chris 的小小世界: 10年新春東京鬼怒川十天自由遊 Day 7

日期：2010年 2 月 17 日 (星期三、年初四、降雪)
行程：酒店 → 浅草 → 日光 → 輪王寺 → 東照宮 → 大猷院 → 鬼怒川 → 酒店
住宿：鬼怒川溫泉酒店

　　今天早上七時就起床，梳洗後食昨天在京王百貨買的寿司卷和蘋果汁做早餐，原來啲寿司卷都幾飽肚，祇係食咗盒太卷已經好飽，餘下的就留番在去日光的電車上再食。未夠八鐘就出發，在酒店大堂辦 Checkout 手續及寄存兩個行李喼後，就到ＪＲ新宿駅乘ＪＲ中央線快速東京行到神田駅 160円，然後轉乘東京メトロ銀座線淺草行到淺草駅 160円，車程約 26分鐘，轉車非常順利，約八時半就到東武淺草駅，早兩日已經買定了日光鬼怒世界遺產二日周遊券 3600円，已包埋來回去日光鬼怒川的電車，今天乘搭 09:10 的快速急行，車程約 131分鐘，祇比特急的慢二十多分鐘。在這裏順帶一提，套票不包特急，乘特急要另外買單程票1300円。

　　這班電車有六卡，在下今市駅時會一分為三，最後兩卡才是到東武日光的，為了想睇分卡時的情況，所以選了第五卡車坐。快速急行祇係會停幾個站，坐了半個鐘車後見有些肚餓，於是食埋今朝的寿司卷，真係飽晒，連今日午餐都唔使食。

　　差不多到下今市時，見兩旁的山頂鋪了些雪，十分靚，到了下今市駅時停咗好耐，工作人員忙碌地把第五卡的車廂變成車頭，車廂做好了「變身」後，就出發到東武日光駅，積雪越來越多，11:25到了東武日光駅，在車站前見到滿地積雪，真係好想去玩下雪。

今日好豐富的早餐，食到啡白熊飽晒

今朝得 2度，好凍呀！

東武淺草駅，乘扶手電梯上去月台

停在月台的特急列車，我地今日唔係搭呢架

特急列車那邊的月台有車站便當出售

我哋乘 09:10 的快速列車到東武日光

睇下我哋應該坐邊架車先

今日就係坐呢架電車到東武日光

車廂內的坐位，不過今日唔係好多人，我哋同啡白熊就坐晒四個位

難得架車無人，啡白熊話要影多幾張相喎

坐位中間張細枱仔，唔用時可以收埋，啡白熊話肚仔餓，要食寿司卷

遠處的山鋪滿了雪，很美啊！

到了下今市駅，等分卡後才可以再出發

原本係車廂，如今變了車頭，而且仲有駕駛室添

到了東武日光駅，連路軌上也積滿雪，變了車頭的列車，樣子有些怪

由這通道出閘，祇須出示周遊券就可以通過

東武日光駅

車站前的水池，如今鋪滿了雪

　　離開車站後就到 2C巴士站乘世界遺產めぐり巴士到日光輪王寺，這程巴士係周遊券包埋的，不用付錢，落車時祇須俾司機叔叔睇下張周遊券就可以，落巴士時開始下微雪，幸好沒有影響行程。我哋先到輪王寺的購票處用周遊券換二社一寺的參拜券，然後就開始參觀，第一站係輪王寺的三仏堂，裡面是展出多尊佛像和神器，不過不可以影相。

　　行完後出到外面時，看不到下一站的指示牌，又忘了參拜路線，祇好跟地圖行去日光東照宮，行上去東照宮的路是一條鋪滿了很厚雪的斜路，十分滑，見好多日本人都滑倒，我地就更加倍小心。我同白熊一步一步慢慢行上去，到了東照宮時俾金碧輝煌的建築物吸引，但是地面又濕又滑，行了一半時雪越下越大，全身都是雪，終於明白下雪時點解要担傘，雪仍然下過不停，所以決定不再前行，返轉頭行去日光二荒山神社和大猷院。

