chris 的小小世界: 08年清遠金雞岩兩天遊 Day 1

旅行社：遨遊天下
日期：2008年11月15日至16日(星期六－日)
費用：$698(連小費)

第一天

日期：2008年11月15日(星期六) 晴
行程：香港 → 深圳 → 花都 → 清遠 → 金雞岩 → 紅不讓 → 酒店
住宿：清新花園酒店

　　早上六時半起床梳洗後，執好行李就準備出發。這次是參加地區旅行團，落樓幾分鐘就到集合地點。大家都好準時，上了車後好快就開車；今次是在落馬洲過關，雖然是星期六，但可能時間尚早，海關不是太多人，好快就辦妥手續過關。

　　今次所坐的是直通巴士，過了海關在黃崗可以直接在禁區上番車，不用萬里大長征咁行條長天橋，可以舒舒服服，真好。

　　今天的第一站係食午餐，導遊話因行程關係，要早點食午餐。今餐是食『花都風味宴』，最出名的是燒豬骨粥，食落 d 粥咸味就啱啱好，但係 d 豬骨就好鬼咸，而間餐廳門口仲有盒裝燒豬骨賣添，本來都想買的，但係要聽日先返香港，而且個天仲咁熱，所以就打消這個念頭。

開餐喇，先嚟燒味拼盤

豉汁蒸矮瓜，味道都唔錯

豆腐煲，d 豆腐好鬼滑

好韌的鐵板羊肉，少d牙力都食唔到～

鱷魚呀，這間食店竟然有得食

做緊特價添，39.8人仔一斤，仲平過香港的豬肉

連蛇都有

門口賣緊的盒裝燒豬骨，睇過佢個盒，話要放係雪櫃喎，佢就咁放在度，唔驚佢會變壞咩

　　食飽後就去下一站『金鷄岩』，金鷄岩是一個新近發現的岩洞，內裡有很多古董，據考古學家的研究，這個岩洞是以前山賊收藏賊贓的地方。

　　洞內十分濕滑，要好小心行才可以，由於洞內的路比較難行及高的原因，我們分了兩隊人，一隊跟金雞岩的工作人員行個山洞一周，之後去展館睇野，而另一隊直接去睇展品；d 展品其實都好值得慢慢睇的，但係夠晒鐘都未睇晒，無法喇，去埋洗手間就返上車了。

到咗金雞岩

個岩洞入口建在寺廟內

行一陣就見到岩洞

在洞的最底地方有座觀音像

d 樓梯好濕好滑呀，行果時要好小心

導遊話呢個係獅子石，睇落都幾似喎

呢度有枱有櫈，可以坐下先

呢舊石似唔似粟米呀

獅子岩，真係好有想像力

聖旨到，呢幅真係聖旨嚟架

在岩洞內出土的文物

龍床呀，唔知係唔係真，不過上面就真係有龍的圖案

展覽館仲展出中國最早期的股票

乜東東，咁大舊既，原來係石磨

　　睇完文物跟住就去『紅不讓』，初初聽真係唔知係乜野，在入口處寫住『紅不讓食用菌展覽館』，唔通係睇下點種 d 菇；當然唔係喇，一入去佢就介紹好多不同的菇，仲行去睇佢 d 菌菇種植場添，行行下跟住去睇鹿，睇完跟住入咗間房，咁大家明喇，原來係嚟聽書的。上完課後並沒有即時推銷，係帶我哋去出面個大賣場先 Sale，對這些東西不感興趣，行個圈就走。

　　出到門口，等齊人後就開車返酒店休息，今晚係住一間五星級酒店『清新花園酒店』，這間酒店真的好大，但是仍在裝修中，只是部份開放的，很多設施都用唔到。

　　今晚導遊特別安排我哋入住一間雙人大床房，房內的雙人大床真係好大；唔知係唔係新開張定係乜野原因，我地已經四點幾才 Checkin，但係成團人要入住的房間好多都未執乾淨，而且仲見到另一團人早到過我們大半個鐘，都係係個大堂度等攞房，今時今日呢個服務態度真係唔得。

　　導遊決定唔等喇，話之佢清潔咗未，派房咭給大家入房放低行李先，跟住出去食晚餐；今餐係『豬肚煲雞風味宴』間食店係酒店附近，行十分鐘就到，入到食店時看到枱上有兩個爐及兩大煲野，原來所謂豬肚煲係火鍋，今晚打邊壚。
　　去旅行食團體餐食打邊爐都係第一次，但係間食店冷氣唔夠凍，要開天花的吊扇，但係個爐係明火，比 d 風吹到散晒，坐正係風口的團友就吹到正，但係唔開風扇又好熱，唯有開細 d個火，開細 d 風扇食住先。

　　枱面上的兩個煲係豬肚煲同胡椒雞煲，另外有幾碟菜可以滾嚟食，味道都唔錯，但係個
豬肚煲煮極都唔諗，食唔到，導遊知道後立即加了碟肉丸比我地。本來今晚有自費活動，係去行步行街及宵夜，原本都打算參加，但係今餐真係食後好飽，最終決定唔去。食飽後又未夠鐘上車，於是在間食店附近行下，找到一間好平的商店，買了水及一些小食當宵夜後，就上車返酒店休息了。

紅不讓的門口