chris 的小小世界: 07年新年大阪五天自由遊 Day 2

第二天

日期：2007 年 2 月 18 日（星期日、大年初一、陰天）
行程：酒店 → 黑門市場 → 高達館 → 千日前商店行
　　　→ 道具街 → 美國村 → 酒店
住宿：Comfort Hotel

　　今朝七點就起床，梳洗後就到酒店食堂食套票包的早餐，這裡供應的主要是飯團及麵包，除了咖啡橙汁任飲之外，乳酪都可以任食就最正！日本的牛奶出名濃同滑，乳酪當然是更加好味喇，食完早餐後，食番兩三杯先走。

　　食完早餐後返房攞行裝就出發，第一站是去大阪出名的黑門市場，出了酒店後就轉左，行在界筋後轉右直行約五分鐘就到，在界筋的路口發現了一間24時的超市 グルメシティ，裡面有好多日本食物及生果出售，因為剛剛才開始行程，所以晚上返酒店前再嚟呢度 Shopping。

　　行到黑門市場時發現只有好少店舖有開門營業，原來這裡的店鋪大部份是星期六、日休息。因仍有些飽意，只買了炸鰻魚食，便出發到隔離街的高達館，外牆畫了一個好大高達畫像，遠遠就見到，十分易認。高達館除了有高達模型外，還有好多現時日本流行的模型賣，行了成個鐘，買了幾盒舊版新出的高達同 Zaku (渣古)後才捨得走。

今天的早餐，酒店套票包埋

酒店的洗衣機

路上的 100円飲品自動售買機

酒店前面街道上的星座圖案，這個是雙子星座

這間就係グルメシティ，24 小時營業，真係 Shopping 的好地方

黑門市場

哇～有好多士多啤利呀，只係四五百円，好平呀！

這間賣炸物的都好出名

買咗炸鰻魚食，雖然係凍咗，但係仍然好好味

高達館，係黑門市場望過去只係見到 Zaku

高達館正門

館內的大門放置了好大個的高達模型

除了高達外，仲有而家好 Hit 的 Keroro

高達模型做緊特價 2 割引，即係八折，買了幾盒返香港慢慢玩

原來要係對面先睇到高達

ヒーロー玩具研究所，門口放咗 d 衫賣

但係另一邊窗卻放置了矇面超人，咁唔知賣玩具定係賣衫

　　跟住去千日前筋商店街，千日前筋商店街在黑門市場對面，所以再次經過黑門市場。再回到市場，已經有些少餓，行行見到有間賣河豚刺身的店舖，一場嚟到，唔試下對唔住自己，於是買了一盒刺身 1360円，企係舖頭後面即刻打開嚟食，食落覺得好彈牙之外，味道卻是淡淡的，但係在碟中間有兩舊細細舊的十分鮮甜（後來同朋友講開，原來食河豚刺身是要配特別的醬汁才會食到河豚的甜味）。

　　跟住到了一間有些像超市一般的店鋪，於是入去睇下，原來這裡是賣食物的，見到好多很好味的魚生刺身十分平宜，在這裡買了盒北海道帶子 680円，有四隻的帶子。買了急不及待的在店舖隔離就咁企係度食，這些帶子十分甜味，而且還有淡淡的海水味，從沒有食過咁好食的帶子，黑門市場真是到大阪旅遊必到的好地方。

　　食完美味的帶子後，就到對面馬路的千日前筋商店街，到這裡是食午餐，今次是食章魚燒（たこ焼），原來大阪的章魚燒才是正宗，後來才傳到東京及日本其他地方。在千日前筋有幾檔的賣章魚燒的，但係奇怪的是只有一檔排長龍，經驗話我知排長龍的一定係好野，所以我當然不會錯過，排了一陣就到我，因不是太肚餓，只買了細盒 8隻 350円，原來同東京的是不同，外皮是一樣之外，裡面是軟軟的，十分美味。

1360円的河豚刺身

北海道帶子 680円一盒

哇～好大隻呀！

排長龍的章魚燒店

買咗喇～

熱辣辣的章魚燒，好好味架

　　跟住就到街尾的道具屋筋商店街行下，這裡是賣廚房用具及食材的，很多東西都從沒見過，行完已經十分累，要搵個地方坐下休息一下。於是到吉本会館地下的餐廳食個 High Tea，真係好 High 架，兩杯野加份三治就要 2060円。

　　休息完後就去美國村，我們先行去高島屋百貨公司，然後經心齋橋筋到美國村，美國村聽個名就知是賣美國的服飾，日本年青人比較純洋，喜歡穿著美國牌子的衣服，但對我這個香港人來說就沒有多太吸引，行了陣返道頓道堀筋食晚餐，今餐是到元祿寿司食，寿司全部 130円一碟，不用 HK$10.00，十分抵食，食到飽飽都只係二千幾円，比香港的除了平一半以上之外，還十分鮮味，到日本旅行一定唔可以錯過。

　　跟住就行去グルメシティ Shopping，買了士多啤利及一些小食後就返酒店，休息一陣就食士多啤利做宵夜，這些士多啤利十分甜，比昨天在大丸買的好食好多，今日真的行了好多路，明天還要早起，所以梳洗後就上床休息。

道具屋筋的入口有個好大的『道』