行程 : 酒店 → 熊本港 → 島原港(乘汽車渡輪九商フェリー) → 島原城 → 雲仙地獄 → Glover Garden → 眼鏡橋 → 酒店 → 稻佐山夜景 → 酒店
住宿：ホテルウィング・ポート長崎 7,000円
汽車渡海輪：九商フェリー 熊本港至島原港 2,180円
由於計劃乘今朝 09:25熊本フェリー的汽車渡輪到島原港，所以未夠七點就起床，梳洗後就到酒店大堂「旅彩」餐廳食早餐，食飽後返房執好行李後 08:30到停車場攞車，點知在停車場內已經有好多人係度等緊攞車，到 08:50我哋先攞到車出發到島原城（Tel：0957-62-4766），GPS會教我哋去熊本港碼頭乘船到島原港，好方便。由於時間緊迫，只好加快速度，但係早上交通多車繁忙，而且又有好多修路工程，差不多九點半才到碼頭，熊本フェリ的船已經開出了，唯有改乘九商フェリー，將架車駛到九商フェリー的停車場內排好隊後就落車到售票處買 09:55班次的船票。船票的價錢係以車的長度來劃分的，但係我哋唔知點同個售票員講，好彩女職員可能見慣我哋啲大鄉里外國人，於是問我哋攞條車匙睇下，我哋俾條匙佢睇後就知買邊種船票，買好船票就上番車等上船。
熊本フェリー所用的船係快船，船程只須 30分鐘，但係九商フェリー則係慢船，船程要一個鐘，真係慢好多，不過除了繁忙時間之外，其他時段都有三四折扣，平好多，今日九商フェリー做緊全日優惠，票價足足平了千幾円。到09:45開始上船，係前面有位職員收票尾後就上船，泊好架車後就上樓上睇海鷗，有一大群海鷗係碼頭休息，一見架船開出，佢哋就立即起飛緊隨其後，閉～我哋無買到蝦條添，記得有網友話係船邊有 100円的蝦條買，點解搵唔到，點好呢？唔驚，尋晚我哋係便利店買咗啲零食，當中有百力滋，於是開了包百力滋去餵海鷗，海鷗一樣照食，其實餵乜佢都會食，之後見到有人餵麵包佢地一樣照食。
海鷗的飛行技術好利害，架船開得咁快，而且又大風，佢哋都可以好準確食到啲百力滋，成包百力滋好快就餵晒，於是返船倉休息下，不過睇番之前影的相，效果唔係幾好喎，好彩仲有一包百力滋，於是又出去餵海鷗，真係玩到不亦樂乎，餵完海鷗後架船差不多到碼頭，係時候返落去架車度。
昨天 Checkin 時職員給我哋的酒店簡介，裡面有張早餐券，上面寫住食早餐時要帶落去，但係去到餐廳職員無查到餐券
今日的早餐，款式又多，味道唔錯，呢餐食到好飽
呢部機早上7:00－9:00係免費任飲，擺放在餐廳門外，有好多選擇架，最多都係咖啡，不過我哋食飽早餐後離開餐廳時才見到呢部機，只好攞杯飲品返房飲
二樓浸溫泉的地方，現在是女湯時段
路線圖，要乘汽車渡輪由熊本去島原，在船上可以餵海鷗，好期待呀
到了熊本港碼頭，左邊的熊本フェリー無晒車，我哋就跟右邊的九商フェリー車龍排隊
停車場旁邊就係汽車渡輪的售票處
九商フェリー售票櫃台
乘船券，一架車司機連一位乘客只係 2,180円，好平呀
汽車渡輪船倉，排排坐．吃粉果
架車的後軚放了兩舊木頭防止架車流前流後
呢班船唔係好滿喎，二樓船倉一架車都無
熊本，拜拜喇！！
三樓乘客船倉內的小賣部，開咗船先見到佢開咗門
