chris 的小小世界: 07年東京箱根8天自由遊 Day 5

第五天

日期：2007年11月22日（星期四）
行程：池袋 → 箱根 → 元箱根 → 海賊船 → 桃源台港
　　　→ 大涌谷 → 酒店
住宿：箱根の森おかた

　　由於今日去箱根，所以 6 時半就起身，梳洗後就出發。本來在酒店 CheckIn 時問過是可以寄存行李的，但之前在網上論壇問過是不可以寄存兩天的。在 CheckOut 時職員話不可以寄存兩天，並沒有驚訝，只是有些少失望，於是拿著個 29 吋喼出發。

　　在東京，早上繁忙時間真的很多人，攞著個大喼坐電車十分不方便，幾經辛苦才到新宿小田急車站，比預定時間早了半個鐘，今天搭 08:25 班車，約 10:25 就到箱根，這班浪漫列車是 3000型 EXE ，是比較舊的車種，今日係用早兩日前買的箱根兩日周遊票 ，每位 5000 円，已包來回箱根的電車及在箱根的所有交通工具；而今日所乘搭的浪漫列車是要加錢買特急指定席，每位 840 円。

　　上了車放好個大喼之後，找到了坐位後就同黑白豬影相喇；好快就夠鐘開車，發現有好多位都是沒有人坐的，難倒個車唔滿？點知在下個站就坐滿人了，我這個大鄉里出省！開了車不久時，白豬好快就搵周公，停站時就訓醒，問有沒有浪漫列車便當食，見到服務員推著食物車仔行過就買了那個便當給她食，這個便當要成 1000 円，裡面只後幾塊食物及飯團，都幾貴，但是就可以攞番個飯盒做紀念品。

　　唔知係唔係坐得舒服的關係，個幾鐘的車程好快就到，落車後就看到這個車站十分細及舊，得一個出口，唔會行錯路，出了閘就找行李托運，放低重量級行李就起程，因為個大喼會運去酒店，我買了 PASS可以平 100 円，多謝運費 600 円。

　　搞妥後已經 11 點了，起程到第一站箱根舊街資料館，要坐往元箱根的登山巴士，在車站兩旁有好幾個巴士站，過了馬路在其中的一個巴士站問職員，原來巴士在對面馬路，而且仲上緊人，第一時間就過了馬路上車，上車時出示一下張 PASS 就可以，唔洗比錢；在這裡並不多見有人會這樣過馬路的，我係在香港經過長時間訓練過馬路的高手，大家唔好學呀！

　　我們是最後一個上車，全車亦滿座，所以只能站在車頭，有一個好位睇風景，好野～在馬路看見有好多人行山，一群一群的人向山進發；行車時真的路窄多灣，好像坐過山車一般，好不驚險，行了約十多分鐘就到，落車時車上好多人也一齊落車，而且又有好多人上車，這個地方真的好多人遊玩。

　　落車時第一眼看見的就是滿山都是紅葉，好開心呀，影了相後就跟人行去資料館，這間資料館其實十分細，出示 PASS入場費每人 50 円，都幾平宜，入到去原來只有一間百多呎的房間，收錄了以前日本的物品及相片，好快就行完，再坐車到元箱根了。

今日坐的箱根 9 號

電車內的椅，似唔似飛機椅呀

車內環境

車外風景，剛剛經過一條鐵橋

途經一間 Outlet

有早飯食喇，你睇黑白豬幾餓

等唔切喇，要開餐喇

到了箱根湯本駅，個車站好細，要排隊出閘

終於出咗閘，外面天氣好好

先搞點個大喼先，在這裡把個大喼托運

巴士上的收費機

可以用多種咭付款，而且仲有紙幣找贖

在車頭的頭等睇風景一流

湯本的街道十分窄

有好多人行山呀

這裡應該係時常都會落雨的，車內竟然有傘賣

甘酒茶屋站

這架就係我坐的巴士喇

好出名的甘酒茶屋

茶屋旁的樹，美嗎？

行無幾耐就見舊街資料館

舊街資料館

館內的展品

以前日本人的服裝

在箱根，貓頭鷹係吉祥物

資料館旁的樹，已經變成火紅色

紅葉

自動售賣機都有間屋住

又係謎語，這東西係乜野

原來係俾等巴士的人坐的

　上了巴士後本來打算直接坐在箱根關所落車的，神社留在明天才到，但時間比預計的早，一於一天內行哂所有行程，明天一早就可以番新宿。於是在元箱根町站下車，跟著沿著湖畔反方向行，行了一陣就在湖中看見了鳥居，神社就在那處。到了神社後發覺神殿要行一條非常長的樓梯，都係唔好搞喇，在下面行下就算；這裡的紅葉好靚，有好多都轉了色，一於影個夠本。