2C 巴士站，在這裡乘世界遺產めぐり巴士

整理券，我哋用周遊券，不用取整埋券，但係如果要付款的話，上車時就要取整埋券

車頭的顯示板係顯示車資，右邊熒幕顯示下一個車站名

我哋就係坐呢架巴士

日光輪王寺入口，亦是世界遺產めぐり參拜的第一站

入口的龍形水盆

參拜券售票處

遊二社一寺的參拜券原價係 1000円，我哋張周遊券都包埋，真係好抵

出示周遊券後，職員就給我哋兩張參拜券，入場時會在張參拜上蓋印

攞咗張參拜券後先影下相先，四周都堆了很多雪呀，忍唔住行去玩咗一陣雪先入去三仏堂

雪堆中的地蔵菩薩

逍遙園

旁邊係日光輪王寺寶物殿

影完相後就睇下參拜路線先，不過睇完都無用，因為我哋行行下唔記得咗點行

輪王寺三仏堂

入口，由這裡開始參觀

三仏堂裡面唔可以影相，行完就係出面影番夠本

相輪樓

護摩堂，這時已經忘了參拜路線，轉左行返出大路，寫遊記時睇返資料才知跟住應該參觀護摩堂

由這條路行去日光東照宮，但係路面十分滑，見到多人都滑倒，要好小心慢慢行

條斜路都幾長架，白熊がんばって

要上埋條樓梯才到東照宮，但係這條樓梯就最難行，我同白熊有幾次差點滑倒，好彩我哋互相扶持才無事

樓梯旁的東照宮石碑

東照宮正門的石鳥居，建於1618年，哇～差不多有成四百年歷史

五重塔，這個都有三百六十年歷史

表門，旁邊的樹棵棵都好高大，棵棵都有三百幾歲

三神庫

全部都係金碧輝煌

三厩舎廊牆上的三猿

仲有樓梯要上啊，啲雪越下越大，都係唔行上去囉，上面中間的是陽明門，左右兩邊的是鐘樓及鼓樓

鐘樓

御水舍

　　到了二荒山神社時見到要上一條長樓梯，祇好放棄入內參觀，在門口影下相就算。然後到大猷院，不過其實大猷院無乜特別的地方，所以好快就行晒，約下午一點就行去搵巴士站返東武日光駅。

　　睇地圖應該在東照宮的入口附近有個巴士站，但係搵了好耐都搵唔到，祇好沿斜路行落去到下一個巴士站，等了不久就有巴士，但嚟既巴士同之前的唔同，唔敢肯定啱唔啱，結果無上巴士。之後睇番時間表，下一班車要二十分鐘才到，結果就要等多二十多分鐘，今次醒目，見架巴士嚟到，拿定張周遊券比司機睇，見佢點頭，我哋就立即上車，唔好阻住其他人麻。

　　因為要趕乘東武日光駅 14:48 班車到下今市駅，再轉車到鬼怒川駅，本來打算唔去神橋的，不過見仲有些少時間，最後都去埋神橋影相。影完相後就立即行番去巴士站，好快就有巴士到，但架巴士沒有顯示是世界遺產めぐり巴士，覺得張周遊券應該唔包這架巴士的車費，但都姑且一試，拿出周遊券問司機「Is this ok?」，好彩司機點頭，當然澎澎聲上車。去到電車站時剛好夠鐘，但見月台架電車仲未開出，我哋即刻跑快兩步去月台，電車司機好好人，見到我哋兩個飛奔來，等埋我哋先開車，真係唔該晒，ありがとうございます。

離開東照宮後轉右行去二荒山神社及大猷院，行到二荒山神社時見到鳥居後面條樓梯鋪滿了雪就腳軟，都係唔行上去囉～

大猷院

參拜券受付所，要係度蓋印，因見唔到有人，白熊又唔記得要蓋印，拿著張參拜券，担住把傘澎澎聲沖過，結果被職員叫返轉頭

仁王門

仁王門內的金剛力士像

柱上的木雕

在仁王門上望返回頭，這個雪景都佷美

二天門

寺內工作人員不停咁鏟雪，我哋先行得咁舒服咋

鐘樓

夜叉門

唐門

睇完後就行落去搵巴士站，富士屋觀光中心

巴士站

架巴士係會經神橋的，最後我哋決定落巴士去埋神橋

遊神橋每位300円，我哋只係在外面影相無入去

個景好靚，我仲幫對遊客係度影咗兩張相添

神橋附近的天海大僧銅像

紀念品店，我哋就係對面巴士站等巴士返東武日光駅

好趕咁終於趕得切 14:48 去下今市的電車

去到下今市過對面月台轉乘去新藤原的電車到鬼怒川溫泉駅

　　約 15:45 到鬼怒川溫泉駅，出了閘後見到有觀光櫃台，本來想去問下去酒店的巴士站在那裡，順便攞啲旅遊資料，問下先知原來現正有旅遊推廣，有免費巴士來回酒店，可以慳番每人每程180円。職員問了我們住的酒店後，就給了我哋四張乘車券，跟住帶埋我哋行去 5號巴士站，謝過他後，我們一面等巴士一面影下相。這架巴士會經鬼怒川多間酒店的，等了一陣就有巴士，約五分鐘就到我哋今晚入住的鬼怒川溫泉酒店。

　　辦理 Checkin 手續時，才發覺酒店確認書漏了在行李喼，幸好櫃台職員很細心地幫我哋搵預約資料，搵到後影印埋護照就搞掂。Checkin時不用先付房租， Checkout 才付款，之後有一位穿著傳統和服的女士帶領我哋上房，入房後還介紹房內的設施，十分細心。

　　我哋訂了今晚和床10疊加自助晚餐及早餐，兩個人一共 26,200円，計落都唔係好貴。自助餐在下午六時開始，所以先去浸溫泉，換過酒店提供的浴衣，帶埋酒店的毛巾就落去浸溫泉，之後返房休息一陣，差不多夠鐘就到一樓的餐廳食自助晚餐。這裡的自助餐食物款式十分多，味道不錯，很好味，連我細食的也吃了很多，食飽後，周圍行了一陣才返房休息。

鬼怒川溫泉駅大堂的觀光服務中心櫃台