架船一開出，呢群海鷗就跟住係架船旁邊飛
仲有啲企係船柵度
開始餵海鷗時間到喇
就嚟食到喇
差少少，睇下隻海鷗金精火睇咁睇實條百力滋
未夠十點就到島原港，GPS例牌又失靈一陣，不過好快就無問題，11:00到了島原城停車場，停車場收費每日每次 310円，至於島原城入場券就要 520円；行程計劃是不入島原城本丸參觀，只係在島原市附近行下。因為搭不到09:25班快船，今日比預定時間遲了個幾鐘頭才到島原城，泊好車影完島原城後就沿梅園的小路行去会館方向，本來打算四處逛找找島原市的特色地下湧泉街（湧水めぐり），可借找不到。逗留了差不多30分鐘，便行番停車場取車離開，跟著揸著架車在市內遊下車河，影下相。
係外面影島原城靚過係停車場度影，早知就唔入去停車場，可以慳番三百幾円呀～其實今次到島原市遊覽，出發前搵資料唔足夠之外，而且又因時間關係，好多地方都無行到，有點可惜，如下次再嚟的話，一定要參考多一些島原溫泉觀光協會網站上的資料才出發。雖然是不夠時間，怱怱而來，怱怱而去，不過總算叫做遊過島原市。
島原城
售票處．門前的幾位穿上傳統日本服飾的女士，好敬業，雖然天氣好凍，但佢哋一面唱歌跳舞，一面同到訪的遊人打招呼，一啲都無偷懶
紅色的女忍者，成日跳跳扎
有個梅園喎，行去睇下梅花
古野梅苑
園內的梅花有紅色，粉紅色和白花，好靚呀～
棵梅花樹形態好優美
白色梅花，好清純
粉紅重瓣，好嬌艷
園內的松倉重政公御祭祀の祠
旁邊還有一個好細神社，睇下連鳥居都有架
梅花道，呢條路可以行去下園的梅園和文化會館
離開島原城後揸車係附近行下，睇到ゆとろぎの湯指示牌，跟住指示行
行行下見到路邊兩旁有溫泉，於是係路邊停低架車行下影下相，原來呢個溫泉啲泉水係可以飲的，不過係好熱，而且仲有好大陣硫磺味，所以無飲
對面有另一個溫泉
しんわの泉，神話的泉
呢度有另一個飲用溫泉
時間差不多了，臨走時影下島原城全景才離開
12:00離開島原市出發到雲仙地獄（Mapcode：173 556 440），由於上山路段比較斜又多彎，比預計時間用多了十多分鐘，12:45才到雲仙地獄，在有料停車場泊好車後就遊下地獄。
雲仙地獄在1990 至 1995 年期間一直噴火，直至現在已停止，但仍有部分警戒區域。地獄之名的起源，其實不過是因為日本人喜歡稱地上冒出滾燙蒸氣及溫泉的地方為地獄，然而，雲仙地獄，也真如其名，曾是著名天主教傳教士集體殉道的地方。古時，因豐臣秀吉要斷絕天主教的傳播，在雲仙的這個人間地獄，處刑示眾。
雲仙地獄入口的停車場
泊好車後就到料金所俾錢，收費每次 410円，職員仲比咗張遊覽地圖我
停車場旁就係雲仙地獄，睇下幾大煙
開始出發，啲煙有好大陣硫磺味，非常難聞，如果咁啱啲煙吹埋嚟的話都幾難頂
清七地獄
呢度係入口，兩旁都不斷咁冒煙，行完呢段十幾米的路已經係咁咳，好辛苦呀，不愧係地獄，真係有死過番生的感覺
呢度仲大煙，好彩啲風唔係吹向我哋，唔係又要死多次
沿路有好多呢啲壼口，唔係用嚟做乜呢？煮溫泉蛋乎？？？
過咗最大煙的地方，可以安心慢慢行
雀地獄
お糸地獄
白濛濛，四圍都好大煙
真知子岩
