行程 : 酒店 → 呼子朝市 → 甘夏かあちゃん → 風の見える丘公園 → Jumble Store古着店 → 酒店 →博多還車
住宿：東橫inn博多口駅前 5,236円 (原價7,480円，會員七折)
今早六點多起床，七時多到地下大堂食免費早餐，食飽後返上房執好行李到大堂 Checkout，尋晚返咗酒店後個天開始落雨，仲落到今朝都無停過，我先到停車場取車，然後揸到去大堂門口接埋白熊同啲行李後，然後出發到呼子朝市（Mapcode：182 722 261），車程約1小時20分鐘，由於天雨路滑，所以揸得比較慢，好彩行了一半路程時個天無再落雨，真係天公做美，可以唔洗擔遮行朝市。
09:55到達朝市，去到街尾的免費停車場泊好車後，就去行呼子朝市。這個朝市只係在橫街內，兩旁有好多店鋪小販，嚟依度當然係要試下即開即食的海膽，初初以為只有海膽婆婆一檔，點知原來有成五六檔咁多，真係唔知係邊檔食，於是就係揀咗兩檔嚟食下，啲海膽都係好鮮甜呀，食完後就繼續行朝市，不過條街不是很長，很快就行完，跟住係海邊附近行下，但係今朝實在太大風了，吹到個人好凍，都係早啲去いか本家食午餐。
今日好豐富的早餐，味道都唔錯
行程路線圖，今日係最後一日揸車，要返博多還車
呼子朝市入口，旁邊有無料停車場指示牌
一轉入嚟就見到個停車場
遊客要泊係二樓，轉左後就見到個入口
二樓停車場，呢度有十幾個停車位，今日係平日都泊咗一半，如果係假日的話真係會無位泊車
泊好車就出發行朝市，其實一離開停車場就係朝市入口，好方便，停車場掛住好多魷魚燈籠，個個都畫咗好愛的圖案
睇完啲紙魷魚燈籠，跟住出場係章魚先生，睇下隻隻都好生猛架
有燒蠔食喎
不過無標價，啲蠔唔知幾多錢呢？
剛好有班人係度燒緊蠔食，好似好好味喎
行咗一個圈後，最後就係呢檔食海膽
全部都係 200円
即開即食，好新鮮呀，白熊係幾日前預先留定個膠杯嚟裝海膽，唔洗用手食
啲顏色好靚呀，好美味呀！
呢個係第二檔的海膽，顏色除了差好遠之外，份量都少啲，味道無第一檔咁鮮甜
好多魷魚乾，本來諗住買番啲，不過原來啲魷魚係一日乾，唔係好夠乾，驚返到香港會變壞
依度掛咗好多魷魚燈籠呀
呼子漁港，本來想附近行下，不過又大風又凍，只係行咗一陣就算
捉魷魚的漁船，睇下掛咗好多盞大燈
有呼子名物～魷魚燒賣，每隻 100円
熱辣辣，好好味咁喎
我哋買咗兩隻嚟食，不過味道麻麻，只係一般
係橫街見到檔賣即燒獅子狗卷，好似好正咁喎
另一邊有燒蠔賣，只係 500円一兜，都幾平，於是就買了一兜嚟食
買完坐低就等老闆透火
開始燒喇～不過係度燒既方法同之前係魚市魚座唔同，燒到個殼自動打開少少就食得
食得喇，用刀仔小心打開個蠔殼
好肥美呀，無添加任何調味，原汁原味，不過有兩三隻唔係幾新鮮，燒到乾晒都唔打開個殼，於是打開嚟睇下，裡面啲肉燒到乾晒，仲有啲燶燶地添
いか本家十分近朝市，不用一分鐘就到，由於時間尚早，餐廳內不是有很多人，上到二樓揀了個窗口位坐後就點野食，呢個餐廳出名食魷魚活刺身，當然唔可以錯過喇，點了野食後等一陣就有得食，女店員攞咗啲食物上枱後就好詳細咁介紹，不過我當然聽唔明佢講乜野，只係掛住係咁影相無理佢，搞到個位女店員好無隱，真係唔好意思，到上第二份餐時，佢都估我哋唔知佢講乜，所以只係講幾句就離開。
呢間食店的價錢雖然係貴了少少，但係樣樣都非常美味，都係值得的，食飽後就出發到加部島的風の見える丘公園（Mapcode：182 750 479）。
いか本家，有專用停車場，可以揸架車嚟食飯
呢度二樓是日本電影「悪人」的拍攝場地
一入去見到好幾個大魚缸，裡面有好多魷魚，隻隻都好生猛