　　行完就沿原路行番巴士站搭巴士，坐一陣巴士就到關所資料館站，都好近，有時間可以在湖畔慢慢行下都唔錯。這裡有間箱根關所資料館，內容同之前的都係差不多，而且入場又要 400 円，所以在門口影下相就算；直到現在除了在車上食了個便當外就沒有食過野，在這裡買了溫泉紅豆包充饑。

　　海賊船的碼頭箱根町港在關所資料館隔離，行一陣就到，但係剛開出了一班船，要乘下班船 13:40 ，要等二十分鐘，於是在附近影下相食下雪榚，好快就夠鐘開船；上了船後就直上頂層甲板，揀番個好位可以慢慢欣賞下風景，原來在這裡上船是可以睇到富士山，海賊船到了元箱根町港後上了人，好快就開船，在元箱根町港是可以比較清楚看到富士山，當然又要影番夠本。

　　在船上好大風，吹到個人好凍，影夠相後就落船艙暖下個人，在船艙有間小賣部，有 Hello Kitty 海賊船限定版，於是買了電話繩；行到船頭度，在這個船艙係可以看到駕駛艙及船長掌舵的，當然要影相留念。

到了元箱根，去神社就向這個方向行幾分鐘就到

門前的狗狗攞設，好有鄉村 Feel

這間手信店在箱根有好多分店

這裡都有人力車

又有紅葉，影多張先，紅得好靚

這處仲成排添

湖邊有天鵝船坐，拍拖一流

在湖邊有個大鳥居，神社就在鳥居後面

仲有 150米

途中的石燈

神社的入口

好日本Feel

唔知這些燈在夜晚有無人點燈呢？

同香港一樣，捐咗錢的善長人翁會刻名留念

終於到神社

要上呢條長樓梯才到神殿

在這裡可以祈福

唔識可以問下這位姐姐

祈福完就把下下籤的籤文紙放在這裡，不要帶回家

七福神，在日本係好多人拜的

這裡的風景都好靚

另一邊，樹頂都變哂色

湖邊風光

遊覧船碼頭，但係唔好搞錯，唔係坐海賊船的碼頭

下一站，箱根關所

這間關所資料館入口，間屋都好古舊

關所的手信店

溫泉紅豆包

200円 3 個

唔～おいしい，不過就甜咗少少

碼頭就在隔離，行一分鐘就到

剛剛開了班船

碼頭就在箱根町港

上船的碼頭

船費每位 1460円，好彩買了 PASS

有時間食枝雪榚先

北海道限定蜜瓜雪榚

在碼頭係睇到富士山的

碼頭另一邊

碼頭的紅葉都好靚

呢棵好似著火咁

碼頭前面的食店

海賊船到喇

船頭有隻金馬

船上面有海盜

在船上影番碼頭

這個大屋的正呀

神社的湖中鳥居

在船上好清楚睇到富士山，今日有雲，可惜

Zoom埋 d，比舊雲阻住，睇得唔係好清

元箱根町港碼頭

舊雲剛剛行開咗，可以睇多 d

迎面有另一艘海賊船

架船原來都幾大隻

船長係度楂船

　　約 14:20 到了桃源台港，都唔係坐好耐船，落了船在碼頭看見滿山盡是紅葉，好不美麗。嚟桃源台港是坐吊車到大涌谷噴煙口，坐吊車又係唔洗錢，用張 PASS 當飛咁過入閘機就可以；在吊車上看的風景十分美麗，而且仲睇見富士山添，真是不往此行，途中經過姥子駅，不需要落車，好快車門就關上繼續行程，過了一陣就到了大涌谷駅，亦是到大涌谷噴煙口的車站，到了車站後才知原來這裡是尾站，所有人都要落車，如果不到大涌谷的話，就在另一邊轉乘吊車繼續行程。