有好多水管，下面的溫泉旅館係山上引啲溫泉水落去旅館度
下面係九州ホテル，間酒店好靚
大叫喚地獄
邪見地獄
浄玻璃の鏡石
葬頭川の婆石
泥火山
雲仙地獄另一個入口
旁邊都有停車場
足湯溫泉
不過係無水的，話由於溫泉水水量不足，所以個足湯暫停
雲仙国立公園
馬路邊有好多條呢啲圓柱，佢仲不停咁噴煙，似唔似以前的蒸汽火車頭個煙囪
本來諗住係雲仙地獄食午餐的，但係沿途都見唔到有食店，今日又無午餐食，真係失敗
，只好又要係便利店買野食頂下肚喇，呢啲就係我哋的午餐，中華包和納豆壽司，一共 398円
遊完雲仙地獄， 13:25出發到長崎グラバー園(Glover Garden)（Mapcode：443 824 858），車程約個半鐘，今次都係行國道，15:15到グラバー園，由於グラバー園沒有停車場，所以我哋就泊係舊匯豐銀行長崎分行旁邊的長崎市営松が枝町駐車場，首個小時 290円，之後每30分鐘 140円，不過原來個入口係在橫街，而且個停車係係地庫，我啲兜咗個圈先搵到個入口，泊好車後先同舊匯豐銀行長崎分行影完相，然後沿斜路行上去グラバー園。
グラバー園其實係以前幕府時代，日本對外通商時，在長崎的外國人居住的居留地，在 1899年日本政府廢除了居留地後留下的西式建築群，1970年隨著市内西式建築的减少，為了實施保護西式建築，開始平整グラバー（Thomas Blake Glover）故居所在地南山手的山崗，並將市内的西式建筑物移築在一起，由此誕生了グラバー園。
Thomas Blake Glover的私邸，是日本最早的木造西式建築。他不單單是來日本賺錢，他對日本的維新事業也有很大的貢獻，他也非常融入日本的生活。昭和十四年（1939）六月起，私邸歸三菱重工長崎造船廠所有。昭和三十二年（1957）十月，該社為紀念創業一百年，而將私邸捐給長崎市，現在成為重要文化財。
前匯豐銀行長崎分行
前匯豐銀行長崎分行的地面也有停車場，不過是供旅遊巴停泊
沿呢條斜路行上去，兩旁有好多間手信店
有蒸包食喎，但係個樣幾特別既
原來叫角煮まんじゅう 300円，成個下午只係食得一個蒸包，依家好肚餓，買個嚟食先
買咗喇，原來係將個饅頭（まんじゅう）開邊，中間夾件東坡肉，熱辣辣，中間的饀味道好濃．外面的就鬆軟好食，好好味呀，不過中間的肉都幾肥，都係食一件好了
途中經過祈りの丘絵本美術館
咦！有間教堂啵
行埋啲睇下，原來裡面係力ステラ神社
大浦天主堂是日本最古老的哥德式建築物，建成於1864年
入場費每位 300円，我哋無入去，只係係外面影下相就算
大浦天主堂隔離就係グラバー園入口
上完十幾級樓梯後就見到有條電動扶手電梯，唔洗行樓梯，好野
上到去就係售票處
門券，每位 600円
買完門券後就睇下風景先，風景好靚呀
入場後有兩條扶手電梯直到山頂，然後由山頂開始遊覽
上完一條電梯後，忍不住影多幾張相
三菱第二船塢宿舍舊址．建於1896年，是典型的西洋式建築，上下的陽台靠8根柱子支撐，舊址內裡展示了一些造船史及模型
高島流和砲，由鍛造鐵砲的野川清造經長崎製砲專家高島秋帆指導下製成的日式大砲
係山頂可以睇晒成個長崎市，對面係稲佐山，今晚就會上山頂睇夜景
