行程 : 酒店 → 青島神社 → 鬼の洗濯板 → 道の駅フェニックス物產館(午餐) → サンメッセ日南 → 鵜戶神宮 → 酒店
住宿：スーパーホテル 宮崎 6,980円
今天六時半就起床，梳洗後七時多到地下大堂食早餐， 傳聞Super Hotel的早餐都唔錯，落到去見到啲早餐除了有唔少選擇之外，仲好好味添，最開心係有幾款麵包選擇，又有牛油又有果沾，等我整番件油沾多先，呢餐食得好飽。
今晚都係住呢間酒店，所以唔洗執行李，吃完早餐後返房攞埋個背囊就可以出發。去到停車場見部車好污穢，鋪了一層厚灰，又要洗下塊車頭玻璃先可以出發。
09:00出發到第一站青島神社（Tel：0985-65-1262）和鬼の洗濯板，車程約 30分鐘，差不多到時，有個大叔攞住個「青島 P」字牌係我哋前面企係度兜生意，我哋無埋佢就繼續行，跟住見到附近有好多細既私人停車場，看來青島神社沒有無料停車場，我哋就掉頭去番個大叔度，佢話泊車每日 500円，仲問我地係邊度嚟，我地話由香港嚟，佢就講咗兩次Jacky Chan，只好對住佢～呵！呵！咁回應， 我地駛入條小橫巷，原來車位係間手信店後面，泊好車後我地由後門行入手信店，職員比咗張咭我，咭上有個編號同埋印咗在手信店買滿 3,000円就可以免費泊車，離開手信店前放低車匙，返嚟憑咭取回車匙和比錢。
離開手信店就向青島神社方向行，不用幾分鐘就到，青島神社建於連島沙洲上，中間有長長的沙堤連接，而島的四周海床就係出名的鬼の洗濯板，睇落真係好似洗衫板架，這裏的沉積岩層主要成分為砂岩及泥岩，約於800至1000萬年前形成，其後長期受到海浪衝擊及侵蝕，形成如樓梯狀的波浪紋岩岸，密密麻麻的幾乎將整個青島圍住，形成寬闊的「洗衫板」。岩層之間的裂隙有大有小，中間夾雜黑色碎石，仔細留意，可發覺螺、小蟹等潮間帶生物棲身於此，另石上也有小海蝕洞。
古時的當地人迷信，認為這怪異地形為魔鬼傑作，所以稱之為「鬼の洗濯板」，當地人更特地在島上建了青島神社以鎮壓魔鬼。由於這裏地形獨特，因此被日本列為「國家指定天然紀念物」。來到時剛好開始水退，露出一大遍洗濯板，就更加顯得鬼斧神工。到神社門時見到裡面剛好有對新人舉行神道教結婚儀式，我哋從來都沒看過，當然唔會錯過呢個機會喇，等到對新人入了大殿後才四圍行下影下相，買了些手信就回程。
行番去停車場時，在路邊見到有檔小食店有炭火燒雞 400円，宮崎除了宮崎牛出名之外，雞都好出名，咁當然要試下喇，俾咗錢等了一陣就有得食，熱辣辣，雖然燒到有些黑黝黝，但係啲雞肉又彈牙又好味，食完後到甜品時間，又走去買了杯黑芝麻雪榚，哇～真係好鬼黑呀，有好濃嘅芝麻味，好好味，好滿足呀！見到小食店前面有個青島亞熱帶植物園免費入場，所以就入去行下，公園種了好多好靚的花，本來想入去溫室行下，點知個溫室係要收費，最後當然無行入去喇。離開公園後就行返去手信店，在店內逛了一陣，但找不到心水手信，於是俾咗 500円泊車費攞番車匙後就出發到道の駅フェニックス物產館（Tel：0985-65-2773）食午餐。
今日的早餐，有唔少選擇
我最鍾意的麵包，有五款可以揀
呢部機早上7:00－9:00係免費任飲，有好多選擇架，部機超過一半都係咖啡，看來日本人真係好鍾意飲咖啡
我同白熊的早餐，好正呀！
今日的行程，主要係去日南海岸，因出發地點 A和終點 F都係酒店重叠咗，所以睇唔到個 A 點
青島神社沒有停車場，我哋就係泊咗係呢個大叔對住的手信店的停車場，500円一日