　　在車站的紀念品店看見有黑玉子賣，但係同網友所影的不同，而且又比較貴，要成 630 円六隻一盒，由於心急的關係，所以就買了來食，發覺原凍的，而且仲係半生熟，好像溫泉蛋一樣，只食了一隻就算。出了車站向噴煙口進發，在途中看見一個好大的旅遊案內所，入到去原來都是手信店，亦有黑玉子賣，而且仲係暖的，只售 500 円，於是又買了看看有何分別，這裡的黑玉子是給人立即食的，暖的，蛋殼會有些破裂，而之前買的是用來做手信的，每隻都好靚。

　　上山是要行一條好長約十層樓高的路，真是行到氣都喘埋，終於上到噴煙口了，在那裡有一個一個圓的坑洞，裡面有灰色的泥巴，大量的煙就是從這些坑洞噴出，而且氣味十分難聞，在這裡有間專賣黑玉子的店舖，原來所有黑玉子都是在這些坑洞沉熟，店舖前面有好多人在食黑玉子，我們亦在這裡食之前賣的暖黑玉子，置於凍的就帶回東京後才食。

我地的目的地，桃原台港

這裡的紅葉仲靚

吊車呀，同香港的 360 差唔多樣

桃原台的吊車站，原來這裡都幾高

吊車外的風景，這個角度美嗎？

對面的吊車

另一架吊車，有好多種色

哈，在吊車都可以睇到富士山

中途站，姥子駅

一過姥子站，風景全完唔到，成山都變哂紅色

在吊車望番落去，風景好靚

就到喇，左邊噴煙的地方就係大涌谷

好多煙呀

到站，落車，去早雲山就轉左再坐吊車

大通谷吊車站

這裡海拔成千米，都幾高

成個山頂都噴哂煙

左邊的好像工地，你估做乜呢？

原來係開採硫磺

車站內貴的黑玉子

包裝得好靚

連 Hello Kitty 都有黑玉子版

山頂的地圖，在右邊的路直上

山頂仲多煙

好多人上山，大家努力呀

山頂的溫泉坑洞，煙就在這裡噴出

d 溫泉水係咁流出嚟

即食的黑玉子，包裝就差 d

在那裡看番落車站

這個都唔知係乜野版的 Hello Kitty

上山入口的商店，有好多食

天氣咁凍，當然飲番杯熱奶喇

　　差不多 4 點了，係時候返酒店，在這裡返酒店要先坐吊車及纜車到強羅，再轉登山電車返到箱根湯本，坐酒店巴士才到，足足需時個半鐘有多；到了箱根湯本後，找不到巴士站，問人只知係要坐 A 線巴士，但係又找不到那裏有A線巴士，問在派出所的警察叔叔，但係點佢都係唔知道，都係叫我問番酒店巴士站的人，在不知如何是好時，就看到了酒店A線巴士埋站，問了司機確定是經今晚所入住的酒店後就上車。

　　巴士開車後，發覺原來這巴士是停好多間酒店的，不知在那個站落車才對。好彩，原來每間酒店都有站，而且仲會大聲叫那間酒店的名子。終於到了我要落車的站，今晚入住的酒店是要在おかたホテル落車，然後入去搭升降機到 8 樓，再坐扶手電梯到緊急口，出了酒店就看見箱根の森おかた，好彩沿路都有指示牌；千辛萬苦約 18:15 終於到了酒店，做了簡單的 CheckIn 就上房，我個大喼原來已經放到房間，好好的服務。

　　放低行李，梳洗一下就到地庫餐廳食晚餐，今晚訂了個蟹鍋，個蟹鍋真的好好味，而個主餐溫泉套餐都好好味，足足食了個幾鐘才食完這餐，真是飽到唔知點。上房休息一陣就到隔離的湯の里おかだ。浸溫泉的時間是黑白豬分開最耐的時間。溫泉有多個池，有同溫度，浸了半個鐘就返房休息，一整天的行程就完滿結束了。

係時候返酒店，坐纜車到強羅