長崎市
長崎港
舊長崎高商前門守衛室．是長崎高等商業學校創立時建造的門守衛室移築至此，西式的建築中雜著和式的紙拉門
長崎地方法院長官宿合舊址，建於1883年，外面是西洋式建築，內部由日本人設計，既有舖木板的西洋式房間，也有舖榻榻米的起居間
英國商人華克故居(Former Walker House)，推測是明治後期建築
祈禱之泉
英國商人林格的故居(Former Ringer House)，建於明治初期，是一座三面有走廊的木造宅邸，走廊的地面用黑花崗岩鋪成，支撐走廊頂棚的方柱用的是天草石料，是木石合璧的罕見木架石造建築，被評為國家級重要文化遺產
裡面有喜波貞子展
當年飾演蝴蝶夫人時所穿的和服
奧爾特故居(Former Alt House)是長崎現存的石造西式建築中最大的，被評為國家級重要文化遺產
屋後的廚房
爐灶
在奧爾特故居的後面有一個鑿穿天然崖壁建成的貯藏庫，貯藏庫寛3米、深9米，溫度能一直保持在20度左右，唔知當時係咪用嚟貯藏葡萄酒呢
舊斯蒂爾紀念學校，建於1887年的教會學校，內裏展示Glover家族的照片
「三浦環の像」，歌劇《蝴蝶夫人》中扮演主人蝴蝶夫人的日本歌劇演員三浦環的紀念像
有個水池喎，休息下先
池中的烏龜儍下儍下咁，好可愛呀～
西洋料理發祥之碑
舊自由亭，在江戶時代末期開業，是日本第一家西餐廳，現在二樓是咖啡廳
地下有兩個星形圖案的鐵蓋
哥拉巴故居，建於1863年，是日本最古老的木造西洋建築，目前宅內展示哥拉巴和妻子慈露的照片，及其愛用的狗雕手杖等，被評為國家級重要文化遺產
庭園的大蘇鐵樹。這是在終結時薩摩藩主感謝哥拉巴為結束薩英戰爭進行斡旋及積極協助建造軍艇而贈送的。樹齡300年，國內最大級的蘇鐵
哥拉巴故居庭院內有兩塊心形石，一塊係方位盤附近地下
指示長崎市各景地的方向
心型石～關於心型石的說法，如摸一下就會戀愛成功，找到兩塊就會有好運
呢個心係白熊搵到架，仲引到好多遊人走埋嚟影相，啡白熊當然一定要同個心心影番張相
Thomas Blake Glover的雕像
日式庭園
另一個心在出口休息處旁邊，係有對情侶搵到架，其實兩塊心型石位置在漫步地圖上都有寫，不過當時睇唔到，但其實搵下都好有樂趣
呢個心好大個呀！
長崎傳統藝能館，裡面展出諏訪神社的秋大祭時所用的踊龍、龍船、唐人船、傘鉾
龍船
傘鉾
踊龍，同中國的舞龍差唔到
離開グラバー園後行去番停車場時，路邊有位婆婆賣長崎名物，究竟係乜野嚟呢？
原來係チリンチリンアイス，即係雪榚玫瑰花
好靚呀，真係有啲唔捨得食
在Glover Garden逛到差不多五點才離開，見仲有時間，於是就去埋眼鏡橋（Mapcode：44 270 236）才返酒店。返到停車場取車，比埋停車場費570円就出發，十幾分鐘車程就到眼鏡橋，係附近搵到個路邊收費車位，每30分鐘 100円，我哋係第一次泊路邊的車位，泊好車後行去收費機度諗住攞番張泊車咭喇～點知等咗一陣都唔見有野出，好彩無耐又有人泊車，睇下佢點做先，個司機祇係泊好架車就離開，乜都無做，咁我哋咪跟住離開，行去眼鏡橋影下相，諗住祇係泊半個鐘，所以拿拿淋在眼鏡橋上同下行個圈影下相，真係「上同下」，因為係可以行落河堤下面架。