前面就係青島神社，個島係連島洲，有沙堤相連
啲水就未退晒，所以條沙堤被水浸住，要過條橋才可以到神社
原來呢度條叫「弥生橋」
鬼の洗濯板
似唔似洗衫板呀
一層層，波浪形狀
島的另邊都有
石燈
前面仲有一大遍添，好壯觀呀
青島神社鳥居
旁邊有紀念鬼の洗濯板和島上的熱帶植物群落的石碑
仲有個有關青島神話的告示牌
神社正門
剛剛有對新人舉行緊神道教婚禮，開始時大家排好隊
由大師帶領大家進入大殿
真係好整齊
對新人入咗去大殿後，其他人淨手後就跟住入去
龍頭水泉
睇完婚禮後就四圍行，咦～有紀念印喎，集齊八個印就可有機會得到一份豪華景品，不過我哋只係去到兩個，集唔齊
有得求籤喎，有了上次經驗，知道籤紙內仲有個神像，所以今次揀咗招財貓 200円
今次求的籤，其實係想要裡面的招財貓先真
絵馬，要600円一個
保平安的葫蘆仔，咁得意當然要買番個俾自己喇
本殿
元宮
隻瑞獸個樣同平時見既唔同，好似隻大貓
旁邊有棵夫婦木
呢度放了好多貝殼，原來係用來祈福的，將願望寫在貝殼上面後放在上面就可以
玉の井，旁邊兩個壼都係用來祈福的
在正門入口也有好多野賣
古札納所～將過去一年買的御守，在新的一年到神社參拜時心懷感激地將其投到古札納所，感謝神明過去一年的守護，然後再到授与所買新的御守咦～點解旁有個相機袋，應該係之前觀禮的人放在這裡，唔怕俾人偷咩！乜日本的治安真係咁好？
要離開青島神社了，影多張相留念下先，可惜今日天氣灰濛濛的，啲相唔係好靚
回程見到有間小食店
宮崎肉卷，出發前睇電視見過，係用豚肉包住啲飯，係宮崎最近的出名食物，有無留意，下面果位人兄係邊個呢？下回分解
炭火燒とり 400円，即係燒雞，係呢間小食店的出名小食，當然要試下喇
雖然燒到有些黑黝黝，但雞肉同雞皮都好美味
哇黑芝麻雪糕呀！多謝300円
青島亞熱帶植物園
入園無料，既然免費，我哋就入去行下
好多鬱金香
好紅好靚呀
跟旁還有好多靚花
圓形花圃
溫室，好大個呀
乜個溫室係入場費架，都係唔入去囉，時間差不多，係時間返停車場
又見在呢位兄台，原來佢係東国原英夫，前宮崎県知事，藝人出身，知名度好高，在宮崎県內好多地方都會見到佢個樣
連 T恤都有佢個樣，問你服未
宮崎特產「日向夏果」，黃色的橙，味道酸酸地，好特別
11:20到了道の駅フェニックス，本來無咁早食午餐的，但係要安排「順路」行程，所以要係呢度食埋午餐才繼續行程，道の駅フェニックス係睇「鬼の洗濯板」的最佳地方，有大型無料停車場，泊好車後，就到二樓的餐廳食午餐，呢度的食物選擇唔多，不過食物都唔錯，食飽後到地下的物產館和附近行下，臨走時買了包蜜柑上車食，點知包蜜柑又乾又老，一啲都唔好食，估唔日本的蜜柑會咁難食。十二點多就出發到サンメッセ日南（Mapcode：274 595 558）睇日版復活島石像。
道の駅フェニックス物產館
旁邊有個大型停車場
呢度都有印仔喎，等我印番個先
上到二樓餐廳搵位坐好後，睇完餐牌就到收錢櫃台買食券，跟住返埋位等食
白熊的咖哩飯連沙律 800円，啲咖哩有少少甜，好味，對於唔食得辣的啡白熊就啱晒
我的炸豚扒 800円和白飯 150円，啲豚扒好嫩好多汁，真係好好食，啲豚扒汁酸酸地好醒胃，不過落得太多汁了，如果啲汁另外用碟仔上的話就最正
食飽後到附近行下，道の駅フェニックス對面係日南海岸国定公園，沿著條樓梯直落就到海邊
哇～條樓梯都幾長喎，係海邊行番上嚟都幾辛苦，都係唔落去好啲
