行程 : 酒店 → 池田湖 → 薩摩半島長崎鼻 → JR西大山駅 → 知覧特攻平和会館 → 知覧武家屋敷庭園群 → 清水磨崖仏 → 酒店
住宿：東橫inn鹿兒島天文館II 6,384円 (原價7,980円，會員八折)
今朝七點起床，八點到大堂吃早餐，吃完早餐後先返上房。尋晚洗嘅厚褲今朝乾晒，又可以著番，這兩日在鹿兒島有成十幾度，連內胆既羽絨褸都唔洗著，到去到熊本先要再著羽絨，今日一身輕便衣服加埋個背囊就起程。
落到大堂先到接待處問職員攞泊車鎖匙，職員話攞車係唔洗用鎖匙，仲俾張說明書我哋睇，知道點攞車後就到停車場取車。08:45出發到池田湖（Mapcode：285 276 393）睇「水怪」，由酒店去池田湖原本車程約 1小時22分鐘，但係離開酒店無幾耐就開始塞車，行咗一半先唔再塞車，但係又唔見有撞車或壞車，都唔知點解。
10:25到達池田湖，唔知係太早定係唔係假期關係，唔係好多遊人，而且對面的手信店有一半未開門，在附近影下相和睇日本最大的鰻魚後就離開，開車唔夠一分鐘，係路邊見到有隻好大隻的水怪石像，湖邊仲有一大遍好靚的油菜花田，於是倒頭泊係隻大水怪旁邊的無料停車場，原來呢度就係池田湖パラダイス（Mapcode：285 275 231），影完水怪和油菜花田就出發到薩摩半島長崎鼻（Mapcode：648 565 625）。
沒有特別驚喜的早餐
打開控制箱，跟住按「スタート」
顯示板就會顯示出個數字鍵盤，如果係泊車就插入鎖匙，依家係攞車，所以就係鍵盤按車位號碼，然後再按「OK」
部機就會自動將部車運送到地下，125秒後度閘門就會打開，將架車揸出嚟之後，先按「スタート」，再按「戸閉」就完成，其實係個控制箱度門裡面有齊泊車和取車的步驟說明，單睇漢字都明點做，一啲都唔難
第十日的行程，今日係會環繞指宿一個圈，又要揸長途車，連揸咁多日長途車，個人真係幾攰
池田湖，成個車場得幾架車，都幾冷清
可能太早的關係，有部份手信店仲未開門
呢度有不同種類既盆栽賣
唔知係咪水怪呢？我就話似恐龍多啲
另一面，之前果張背光，呢張就靚好多
歡迎池田湖，白熊快啲伸個頭埋去影番張相吖
在洗手間外看到好可愛的恐龍女（水怪女），代表女洗手間
仲有藍色的恐龍仔（水怪仔），代表男洗手間
湖邊有個碼頭，行過去睇下先
有世界最大條的鰻魚睇
哇，真係好大條
隔離仲有另一條鰻魚，唔知邊條大啲呢
停車場旁的小食店，之前睇過其他人的遊記話右邊間串燒好好味，本來想買嚟食下，但係今日無開門營業
最後買咗杯紫蕃薯雪榚250円，杯雪榚好有蕃薯味，好好食呀
離開時遠遠見到呢隻大水怪，所以就駛入嚟同佢影下相
呢度都有大鰻魚睇喎，究竟邊條先係世界一呢？
哇！好靚既油菜花田
10:30到薩摩半島長崎鼻，但係行到去路口時見到條路封咗，跟住有位大叔講咗一大堆日文，我當然聽唔明喇，不過就知道係唔可以揸車入去，係附近有好多手信店的無料停車場，不過唔知係唔係要買滿幾多錢先可以免費呢？都係倒頭去長崎鼻灯台無料駐車場泊車好了。泊好車後就行去燈塔，係海邊可以好清楚看到有薩摩富士山之稱的開聞岳，在冬天如果山頂有積雪的話就更加靚。
遊完海邊和燈塔後就出發到日本最南的 JR車站～西大山駅（Mapcode：285 069 403），車程約十多分鐘，沿途都可以睇到開聞岳，到了JR西大山駅，西大山駅係一個好細的車站，月台係可以行入去的，「日本最南端の駅」就係月台裡面，而且還有開聞岳做背景，一定要影番張相留念才可以。影完後就出發到知覧特攻平和会館（Tel：0993-83-2525）。
係路口的長崎鼻灯台無料駐車場
停車場旁的長崎鼻パーキングガーデン（Tel：0993-35-0111），用佢嚟定位就方便好多
長崎鼻パーキングガーデン係一間動植物樂園，定時會有動物表演，入場費每位 1,200円，不過無打算入去，只係在售票處門口前同隻可愛的紅金剛鸚鵡影相
沿呢條樓梯行上去
呢個車場係下午五點就關門，唔好太遲返嚟攞車