行去眼鏡橋途中見到幾架之前婆婆賣的雪榚玫瑰花的車仔，原來唔係只有一檔。長崎市正月初一至十五舉行「長崎燈會」，眼鏡橋上下都佈置了好多花燈，這時正是下班時候，橋的四圍都有很多遊人．我們怱怱地影了些照片，便返去攞車。返到停車位的收費機，經過細心研究，我哋先在右上邊按車位號碼（如果按錯車位號碼，按紅色制「とりけし」，然後再按過），跟著會顯示費用，然後入錢，咁就完成手續，如果想要收條，就按綠色制「領取証」，原來就係咁簡單。
已經五點半，係時候返酒店，今晚入住ホテルウィング・ポート長崎（Tel：095-833-2800），係長崎市揸車真係唔係好慣，除了多車之外，又有好多電單車係中間穿插，還有路面上的電車，真係要一眼關七，唔敢大意，好彩眼鏡橋離酒店唔係太遠，只係十幾分鐘車程，好快就到，咁都無咁驚。酒店停車場入口係大廈的右邊，但係去到酒店時俾架貨車遮住睇唔到，係門口停低架車諗住落車搵下，不過落咗車行過咗架貨車就見到，立即上番車揸入去，因為唔知停車場有幾遠，所以先係大堂入口放低行李，然後才駛入停車場，泊好架車後才和白熊一齊入大堂辦 Checkin手續。我哋告知職員架車泊咗係停車場，佢就叫我哋留低車匙在接待處，需要揸車出去才取回，交了房租 7,000円和停車場費 1,000円後，攞埋房匙上房休息一陣。
酒店網頁話停車場係可以 24小時出入，不過我揸車入停車場時並沒有職員檢查和安排車位，我係見到有空位就泊，不過如果晚上揸咗架車出去，而當晚車位又好滿的話，會唔會番嚟會無位泊呢？
路邊車位的自助收費機
眼鏡橋，現在剛好舉行長崎燈會，每年正月初一至十五
河的兩邊掛滿了黃色燈籠
又幾似眼鏡喎
近鏡，側邊就唔似
我哋沿樓梯行落去係河堤度搵個心形石，見到對面有幾個日本女仔又係度搵緊，我哋咪跟住佢哋行，佢地好快就搵到，好嘢，可以慳番好多時間
兩旁放了好多燈籠，呢個係蛇燈龍
雞燈籠
初初仲以係只有十二生肖燈籠，點知行行下見到金魚燈籠，原來仲有其他的燈籠
小孩與金魚燈籠
有好多人係度圍住睇野，原來係兩個人像，一位是孫中山(右)，一位是梅屋莊吉(左)，梅屋莊吉是孫中山的日本朋友，對孫中山的革命事業起了很大的幫助
酒店房間，間房同張床都比較細，不過唔緊要，只係住一晚
另一邊，係張枱上搵唔到條 Cable線，睇完夜景返酒店時問了職員，原來條Cable線係張床旁邊，好唔方便啫
條 Cable線就係床頭邊，好彩好鬼長，可以拉到書枱上，不過出入就要小心啲
洗手間，有齊沖涼液和洗頭水護髮素，全部都係ShiSeiDo嚟架
雪櫃內有兩枝免費水，又可以慳番的錢
好特別的兩件裝的浴衣，穿著嚟訓都幾舒服
18:15出發食晚餐和去稲咗山睇夜景，離開酒店後就在路口的吉野家食晚餐，食飽後行行人天橋到長崎駅內的觀光案內所買稲佐山纜車票，纜車票祇需 960円，比原價平咗 240円，買完票後問職員點去纜車站，佢只係叫我哋乘 3番或4番巴士去，沒有提及免費巴士接送，由於出發前並沒有詳細研究有關免費巴士的資料 ，既然職員沒有提及，我哋唯有相信她到長崎駅站前面乘巴士到纜車站。