附近的海床都係波浪形的鬼の洗濯板
又幾靚喎
由道の駅フェニックス到サンメッセ日南大約需時 26分鐘，サンメッセ日南建於山上，set GPS要用 Mapcode定位（Mapcode：274 595 558），之前見其他自駕遊網友用電話號碼定位，結果過咗龍去唔到 サンメッセ日南，要兜番轉頭。サンメッセ日南個入口係係條小路轉上去，小路旁有一個小型停車場，位置比較隱閉。今次個GPS好掂好準，12:40到咗目地，在收費亭俾錢買入場券，出示預先在網上印的割引券，原價 700円，優惠價 500円，平咗 200円。園內有個好大的無料停車場，任泊唔嬲。
園內有カート（高爾夫球車）租用，首半小時 900円，之後每半小時 300円，由於園內大部份景點都在山上，要上山落山，所以就打算租部車嚟代步，點知去到租車的櫃台查詢時，職員話要有日本駕駛執照才可以租車，國際牌都唔得，結果租唔到車，唯有靠自己對腳慢慢行。
サンメッセ日南（Sunmesse Nichinan）1996年開設，原身為一個牧場，現在變身成為了一個觀光牧場。園內的復活島石像群，原來以前日本曾協助復活島修建神像，那裏的長老為了表示謝意，便答允日本在宮崎興建復刻版的「莫埃像」( Moai )，但不可以和復活島的一模一樣，所以呢度的Moai要背向海。這些神像高5.5公尺，重18噸，是全園的焦點所在。
由小路轉上嚟，就係サンメッセ日南入口
入場券和園內介紹地圖
有好多カート（高爾夫球車），等我哋租番架嚟揸下先
但係話要有日本車牌先可以租，好失望
園內好多這些古怪的莫埃像木雕
小型莫埃像，點解東国原知事變咗復活島莫埃像嘅，佢真係無處不在
直行約一分鐘就到復活島石像群，每個石像都可以祈求不同的願望
哇～哇～好大個莫埃石像呀，有得祈福喎，當然個個都要摸下喇
山下就係莫埃岬牧場，養咗有幾隻牛，我哋同個牧場相距好遠，但係都聞到陣陣臭味
睇完莫埃像後向山上的景點出發，租唔到車，唯有靠對腳喇，在停車場旁的樓梯直上
在上山的路邊有好多其他造型的莫埃像
到太陽の丘喇，太陽の丘上的石係參照英國的Stone Circle做，中間的大石係用來計時的
......後面仲有條長樓梯要行，白熊，加油
終於上完條長樓梯，望番轉頭，係呢度望太陽の丘靚好多，真係成個鐘咁樣
園內到處都鋪滿了厚厚的火山灰，睇下啲樹葉同欄柵上面的灰
呢度有個展望台～陽光露臺
係展望台可以好清楚睇到啲莫埃石像群
乜話，仲要行條咁長嘅樓梯，究竟仲要行幾多條呀，我無氣喇
兒童樂園
古怪的石頭，上面啲圖案係乜野意思呢？
行樓梯行到腳軟，都係改行車路上山舒服啲，馬路旁的古怪木公仔
前面係地球感謝の鐘同埋蝶の楽園
天空の塔（センタープラザ），海天一線，個景好靚
我企的位置原來 120M高，係呢度最佳的觀景點
路邊的石枱和石櫈係用前面海底的珊瑚石造
21世紀出発の灯，2001年正月採火來自太陽
地球感謝の鐘，呢度有好多火山灰，職員不停地清理
許願牆，可以在手信店買塊瓷磚 1,500円，在上面畫出願望，然後貼在牆上就得
蝶の楽園，不過無行入去
恋人たちの丘
情人鐘
有四種文字（中英日韓）～「我們祝願世界人類的和平」
希望願望成真！
睇完風景後就返停車場取車，出發到～鵜戸神宮（Tel：0987-29-1001），車程約 30分鐘，在途中我哋係過隧道前見到有個路牌指示轉左，但係部 GPS就話繼續直去行隧道，咁點好呢，今次我當然要信個路牌喇，於是轉左行，原來兩條路都可以到鵜戸神宮，GPS指示的路程較長，不過係大路，條路又直又闊，但係轉左果條路就剛剛相反，係小路，路程較短，但又窄又多彎，比較難行。