呢度其中一條陣間會係我個肚裏面
點完野食後先嚟個餐前小食，係免費架，好味道
白熊點了いか活造り定食 2,625円，碟魷魚刺身上枱時唔記得即刻影相，好快就被店員用較剪剪咗兩隻腳先記得影相，睇下佢幾慘，被人剪到頭到爛晒，我哋淨係食咗個身，頭同啲腳店員會攞去廚房整天婦羅，一魷魚兩食
魷魚腳剪咗出咗架醬油就食得，不過都係留番啲腳嚟整天婦羅食好啲
個餐仲有其他，一共有八樣野食，哇～好多野食，樣樣都好好味，睇下個小蒸籠裡面的魷魚燒賣，好好味，好鮮甜呀，同之前係街邊買果兩隻真係無得比
我就點了エビフライ定食 2,100円，啲炸蝦好新鮮好有蝦味，好好味呀
魷魚頭同啲腳天婦羅，店員俾咗兩碗淺啡色液體我哋，係乜野嚟呢，初初以為係湯，當然係飲架喇，不過都係睇下其他人點做先算，等咗一陣見到隔離枱上呢碗野，原來果碗係天婦羅的醬汁，洗唔洗咁大碗呀，好彩無搞出笑啫，啲魷魚天婦羅好好味，我就鍾意食天婦多過食刺身
風の見える丘公園係觀看呼子大橋的好地方，車程只係約 15分鐘，12:35到公園，不過唔知係唔係眼大睇過龍，我同白熊都見唔到個停車場，諗住泊係對面線的路邊，咁不如去咗甘夏かあちゃん食甜品先。我哋繼續向前行，兩三分鐘後就到，入到去時店內一個人也沒有，見到枱上有個鐘，我就按下個鐘，無耐就有位姨姨出嚟，見到我哋後就入去攞咗啲呼子甘夏ゼリー和小食招呼我哋，原來係呢係試食嚟架，啲呼子甘夏ゼリー係用新鮮橙搾汁，加魚膠粉後放番入個橙皮度，好特別，味道就酸酸地，不過又幾好食喎，於是就買了兩杯2L Size嚟食，食食下見到有位日本男士入嚟買咗十幾盒呼子甘夏ゼリー拎走做手信，原來呢間甘夏かあちゃん係咁出名。
食完啲橙啫喱後就揸車返去風の見える丘公園，泊緊車時白熊大叫，乜事呢！原來佢見到對面有個停車場，真係唔明點解之前會見唔到！！泊好車後就沿手信店旁的小路上山時，竟然又見到另一個停車場，原來有兩個咁大嘅無料停車場都睇唔到，返香港後真係搵番個眼科醫生驗下眼先得。在山頂公園可以觀看到呼子大橋和呼子朝市全景，真係睇風景好地方，影完相後 13:10出發到Jumble Store古着店小田部店（Tel：092-832-3201）shopping。
甘夏かあちゃん
甘夏ゼリ同啲不知小食，睇下試食都有咁多
甘夏ゼリ的價目表
M size同埋2L size 的樣辦
個M Size好似細咗啲，我哋就要咗兩個2L size ，按價目表應該要735円，不過比錢時老闆祇係收咗我哋730円，唔知係咪堂食平啲呢
風の見える丘公園對面的免費停車場
路邊的手信店
沿斜路行上山頂
係山頂有部風力發電機，好環保
呼子大橋，有啲似香港汀九橋的縮水版
條橋又幾靚喎
呼子朝市
見唔見到我哋之前食午餐的いか本家食，屋頂有白色牌就係
睇完風景後在停車場見到呢個牌，上面寫住水仙鄉散步道
原來係加部島種了好多水仙花，係停車場的山邊都種滿了好多水仙花，不過唔啱時候，得好少花開咗，真可惜
在呼子大橋旁有個觀景點，由停車場可以行到去呼子大橋中間的橋墩，近距離睇條大橋，離開加部島，停一停影番張相留念
原本行國道去Jumble Store古着店只係約兩個鐘，不過今日係日本三連休的第一日，沿途都有好多車，車速好慢，去到糸島市要龜速行駛，揸咗兩個鐘頭車，好攰同好「急」，行行下見到路邊有間大型超市，於是就駛入去停低，行下鬆下隻腳，順便去埋洗手間才離開。休息完繼續行程，離開糸島出現了小問題，見到條路前面有高速的指示牌，而 GPS又顯示高速公路，所以以為係行錯路，於是駛入橫街兜個圈，不過出番嚟 GPS又指示行番之前的路，無計喇，唯有見步行步，繼續向前行。行多十幾分鐘就見到 GPS指示目的地就係前面，原來我哋行緊條路係正條高速下面，地圖上係重疊咗，所以誤會以為行錯路。