我哋在長崎駅前的巴士站乘3番巴士，約7分鐘車程，車費150円，在「ロープウェイ前」站落車，向前行一陣後在路口轉左上山就到淵神社，纜車站就係神社裡面，神社旁有免費停車場，揸車嚟就方便好多；入到纜車站時只係 18:22，站內一個人都無，見到櫃位顯示下一班纜車18:30才開，等一陣就可以入去上纜車，不過臨夠鐘開車時竟然有一群遊客嚟到，佢哋應該係乘免費巴士嚟，本來成架纜車連埋我哋都只有四個人，現在就滿晒，好彩我哋有位坐（成架車祇有四個座位），夠鐘出發喇，全程只係幾分鐘，好快就到山頂，離開纜車站後轉左直行就到展望台，不過行到時見到前面的人並沒有入去，點解呢？原來展望台維修暫停開放，無得上展望台，唯有在前面的路旁影相，雖然個夜景都好靚，但在展望台影效果會靚好多。
稻佐山上雖然都有7度，但好大風，影了一陣相就離開，乘纜車落山時聽到日文廣播，雖然唔係完全明白講乜，但知道同免費巴士有關，落了纜車後見大部份遊客都留係車站內並沒有離開，應該係等免費巴士，所以我哋跟大隊留低等乘免費巴士喇。差不八點半時見啲人起身離開，我哋就跟埋去，行番去出面排隊等上巴士，在等巴士時有位職員大聲提醒要準備啲唔知係野票，初初以為有纜車票就可以乘免費巴士，點知呢個大鄉里又搞出笑話，上巴士時遞了張纜車票比司機，但佢話要有乘車券才可以乘搭，唉！去邊度搵張乘車券比佢，於是唯有企埋一邊等其他人上晒車先算，好彩有位男職員出現打救我哋，問咗我哋點樣嚟，就幫我哋俾乘車券司機，真係出路遇貴人，唔該晒！在ホテル二ュー長崎落車，行幾分鐘就返到酒店，食埋個甜品，已經差不多十點半，要快快梳洗上床休息。
返港後睇番有關免費巴士資料，原來乘車券可以在長崎市內幾間酒店大堂的服務台和總合觀光案內所攞，但係觀光案內所的職員祇係叫我哋自己乘巴士去纜車站，完全沒有提免費巴士，真可惡！！由於出發前曾經想過揸車到纜車站，所以沒有搵齊資料，都係怪自己唔醒目，下次出發前一定一定要搵齊資料。
今晚的晚餐～吉野家牛丼加沙律和生玉子 500円
白熊的豚丼 330円，兩碗飯味道都唔錯．好食過香港的好多
長崎駅都有巨大的花燈
長崎駅內的總合觀光案內所
在觀光案內所買的車票和職員比的單張，但係單張內係沒免費巴士的資料，原來連日文版一樣都係沒有的，只有纜車站的日文版的網頁才提到有免費巴士資料
我哋就係係長崎駅前的巴士站乘3番號巴士到纜車站，車費每人150円
上車要攞整理券，呢款整埋券好新款，有埋barcode添
落咗車向前行一陣，就見到呢個路口，跟住轉左上斜路
見到淵神社的鳥居
入到神社就見到「長崎ロープウェイ」，即係長崎纜車站
售票處，係呢度買票每人要1,200円，如果有網上割引券就祇需 1,080円，不過都唔夠係觀光案內所買平
今晚坐的纜車
今日天氣好好
無無聊聊等夠鐘，等我哋影下相先
長崎稻佐山的夜景，與函館夜景和神戶摩耶山夜景，並稱為日本三大夜景
實景真係好鬼靚，如果可以上展望台影相我諗仲會景得靚啲
ホテル二ュー長崎的免費巴士站，上面有埋班次資料
今晚的宵夜～士多啤梨雪榚，好味道
沒有留言:
張貼留言