chris 的小小世界: 09年新春東京九天自由遊 Day 6

第六天

日期：2009年1月28日(星期三大年初三陰天間中有雨)
行程：酒店 → 津久井いちご園 → 三浦半島
　　　→ 新横浜ラーメン博物館 → 新宿住宿：新宿アーバンホテル

　　今天的行程主要是去『津久井いちご園』摘士多啤利食，而個果園是在『三浦半島』附近，所以安排今天一起去。去果園的車程差不多九十分鐘。由於要坐咁耐車的關係，所以今天七點就起床梳洗，在酒店食過杯麵後，約八時就出發。首先到新宿 JR 車站乘JR湘南新宿ライン到橫濱，在車站大堂看到顯示牌顯示有班車就到，於是加快腳步，上到月台時剛好有班車停係月台，但係架車寫的不是我要去的目的地，由於日本的電車不同班次會有不同的終點站，所以沒多想就上車，上了車後仍沒有開車，看到好多人上了車跟住又落返車，諗諗下唔多妥，於是落車睇清楚安全d。

　　真的幸好落車搞清楚，真係搭錯車，原來係電車誤點，我要搭的果班車要遲十多分鐘才到，但係做乜係大堂的顯示牌唔講清楚，搞到我差d搭錯車！在車站上短短的十多分鐘，第一次親身體驗了日本早上電車站繁忙情況，真的很多人。

　　JR湘南新宿ライン班車終於等到了，搭這班車去橫濱不用理是不是急行，因為去橫濱其實只是得幾個站，不是相差太大。由新宿去橫濱要車程約三十幾分鐘，落了車後轉乘京浜急行本線，再坐多四十多分鐘就到津久井浜駅。

今日早餐轉下口味，食第二隻杯麵

今朝暖番少少有 6 度

到咗橫浜駅，安全d睇清楚先上車，好好彩，剛剛有班特急列車去三崎口的電車，今日都係好 Lucky

坐了好耐車，終於到了津久井浜駅

車站的洗手間是在車站外的，坐咁耐車一定要幫親下喇～舒服晒

　　津久井いちご園在津久井浜駅行二十分鐘就到，但在1、2月期間有免費專車接送，就在車站出口上車，但是在網上只有電話號碼，並沒有班次時間表，不知是否到了要打電話給果園Call車呢？幸好一出車站在去洗手間期間，見到了果園的專車嚟到落客；我們上車後不久就開車，原來這部專車是不斷來回車站與果園接送客人的。

　　行了幾分鐘就到果園，付了 1500円入場費，然後就自己行去指定的溫室，交了入場券給工作人員後，她會給你一個兜及少少煉奶之後，就可以入去摘士多啤利喇。時間是30分鐘，但是並沒有人會同你計時，不過d人都好守規矩，夠鐘就會返出嚟。

　　入到溫室時見裡面已經有好多人，行了一陣發覺大粒的士多啤利得好少，而且大部份都係未熟，只好揀d中Sizes，摘了幾個後就知道，原來隻士多啤利顏色越紅就越甜，普通紅色的就只是一般甜，所以之後的目標是火紅色的。

　　三十分鐘後黑白豬已經食得好飽了，坐返專車返津久井浜駅，行一陣超市當散步後，就坐車去三浦半島了。

一出車站就見到好大個果園廣告牌，無去錯地方

架果園專車就係泊係廣告牌前面，不用買飛，直接上車坐低就可以

落車後買入場券先，每位 1500円

這個果園有好多個士多啤利溫室，今次係去 14號溫室

直行轉右之後就到指示牌，路牌再轉右行

真係好多間溫室呀

行到去見到有部車停係度

原來這部車係工作人員的，車上放晒d工具

新鮮的士多啤利果占

士多啤利園當然有士多啤利賣，不過都唔平

入園時間 30 分鐘，出咗嚟就唔可以再番入去

園內已經有好多人

好靚好紅的士多啤利呀

黑豬只係食得三十幾粒咋～

唔驚，白豬補番數，食到一兜都係，勁！！！

摘士多啤利要守規則呀～

這裡除了士多啤利之外，仲有番薯同蜜柑

等車返出車站時行下間商店先，好大碌羅白

車站旁有間超市，都幾得意，日本的超市主要是賣食物及同食物有關的物品，其他野就好少有得賣

　　約 12:20 到了三崎口駅，今次目的地是三浦半島的城ヶ島，在車站乘京急バス三9番號。出了車站後就看到三9番號巴士停在停車場，傻瓜一般走去以為係上車處，問了巴士司機後才知巴士站是在車站另一邊，而三9番號巴士在二番乘車處上車。

　　傻完就行去巴士站等巴士，等了幾分鐘就有車，日本的巴士是分段收費的，上車時要取飛（如果上車唔記得攞飛的話，就會當你係總站上車），落車時才付款，沒有散紙不用怕，有自動找換機，很方便。

　　巴士行了十多分鐘後到了三崎港，看到魚市場的路牌，於是決定在這裡下車，改去魚市場。這間好像街市一般的市場，裡面原來是專賣吞拿魚，行了一陣，擋不住店主友善的試食招待下買了少少作手信。

　　差不多一點半了，肚仔有些餓，原本打算是在附近的食店食魚生，但是看了門口的餐牌後才知這裡真的很貴，千多二千円才一碗魚生飯，定食更在二千幾円以上，所以決定行去其他地方食，但是這個漁港真的寧靜，可以說人影都唔多隻，很多店鋪都關門，沒有野食下只好坐返巴士返三崎口駅再打算。