樓梯旁白蛇神社
繼續向前行，唔洗一分鐘就到
條路封咗唔俾車行，路旁有好幾個手信店停車場
行到海邊見到竜宮神社的鳥居
鳥居旁有個烏龜，不過睇真啲，佢條尾好特別喎，仲有四隻有爪的腳，原來呢隻係玄武
哇，好大隻蛤蟆呀，真係有咁大隻蛤姆隨街走
竜宮神社正門
神殿
前面有個隻用石仔鋪的烏龜圖案
神社旁放了個甕缸，裡面有好多寫了願望貝殼，呢度同青島神社一樣用貝殼來祈福的
離開神社繼續向前行，遠處就係長崎鼻燈塔
必影的地方，後面就係薩摩富士山～開聞岳
同桵島一樣，俾啲火山灰搞到灰濛濛咁，好失望
之前經過過的手信店
篠原鳳作句碑
長崎鼻灯台
係燈塔睇開聞岳仲靚
燈塔旁邊有條樓梯可以落去海邊
啲岩石崎嶇不平，都係唔落去好啲
唔知呢兩條柱係乜野呢？
黑色的沙灘，不過落去的路好斜好危險，所以無行落去
回程時見到有個水喉，看出水的方向來看應該係可以飲用的
圓形的指示盤
指示對出幾個海島的方向和距離
洗手間指示牌，上面有一啲關於龍宮傳說的人物和花草圖案
洗手間
男廁，上面係浦島太郎
女廁，上面就係龍宮公主
洗手間內的放傘的地方，一入門口就見到
去西大山駅途中係可以看到開聞岳，咁靚忍唔住叫白熊影多幾張相
西大山駅
站前有個無料停車場
車站旁已經有寫住 JR日本最南端的橫額
車站前種了好多好靚的花
呢度除了列出西大山是JR日本最南端的駅，還列出JR最東、最西和最北的駅；而日本最南端的車站是在沖縄県那覇市赤嶺2丁目にある沖縄都市モノレール線的赤嶺駅，希望第日有機會到這些車站一遊
月台，無買車票都可以行去入架
係月台旁就有個標柱，後面就係開聞岳，記得要影番張相留念下呀
車站前的手信店，中國久太郎商店，睇個名好似係中國人開的
影完相就出發到知覧特攻平和会館，不過已經好肚餓，所以在途經便利店買啲野食
白熊的霹靂大腸
我就要豬肉蒸包，以前係 7仔都買過蒸包，又乾又唔好食，可能蒸咗好耐都無人買，不過呢間就唔同，好軟熟好好味，正～
由JR西大山駅（Mapcode：285 069 403）到知覧特攻平和会館（Tel：0993-83-2525）預計車程 1小時 3分鐘，13:40到達目的地，知覧特攻平和会館附近有大型無料停車場，泊好車後先到附近的食店食午餐，係呢度有多間食店，最後去咗一間叫ちちん亭食，食飽後就行去知覧特攻平和会館行下，会館入場費每位 500円，不過無打算入去參觀，只係在外面逛下影下飛機就算。
知覧特攻平和会館停車場
旁邊的食店停車場入口，呢度有好多位泊旅遊巴，是著名的旅遊景點
好大個茶壺呀，原來知覧茶好出名架，大茶壺旁邊有間觀光案內所
今日午餐就係呢間ちらん亭食
啲飲料係自助的，自己酙完後埋單時才計數
食店內部，啲坐位幾舒服架
我的ロースカツカレー 850円，啲豚扒好嫩，估唔到原來都幾好味喎
白熊的黑豚ナンコッ卵とじ丼800円，豚肉同飯都熱騰騰，祇識用好味嚟形容
食完飯行返去停車場
係停車場最埋面係南九州知覧文化会館，不過無入去行
跟住轉右面就係知覧特攻平和会館西入口
靜靜的庭園有個「和平の鐘」
平和會館的興建就是為了紀念當年因戰爭陣亡的軍人，並藉此祈求世界和平，不再有戰爭。不過不想看戰爭的慘況，所以沒有入內
特攻像「とこしえに」
紀念「永遠」～沒有歸來的特攻隊
這架T-3飛機是自衛隊的練習機，2005年停用，同年5月外借在這裡展覽
2007年電影「俺は君のためにこそ死ににいく」宣傳照，演員和—式戰鬥機「隼」III型的合照，故事藍本是以第二次世界大戰特政隊為背景
第二次世界大戰鹿児島県的知覧飛機場是特攻隊的基地，這架—式戰鬥機「隼」III型是當時的作戰飛機
母の像「やすらかに」，表達母親對兒子的盼望
大石燈龍，旁邊有個「和平」的紀念石
知覧町護国神社
拝殿
特攻平和観音堂
本殿
手水舍
鳥濱トメさん顕賞の碑