過了日南海岸ロードパーク的大鳥居後，條路就變得好難行，除了係雙程單線行車之外，路的兩旁有好多房屋，阻礙視線，睇唔到前面有無對頭車，所以要慢車小心啲才可以，13:30到鵜戸神宮。
神社內有大型無料停車場，可以任泊，泊好車後就向著御本殿方向行，御本殿建海邊的崖洞內，落到去四圍行下影相之後，用了 100円買了五粒「運玉」，投入神社前的霊石亀石祈福，我同白熊投石時原來擺了個烏龍，當我用右手投了第一粒石後，旁邊有位叔叔話俾我知要用左手，唔可以用右手，咁我就投埋第二粒石，不過最後兩粒都係唔中，輪到白熊投喇，佢咪用左手投囉，點知，果位叔叔又話唔啱，女性要用右手投，原來投石係要分男左女右架，最後白熊都係唔中，原來係好難先會投中個霊石亀石中間的石窿。祈完福後就行返停車場取車，出發返酒店～スーパーホテル宮崎（Tel：985-61-9000）
停車場旁的御祈禱所
鳥居，神社正門入口
神門，繼續向前直行就到御本殿
樓門
路旁的石燈
古神符納め所，即係古神符收集處
好多鳥居呀，條樓梯直上就到稲荷神社
千鳥橋
保健康的「福注連繩」100円
玉橋
神社就在下面
好多人係度投亀石
亀石
神社的淨手所
後面有好大粒的運玉
聽講日本人好鍾意見到可以放銀仔的窿窿罅罅，就會放啲銀仔嚟祈福的，原來係真架，睇下個運字上面放了幾多個銀仔
御本殿
好多祈福用品和平安符
お乳水
傳說後面的石頭會流出乳汁的，當年就係用呢啲石乳汁養大豊玉姫
幸の玉御守 300円，袋內有一粒收集自亀石石背上的運玉
我哋都買咗運玉祈福，5個100円
一格格，放低錢就可以自己攞
運玉其實係有個運字的陶石
要投中亀石背上面個窿先會願望成真，原來係好難中架
海邊有好多奇形怪石，係玉橋上睇風景就一流
三點多離開鵜戸神宮回程返酒店，泊低架車上房休息一陣．17:00就出去食晚飯，今晚諗住去尋晚去唔到既「禅」食，去到都只係 17:10，可能太早的關係，成間店只有我哋兩個人，點了個特選宮崎牛しゃぶしゃぶ鍋 4,000円和特選宮崎牛＆おいも豚しゃぶしゃぶ鍋 3,500円，另外要了兩碗白飯，啲牛肉好滑好嫩，不愧係特選宮崎和牛，非常美味，啲豚肉都好好味，不過同牛肉比較，牛肉就好味啲，食飽埋單，呢度係高級食店，唔洗出去俾錢，同待應講「お勘定(かんじょう)」 就可以，多謝 9,000円。
食飽後就係附近行下，白熊話東橫Inn附近應該有便利店或超市，所以順便行過去睇下，原來係真架，在東橫Inn附近的中央通有個好大間的超市，又到入貨嘅時間，買了野後就返酒店。今晚要洗衫，返到房攞埋啲衫到地下大堂，Super Hotel的洗衣機收費只係 100円，比東橫Inn平100円，洗完啲衫就晾係上格床，食埋宵夜梳洗後就上床休息。
禅
要上一條樓梯
食店裡面
點完野食後啡白熊就係度等食
首先嚟嘅係小鉢，即餐前小食，不過要收成 500円一份，好貴呀，我仲因為飽得滯無食到添
今餐係食火鍋，天氣凍凍地，正呀～
特選宮崎牛しゃぶしゃぶ鍋，睇下啲肉紋幾靚
特選宮崎牛＆おいも豚しゃぶしゃぶ鍋，啲牛肉肉紋一樣咁靚，啲豚肉就好嫩好滑，其實二樣都好好食，不過我都係鍾意食牛肉多啲
東橫Inn附近的超市
買咗飲品同宵夜
酒店的洗衣機和乾衣機
每次100円，每機都係洗38分鐘
沒有留言:
張貼留言