　　返到車站諗住附近應該有多少少的店鋪，話晒三崎口駅是總站，人流應該比較多，但係行了一個圈後，只找到一間拉麵店，於是今餐就食拉麵。一入店鋪就有點焗的感覺，當然喇～開足暖氣再加上鑊氣，一定會有些焗架喇；點了野食在等候時，發現隔離的食客在食煙，日本明明在室內是禁煙的，點解可以食煙呢？唔通只係東京都禁煙，係呢度唔禁，但係上次係歌舞伎町食豬扒飯時隔離也有人食煙，真的不明白？？？？

　　今餐我點了味噌拉麵及餃子，味道不錯，不知是不是點菜時口多多說錯了日文，原本想點餃子（ギョーザ），但係口快加上忘記了餃子的日文，竟然叫了椰菜（キャベツ），白豬的味噌拉麵就變了椰菜味噌拉麵喇。

三崎口駅，好簡單好細的車站

見到三9番號巴士就傻傻地走去想上車

巴士站原來在車站左邊

巴士好多人呀好彩有位坐

這裡有很多運海鮮的貨車

途經一間好大間的鞋專門店

架巴士到了三崎港，有好多人落車

在車上就是看到這路牌才決定在這裡落車

魚形欄杆

三崎港街角，有些屋都好古老

初初以為這座就是魚市場，點知原來是街市

有得試食喎，唔～好味，白豬，買d番去食囉.....　唔好同人講係攞嚟食呀，實比人笑死，果d魚仔係煮干，係用嚟煲湯的

買了這隻大的，真係好好食架，白豬話煲湯太浪費了，一於當小食，店主仲收咗我哋500円咋

另外買了這盒紅色的汁煮吞拿魚，果位太太好細心同我地講解，食完覺到幾好食，而且她仲主動減價收我 700円，真的好好人

鮪魚包，第一次見

買了個嚟食，好重魚味，唔錯

買急凍的平少少，1050円五個

在這裡坐下睇下海景，好寫意

仲有白鴿陪伴

隔離有座好大座的才是魚市場

依旅遊地圖行，這間是魷魚市場，點知原來只是一間百多呎的商店

行下行下行到了三崎銀座商店街，銀座喎，應該好多野食喇，點知～好多店都是關門的，唔通只是假日才開門嗎？

本來諗住係呢間食，但係是要除鞋坐地下的，所以無幫親，但是行了一陣又找不到合適的食店，返轉頭想幫襯時見佢已經關門，只是兩點多就關門，真是！

在三崎港好多店鋪門前都見到的曬魷魚乾

三崎口駅的拉麵店

餃子，我的最愛

好多椰菜的味噌拉麵

　　食飽已經差不多 15:30 了，要去下一站『新横浜ラーメン博物館』，在三崎口駅坐京急本線返橫濱，轉車乘京浜東北根岸線到東神奈川，再轉車乘JR横浜線到新橫浜駅；但係去到橫浜駅轉車時才知道，原來新橫浜線是經橫浜的，所以決定坐下一班車直接到新橫浜駅。約五點就到新橫浜駅，落車出閘後找到地圖，認清路線就向拉麵館出發。

　　新横浜ラーメン博物館原來只係一楝好細的大廈，入場費每位 300円，入場後只見一間不太大的手信店，並沒有指示牌，看中文版的手冊子喇，就只得好簡單的講解，並沒有地圖，只有找日文版來看，好清楚呀，有地圖，有拉麵店介紹，但是仍找不到點行才正確，好彩有位女工作人員主動用英文教我們點行，真的謝謝這位美少女。

　　新横浜ラーメン博物館是有三層，一樓，地庫一樓及地庫二樓；購票後入場是一樓，有手信店及拉麵店用品展覽室；地庫一樓及地庫二樓才是拉麵店及舊日本街道，入場後轉左就見到樓梯，行落就是 B1及B2。

　　落到地庫後，才知原來這裡是很細的，d人嚟呢度主要是嚟食拉麵，但是這裡的拉麵比出面的店貴，我又不是很喜歡食拉麵，行了個圈影了相就算，都係返新宿食好過。

　　坐返車去橫浜駅，再轉乘JR湘南新宿ライン，約 19:45就返到新宿，晚餐決定在歌舞伎町的松屋食牛肉飯，松屋也是用自動售票機的，購了票後放在坐枱上，職員就會取走張飛，等多一陣就有得食。日本的松屋及吉野家的牛肉飯好食過香港的好多，真係價廉物美；食飽飽見仲早就去咗酒店後面的超市行下，今次不行赤札堂了，改行第二間，是在赤札堂轉左，行兩個街口就到；買了些宵夜及早餐後，在出口處見到好紅好靚的士多啤利，只售 500円，一於買嚟試下。

　　在返酒店途中，去 Lawson便利店買明天的『三鷹の森ジブリ美術館』門券 1000円，美術館門券可以在香港日航天地預售，但是比較貴，比原價差不多貴一倍，要港紙130蚊，所以今次決定到了日本才買門券；入到 Lawson便利店後行了一個圈，找到門券的自助售票機，但是全是日文，雖然曾經在網上看過解說點按制，但是看了也是不太明白，站在部機前有點老鼠拉龜的感覺；幸好便利店內的職員好醒目，見到兩個傻瓜係部機度呆車車，當我望向他求助時，便立即飛奔嚟幫手，好快就幫我哋買了明天的門券，俾埋錢就完成所有手續，門券到手了，今日第N次的Lucky了。

　　今天行了好多路，真的很累，而且明天又要早起，所以要早點上床休息。

到了新橫浜駅只是五點，但個天已經黑晒