由於今日係還車日，所以諗住返博多市中心前入一次油，不過沿途都唔係有好多油站，而且價錢都幾貴，到最後又係 ENEOS入油，一共入咗2,975円，21.1L @141円。16:00到了古著店，足足用多了五十分鐘，係店旁的無料停車場泊好車就入去 Shopping，買完野就出發到東横イン博多口駅前（Tel：092-451-1045）。
二十多分鐘後就到酒店，係酒店前泊低架車．攞埋行李到大堂 Checkin，辦好手續和付了租房 5,236円，將啲行李放入房後，就立刻出番酒店前攞番架車，跟住就去還車。租車公司規定要在車站附近指定的四間油站其中一間入滿油後才還車，我哋又揀咗 ENEOS油站入油，入到去將張入滿油證明書交給店員蓋印，今次只係入咗 300円，原來油價都係 141円，早知就留番係呢間先入喇！
17:30去到博多車站，個天已經開始黑，行屋台駐車場條迴轉斜路時都幾危險，條斜路又黑又窄，要開車頭燈揸車，好彩有驚無險，安全去到屋頂停車場，係閘口取過泊車咭後就揸到租車公司門前面，停低架車時，已有職員走出嚟，將車匙、入滿油證明書和泊車咭交給職員，職員簡單地檢査過架車無問題，就完成還車手續。其實部車車尾部份被個行李喼弄花咗少少，車門邊都有啲輕微花咗，不過職員驗車時主要係睇下部車有無撞過，佢祇係沿架車外圍行咗一圈，無驗屍咁驗，我諗少少花佢會接受的。
還了車後就去食晚餐，本來諗住去一蘭拉麵食，見有時間就係車站百貨公司博多Deitos B1/F的 あじわいすとりーと行下，落到去時見到有好多間食店，見到有間賣博多和牛的牛扒店 Angus アンガス デイトス店，價錢唔係好貴，於是今晚晚餐就食牛扒，入到去點菜時聽唔明店員問乜野，佢見我哋儍下儍下咁，佢又緊張我哋又緊張，於是搵了個在日留學的中國學生店員來招呼我哋，於是點菜就順利好多。白熊要了日本和牛牛扒，而我就要了平少少的美國牛扒，點完後等一陣就有得，估唔到係日本食西餐都唔錯，呢餐得好飽好滿足。埋單後就到車站附近的商店買下手信才返酒店。
返到房放低啲野後，第一件事就係到大堂上網列印明天的登機證，東橫Inn酒店除了免費提供電腦和打印機之外，連 A4白紙也有供應，真係服務一流，搞掂後就返上房，今晚係九州最後一晚，要執好行李梳洗洗後才上床休息。
GooDay，真係好大架，真係可以成家人行足一日
呢間古着店有幾間分店，雖然係二手貨，但處理和display都好乾淨企理，完全唔覺係二手貨，且價格真係幾平架
博多東横イン博多口駅前，呢間酒店無停車場，係正門口有啲上落客貨的空位，都幾方便
第一日取車時總合案內所職員比我哋的「錦囊」～四間指定的入油站，辦公時間、電話號碼和位置都有
左邊是由總合案內所去租車公司的指示，右邊是入滿油證明書
最後一次入油時比呢張紙職員，佢就會幫我哋蓋番個印，證明入滿咗油，還車時交給租車公司職員就ok
這個旅程行咗差不多千六公里，油費一共 13,628円，平均每公升油行 16.3公里
今晚食晚餐的餐廳Angus アンガス デイトス店
先嚟兩杯冰凍可樂，個餐包埋，唔洗另外俾錢
個餐有餐湯同埋沙律
餐包同埋白飯
白熊的和牛牛扒ロスステーキセットM(180g)，好好味，肉嫩多汁
不過我的美國牛扒おすすめステーキセットM(180g)，一樣咁美味，好正
一般東橫inn的雙人房格局，張床好寛敝
書枱、電視，水煲、雪櫃樣樣齊
唔錯的洗手間
今日的戰利品
沒有留言:
張貼留言