13:52離開知覧特攻平和会館出發到知覧武家屋敷庭園群（Tel：0993-58-7878），車程只係幾分鐘，到了附近見到有料駐車場指示牌，就按指示駛入去，停車場收費每小時 200円，泊好車後就過對面參觀知覧武家屋敷庭園群，入場券每位 500円，因為係入口見唔到售票處，初初仲以為售票處係庭園裡面，但係結果入到去都見唔到，於是只好係外面影下相就算，到行完一個圈在出發地點才看到售票處，不過覺得這個知覧武家屋敷庭園群其實不是太吸引，無入到去都不覺失望。
遊完後只係 15:45，見仲有時間，順路去埋清水磨崖仏。呢個地方係在池田湖的旅遊景點介紹板上見到的，覺得幾吸引，且又是順路，不過我哋淨係知道個名，又無電話又無 Mapcode，點定位好呢？好彩部 GPS仲可以用景點名稱來定位的，清水磨崖仏的英文係「Kiyomizu Buddha Rock Carving」，於是就照住打番個日文假名，只係打到「きよみ」就出咗清水岩屋公園，原來用日本名定位係咁簡單。
離開知覧特攻平和会館，便看到這條櫻花路，如果三、四月來這裏肯定會看到好靚既櫻花
見到這個指示牌，轉左就見到停車場
停車場旁的折田君像
過了馬路直行可到石坂上遺跡和知覧城跡，下次有機會去行吓
在入口的武家屋敷庭園群石碑，見唔到售票處，於是行入去搵下
條路好清靜呀，兩旁仲種了好多植物，環境好正呀
見到這個牌，以為裏面有售票處
我哋入咗去～西郷恵一郎邸庭園
裏面有好多以前屋主的物品
鎧甲
女兒節公仔，啲手工好精緻呀
棵松樹又幾靚喎
平山克己邸庭園，因為沒有買入場券，所以之後的庭園我哋沒有再入去參觀，祇係係門口影張相
平山亮一邸庭園
繼續向前行，風景好靚
據門框上的木牌，相信以前是「松元」氏的庭園
一間重建了的房屋，門前仍保留以前的門框
舊高城住宅，知覧型二ツ家，現在用作茶室之用
原來間屋係用乾草做的，而且係由兩間屋雙連建成的，係以前鹿兒島獨特的平民建屋的方式
白色的屋，好少見喎，應該都係新建的，同呢度的有點格格不入
逛完後行返出大路，見到條橫街有個寫住「入園料取扱所」，但係都係唔知係邊度買票
馬路邊的小溪，有點似島原市上的湧泉，好彩係度見到，到咗島原市搵唔到養金魚既湧泉
咁細條小溪上竟然有個水車，真係奇景
小溪上係有魚架，養到咁肥，真係好食好住
知覧武家屋敷庭園群對面的麓橋
見到附近地圖話呢度叫做麓公園
條麓橋好靚
橋下面係麓川
半圓形一級級，咁得意，有乜野用呢？用來洗衫？我諗係上落船的地方掛
真係眼大睇過龍，原來係呢度買入場券的，係過了麓公園，未過馬路去武家屋敷庭園群入口處之前
16:10到清水岩屋公園，點知原來個公園維修無開門，我哋唯有係好遠咁 Zoom埋去影就算，個公園鬼影都無隻，都係快啲走。五點左右返到酒店，泊好車返上房抖一陣就出去食晚餐，今晚去天文館吾愛人食，入到去被安排坐「Bar枱」，我哋點了極上黑豚のしゃぶ鍋加麵5,600円兩人前，啲野食送上嚟見到有碟青黃色的醬和葱，於是我哋就當平時咁用醬油加埋一齊，點知.....
有位負責煮關東煮的嬸嬸在裏面留意到我哋兩個大鄉里外國人，見我哋咁搞法，行出嚟用身體語言話比我地知唔啱，原來係用火鍋上的湯汁加埋啲葱和青黃色醬，哇～好好味呀～～之前用醬油覺得好咸味，加上湯汁本身已經有咸味，黑豚變咗好咸，完全食唔到啲黑豚的鮮味，而家只係用湯汁再拌啲醬嚟食，就可以食到原汁原味，日本的黑豚真係零捨唔同，好有肉味，呢餐食得好飽，跟住散咗一陣步，才返酒店休息。
係池田湖的景點介紹板上的清水磨崖仏的介紹，你睇下幾靚
岩屋公園地圖（清水岩屋公園）
遠處山邊就係清水磨崖仏
啲火山灰真可惡，灰濛濛，隱約只係睇到少少
個公園有好多兒童設施，真係細路仔的樂園
今晚就係係呢度食
先嚟兩碟前菜先
青黃色醬和日本蔥
係個煲度裝少少湯汁落個碗度，再加上少少青黃色醬和日本蔥，就完成拌黑豚的醬汁
黑豚肉，碟上有四種唔同部位的肉片，每種都好好味
個餐仲有蔬菜，好豐富呀
另外添加的手造麵，用煮完黑豚啲湯嚟煮麵，味道更加美味
沒有留言:
張貼留言