介，上面有個位可以蓋紀念印
紀念印，收集了咁多個印，呢個最靚
熊本城別名銀杏城，與名古屋城、大坂城並稱為日本三大名城。它是豐臣秀吉旗下大將加藤清正受封為熊本城主後於1601開始動工、1607年完工的城堡，現在的天守閣是在1960年重建
城中有幾名武士打扮專給遊人影相，呢個穿著全套鎧甲的門衛武士好專業，一見到相機對住佢，佢就即刻擺post
這塊花崗岩，被稱為「首掛石」，重1.8噸，這舊石流傳著一個在天草地區內亂時發生的「横手五郎」鬼魂作崇的故事
穿過這條隧道行去天守閣
好黑又陰森的隧道
好宏偉的天守閣
加藤清正，好有型呀～
熊本城仔，好可愛
同真嘅熊本城合影番張相先
天守閣入口旁的守衛．咁多個呢個最辛苦，要企定定係度，唔可以四圍行，辛苦晒喇～
天守閣館展示由加藤清正時期到西南戰爭的歷史資料、日式盔甲及火槍
頂層的展望所，可以睇晒整個熊本城
宇土櫓
我哋就係泊係呢個二の丸駐車場，係免費的，任泊唔嬲
在高處向下望天守閣前面的空地
本丸御殿，不過無入去參觀
加藤清正～日本安土桃山時代、江戶時代武將和大名，是初代熊本藩主
宮本武蔵～江戶時代初期的劍道家、兵法家、藝術家，是日本歷史上最重要的劍客之一
細川忠興是日本安土桃山時代及江戶時代的武將，細川ガラシャ(Gracia)是細川忠興的正室
參觀完熊本城後行番去停車場，經過南大手門
西大手門，穿返過去就係停車場
又經過呢條桵花道
16:15返到停車場，個天開始下雨，都係早啲出發到スーパーホテルCity熊本（Tel：096-351-9000），16:30到逹酒店，好彩已經停了雨。酒店的停車場是立體停車場，同東橫Inn 的一樣，在停車場前有位叔叔係度幫我哋安排泊車，泊好車後俾咗張泊車紙我，跟住到酒店大堂的接待處辦 Checkin 手續。我將泊車紙交給職員，先付停車場費 500円，職員再收今晚房租 6,300円，然後幫我哋搞部自助 Checkin 機，辦妥後部機出番張收據，上面有房號同門鎖密碼，同上次係宮崎果間一樣。
在大堂取了浴衣和枕頭就上房，放低行李後，我先到酒店二樓浸免費溫泉，溫泉分男女時段，男湯至到17:50，見有時間，我就浸完溫泉先去食晚餐。臨離開酒店在大堂睇下附近的地圖，搵下有無啲食店推介，睇睇下有位女職員主動行埋嚟問有無野可以幫手，我哋就同佢講想搵餐廳食晚餐，於是佢就教我哋點行，我哋跟指示出了酒店轉左，沿住有電車路軌的行人路行，條路兩旁的店舖大部份已經關門，成條路黑麻麻，都唔見到有餐廳。
行到慶德校前駅附近，見到有間便當店ほっかほっか亭，諗住買個便當返酒店食，不過都係在附近行多陣睇下有無其他的選擇，結果行到去巴士站旁的隧道見到有餐廳的指示，跟住行落去就見到一間 Center Plaza，店內有各式各樣的食物出售，最後就買了一些天婦羅和鰻魚便當，跟住就行番去之前間便當店ほっかほっか亭買埋個便當便行番去酒店。
上到房食飽後就攞袋衫落去二樓洗衫，原本係計畫每四天洗一次衫，但明天長崎的酒店洗衫要成 300円，雖然係包埋洗衣粉，但都覺得貴，而 Super Hotel只係 100円，平好多，所以就提早一日洗衫；洗緊衫時返房上下網睇下明天的行程，閉！唔記得去預約熊本フェリ 09:25的渡輪，在網上仲見到九商フェリ做緊特價優惠，不過啲班次唔係好啱，都係唔好諗咁多，明天去到先算，三十幾分鐘後啲衫洗好，落去攞返啲衫返房晾好後就上床休息。
スーパーホテルCity熊本
立體停車場入口
立體停車場有高度限制，只有 1.55M高，如過高的就要泊另外的停車場
停車場升降機入口，旁邊有位叔叔幫我哋安排泊車和搞部控制機，有 128個車位，唔怕無位泊車
浴衣，攞番兩件先
枕頭，唔係有好多，手快有手慢無
房門門鎖，同宮崎的外形唔同
入到房有條線係地下，寫住 Have a nice dream
今晚住的房，張床只係得一個枕頭，好彩有攞到枕頭
設備好齊全
洗手間
酒店二樓有免費溫泉浸，不過要分男女時段，現在係男湯時段，見有時間，我就浸完溫泉先去食晚餐
慶德校前駅附近地庫的 Center Plaza
我哋係呢間度買了盒鰻魚飯 880円
啲天婦羅好平喎，睇落好好味咁喎，買咗啲炸魚和炸南瓜加餸，一共 340円
在便當店ほっかほっか亭辛島町分店，買了盒とり肉焼きそば弁当加溫玉 440円
今日的晚餐，我啲雞肉飯加炒麵味道唔錯，其他的都好好味，呢餐食得好飽，鰻魚飯上裝醬汁的小圓膠盒，用後洗番乾淨佢，留待去呼子朝市食海膽時用
二樓的洗衣機和自動售買機
仲有部電子微波爐，早知就攞啲晚餐叮番熱嚟食
沒有留言:
張貼留言