2009年5月5日 星期二

09年 愉景灣至梅窩行山樂

日期 : 2009 年 5 月 2 日 (星期六、天晴)

  在網上見到有網友推介由愉景灣行去梅窩的行山徑都幾好行,而且又未去過愉景灣,於是趁住五一假期的第二日去愉景灣行下山,雖然昨天剛行完魔鬼山炮台,隻腳仔仲好鬼攰,但係唔想浪費這個假期,所以就照原定計劃出發。

  今朝十點就已經到咗中環港外線碼頭,只見個碼頭已經人山人海,因為今日剛好係長洲太平清醮,條人龍長到暈,好彩今日唔係去長州啫,行到二號碼頭乘船去愉景灣,船費要 $31。全程只需 25 分鐘,都幾快。

  初初以為愉景灣好像錦繡花園咁,全部都是 House,有花園洋台,點知到步後所見的大部份是洋樓大廈,有些意外。先在碼頭前的水滸坊內的麥記食早餐,食飽後約十一點半就起程。

  先在碼頭右邊行,經過巴士總站,出到路口轉左,行約一分鐘就見到遠處的街渡碼頭,未到碼頭前有個路口轉入去就有條路去沙灘,不過無明確的指示牌,唔留心都唔易搵到。

  由愉景灣行,經稔樹灣,到長沙欄,全程大部份都是平路,之後就係上山路,但不是太辛苦,好快就到神樂院,由愉景灣到神樂院,行得快應該不用半個鐘,不過我就行下抖下,又影下相,足足用了成個鐘才到。因知道之後上山仲有條好長的斜路同樓梯要行,所以就在神樂院去下洗手間,休息足夠才再起程。

  休息完後就繼續行,之後的路全是上山的斜路,雖然不是太難行,但行得都幾索氣,抖咗好多次先可以上到山頂的觀景亭,係個亭入面已經有好多人係度休息緊,都幾擠迫,好彩搵到個位坐下,見有時間,於是攞咗部新電話試下個 GPS,哇~這個觀景亭原來有成 246米高,唔怪得行得咁辛苦喇!

  休息了一陣就由亭的另一邊落山,這條路大部份都是石級,之前睇過資料話由愉景灣出發係比較易行,因為如果由梅窩出發,先要行兩段斜路,跟住再要行成二百幾米的石級,唔辛苦就假。反方向由愉景灣行,起步是平路就比較易適應。約三點就落到山腳,行完全程,一出就係銀礦灣,肚子真係好餓,於是行到碼頭的附近熟食市場食午餐,食飽後去到碼頭剛好有班船就嚟開,船費要$36.7,哇~仲貴過愉景灣。船程約三十分鐘,好快就到中環碼頭,跟住坐港鐵返屋企。

十點鐘,未到碼頭已經見到排晒長龍去長洲


去愉景灣係二號碼頭


今次坐十點半班船


無八達通的要係客務中心買票

仲有時間,坐下先

今次坐這架快速船

座位都幾舒服

搵個位坐低訓陣先

愉景灣的洋樓


愉景灣碼頭

水滸坊

Wildfire....同我盆迷岩一樣名

今日的早餐

出發前去下洗手間先

今日的行裝,上山落山就要靠晒支手扙

跟住就起程,向巴士總站方向出發

巴士總站,以前聽新聞報導話愉景灣碼頭泊滿晒高爾夫球車,有些混亂,不過今日又唔多覺

原來係泊咗係第二度,而且見到d高爾夫球車有晒車牌

住宅樓下也有停泊高爾夫球車

久不久就在馬路見到有高爾夫球車行駛

街渡碼頭

這個路口就係去神樂院~

要行咗入去先見到這個路牌

稔樹灣及去坪洲的碼頭

係稔樹灣有埋長沙欄的信箱,方便郵差叔叔派信

點解係呢度會有超市的手推車,在稔樹灣我就見到四周圍超過二十部這些手推車,而且仲印有愉景灣一間商店的名字,唉~香港人

行行下見到呢個路牌,我哋轉右繼續行

好得意的土地公公

在小山丘上見到個菜田,每塊田前都放咗果種植物的名牌

個菜田都好大

行行下係海邊見到有張椅,唔通真係會有人坐係度睇浪?

這條小路就係我哋剛行過,都幾好行

在路邊見到一大群毛蟲,隻隻都好肥好靚


一堆唔知乜野的甲蟲,都幾得意

見到隻蝴蝶停咗係葉上面,機不可失,立即同佢影張沙龍先

真係乖,等我影完相先飛走

過咗長沙欄後就要上山,不是佷斜,好快就行完

係呢度咁遠的地方都有人住,而且仲種咗咁靚的黃花

行行下就見到條分叉路,左邊係去碼頭,我哋就轉右

唔識路唔緊要,係路口有指示牌

 
去神樂院上山路上掛了好多個十字架

行完條幾斜的路後就到了神樂院


原來佢哋都係飲番自己出產的牛奶

繼續行,就見到這個公園

裡面供奉了聖母像,個亭好中國化,初初睇見仲以係觀音像添


再行過少少就係聖堂,唔好咁大聲講野呀

這條路係去隱修院的

不准遊人入內

 
離開神樂院後就在這個路牌左邊繼續行

今日的中途站,觀景亭

上埋這條樓梯就到山頂

山火拍,大家行山時要小心火種

觀景亭,好多人呀

係山頂睇風景都係好靚,前面就係坪洲


仲見到香港同九龍,今日好大煙霞,好矇

係另一邊落山就可以去到梅窩,大部份都係樓梯

見到銀礦灣喇

梅窩碼頭

已經二點幾,仲有人係梅窩出發行去愉景灣

海中間見到有個堤壩,唔知係乜野呢?

d 樓梯好高好斜,落山時都要小心 d

終於行完喇,這個就係出口,跟住轉右行就到銀礦灣

今日都幾熱,隻狗都話要抖下涼

聽曉山房

梅窩酒店

係酒店前面有間假日餐廳

梅盧

這間屋主都幾搞鬼

銀礦灣沙灘

d 人係度望乜野?原來有人係度放風箏,留意右上角

旁邊有個燒烤場,唔係好多人係度燒野食

有好多人係度玩沙灘排球

好出名的銀礦灣酒店

端午節就到,已經開始要練習扒龍舟

今日就係梅窩熟食市場食午餐


啡熊同白熊已經好肚餓,洗定碗筷等食

乾炒牛河,哇~好大碟呀,睇到佢哋流晒口水

呢碟豉椒排骨飯都唔錯

食飽就去隔離的碼頭坐船返屋企

今日係坐高速船,半個鐘都到中環

我哋坐的高速船

隔離係新天星碼頭,睇完 d 船後就坐港鐵回家了
 


沒有留言 :

張貼留言